Zaleplenyja izastužkaj nadpisy pa-anhlijsku na čyhunačnym vakzale Minska. Fota: Blizko.by
U siaredzinie studzienia minski čyhunačny vakzał pazbaviŭsia ad anhlijskaj movy na infarmacyjnych tabło z dapamohaj izastužki. Takim sposabam vypravili ŭsie elektronnyja tabło ŭ abodvuch padziemnych pierachodach pad puciami, a taksama na samich płatformach ź ciahnikami. Na dziasiatkach tabło nie zastałosia nivodnaha słoŭca pa-anhlijsku.
Tady načalnik čyhunačnaj stancyi «Minsk-Pasažyrski» Alaksandr Drožža błytana patłumačyŭ heta składanaściami ŭ zamienie tabło, na jakich byccam byli dapuščany pamyłki pry vyrabie:
«Zamiena apošnich [tabło] u naš čas niemahčymaja pa technałahičnych pryčynach, źviazanych ź nizkaj tempieraturaj vonkavaha pavietra. U suviazi z hetym pryniata časovaje rašeńnie pa zaklejvańni infarmacyi na takich tabło. Paśla ŭstalavańnia stanoŭčaj tempieratury vonkavaha pavietra kanstrukcyi buduć zamienieny».
Biełarusy vyrašyli ŭdakładnić, a jak ža ciapier aryjentavacca zamiežnikam, jakija prybyvajuć u Biełaruś, u tym liku z zachodnich krain pa biaźvizie, i jakija nie viedajuć ni biełaruskaj, ni ruskaj moŭ.
Biełaruskaja čyhunka za podpisam namieśnika načalnika Andreja Jakabsona dała paradaksalny adkaz:
«Čyhunačny vakzał nie źjaŭlajecca turystyčnaj słavutaściu i vykarystańnie zamiežnych moŭ dla infarmavańnia hramadzian na ŭkazanym abjekcie nie abaviazkovaje».
Zamiest hetaha zamiežnikam prapanoŭvajuć aryjentavacca z dapamohaj techničnych srodkaŭ (infarmacyjnych tabło), na jakich niama zamiežnych moŭ, piktahram, infarmacyjnych schiem, mabilnych pryład z adpaviednym dadatkam ci źviartacca ŭ kantakt-centr i da piersanała vakzała, jaki taksama moža nie viedać nijakich moŭ, bo «nie abaviazkova».
Pazbavicca ad łacinki na pakazalnikach i infarmacyjnych stendach uradu daručyŭ Alaksandr Łukašenka ŭ vieraśni 2023 hoda. Jon zapatrabavaŭ vykarystoŭvać tolki dziaržaŭnyja movy. Praź niekalki dzion kiraŭnik Minharvykankama Uładzimir Kucharaŭ zajaviŭ, što tablički ŭ horadzie zamieniać.
Z adnaho boku biełaruskija ŭłady, jak i lubyja inšyja, vielmi zacikaŭleny ŭ zamiežnych turystach, jakija b pryvieźli i patracili tut svaje hrošy. Navat u čas, kali adnosiny z zachodnimi susiedziami nosiać adkryta varožy charaktar, dla hramadzian hetych krain zachoŭvajecca biaźvizavy ŭjezd u Biełaruś. Ź inšaha boku, biełaruski režym robić usio, kab adpudzić svaimi noravami i dzivactvami ŭsich, chto chacieŭ by pryjechać u krainu.
Toje, što ŭ Biełarusi navat vakzały, jakija zaŭsiody źjaŭlajucca miescam najvyšejšaj kancentracyi zamiežnych turystaŭ, pryznajucca «nie turystyčnymi» — nonsens dla ŭsiaho śvietu.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Na Homielščynie dałažyli pra poŭnuju pieramohu nad łacinkaj
Kala Hrodna łacinku likvidavali navat u nazvach polskich haradoŭ
Zdajecca što łukašysty navat nie razumiejuć, nakolki absurdna zvonku vyhladajuć ichnyja adpiski