Ilustracyjny zdymak. Fota: «Naša Niva»
Kuplajuć nie na pieraprodaž, a dla siabie
Z 1 krasavika 2024 hoda rasijanie bolš nie zmohuć, jak raniej rehistravać u siabie aŭtamabili ź Biełarusi, razmytnienyja pa lhotnym taryfie. Pa novych normach, jakija nabyvajuć moc praź miesiac, kab pastavić na ŭlik u Rasii «ilhotny» aŭtamabil, treba budzie dapłacić roźnicu ŭ mycie — ličycie, 50%.
Hetaja navina ažyviła popyt na aŭto ź Biełarusi. Admietna, što kuplajuć nie tolki «śviežyja» aŭtamabili va ŭzroście da 5 hadoŭ, ale i bolš uzrostavyja.
Pradaviec minivena 2013 hoda vypusku, jaki dniami pradaŭ aŭtamabil na Rasiju, nie čakaŭ, što taki aŭtamabil moža zacikavić rasijan.
«Ja śpiecyjalizujusia na niedarahich aŭtamabilach, jakija razychodziacca na miascovym rynku, pryhaniaju ź Jeŭropy tak zvanyja nieprachadnyja aŭto (starejšyja za 5 hod. — NN).
Rasijan takija mašyny zvyčajna nie cikaviać. Ale paśla naviny pra toje, što za aŭto, nabytyja ŭ Biełarusi, daviadziecca dapłačvać roźnicu ŭ mycie, popyt źjaviŭsia. Pryčym heta nie pierakupy, a ludzi, jakija kuplajuć mašynu dla siabie», — raspaviadaje mužčyna.
Ź jaho słoŭ, jahonyja kalehi taksama adznačajuć rost cikavaści z boku rasijskich pakupnikoŭ.
Tydzień syšoŭ na padrychtoŭku dakumientaŭ dla rasijskich pakupnikoŭ
Inšy surazmoŭca dniami pradaŭ 6-hadovy aŭtamabil, jaki ŭžo amal try hady jeździŭ pa Biełarusi.
«Kolkaść zvankoŭ z Rasii pavialičyłasia. Niedzie praz tydzień paśla vychadu naviny čałaviek byŭ hatovy pryjechać pa aŭto. Pakupnik paśla handlu i atrymańnia dadatkovych fota i videa chadziŭ u svaju mytniu i DAI, dzie jamu dali śpis papier, nieabchodnych dla paśpiachovaj rehistracyi. Daviałosia niedzie na tydzień adkłaści kuplu, pakul ja padrychtavaŭ usie papiery», — zhadvaje surazmoŭca.
Niekatoryja pradaŭcy, jakija raźličvajuć na prodaž aŭto ŭ Rasiju, zahadzia rychtujuć nieabchodny pakiet dakumientaŭ, pra što zvyčajna dadajuć infarmacyju ŭ abjavie.
Ułaśnik aŭtakamisa naadvarot kaža, što popyt zastajecca pryblizna na tym ža ŭzroŭni, ale adznačaje, što źmianiłasia struktura pakupnikoŭ.
«Raniej asnoŭnymi kupcami z Rasii byli pierakupy, jakija brali aŭto ŭ Biełarusi i pierapradavali ich tam biez pastanoŭki na ŭlik. Ale dla ich biznes, možna skazać, prykryŭsia. Reč u tym, što ŭ Rasii jašče letaś źmianili miechanizm apłaty ŭtylizacyjnaha zboru. Kali čałaviek kuplaje aŭto i rehistruje jaho na siabie, to płacić kala 50 jeŭra ŭtylizacyjnaha zboru.
Ale kali ciaham hoda jon zachoča mašynu pierapradać, to daviadziecca płacić pa poŭnym taryfie, a tam užo nie 50 jeŭra, a 1500 i bolš u zaležnaści ad abjomu ruchavika», — tłumačyć biznesmien.
Ilustracyjny zdymak. Fota: «Naša Niva»
Pavyšany popyt zachavajecca maksimum da siaredziny sakavika
Da apošnich novaŭviadzieńniaŭ, pa słovach surazmoŭcy, rasijskich pierakupaŭ pavyšanyja staŭki ŭtylzboru asabliva nie kłapacili, bo pieršym ułaśnikam u Rasii stanaviŭsia kančatkovy pakupnik. Ciapier ža takaja schiema nie spracuje. Daviadziecca abirać, rehistravać aŭto ŭ Rasii da 1 krasavika, kab paźbiehnuć dapłat pa linii mytni, abo stavić na ŭlik, a potym dapłačvać utylizacyjny zbor pa poŭnaj staŭcy.
Pa słovach ułaśnika aŭtakamisa, apošnim časam aktyvizavalisia mienavita tyja rasijanie, chto kuplaje aŭto dla siabie. Dla ich hałoŭnaje — paśpieć zarehistravać aŭto da 1 krasavika, kab nie treba było dapłačvać roźnicu ŭ pošlinie.
«Hetaja pracedura ŭ Rasii zajmaje kala 10-15 dzion, tamu pavyšany popyt na aŭto ź Biełarusi zachavajecca maksimum da siaredziny sakavika», — miarkuje aŭtabiznesmien.
Čytajcie taksama:
Razmytnienyja pa lhocie aŭto nielha budzie pradavać u Rasiju. Što źmienicca ŭ zakonie i jak heta adabjecca na Biełarusi?
U prodažy źjaviŭsia abnoŭleny Geely Emgrand. Što aproč cany źmianiłasia ŭ samaj papularnaj madeli biełaruska-kitajskaj vytvorčaści
