Aršanski avijaramontny zavod
Sankcyjnyja abmiežavańni prapanavali ŭvieści suprać Aršanskaha avijaramontnaha zavoda i jahonaha hienieralnaha dyrektara, hramadzianina Biełarusi Paŭła Słučaka. Pradpryjemstva zajmajecca ramontam viertalotaŭ Mi-24 i Mi-35, jakija Rasija vykarystoŭvaje ŭ vajnie suprać Ukrainy.
U sankcyjnyja śpisy prapanujuć taksama ŭklučyć Barysaŭski zavod pa ramoncie radyjoelektronnaj zbroi i jahonaha dyrektara Valeryja Šaciłu. Zavod vykonvaje zakazy Uzbrojenych sił Rasii.
Treciaja arhanizacyja — biełaruskaja kampanija «Pielenh», jakaja raspracoŭvaje i vyrablaje optyka-elektronnuju pradukcyju. Pra płany ŭklučyć jaje ŭ novy pakiet sankcyj paviedamlałasia raniej.
U prajekt novaha sankcyjnaha śpisu Jeŭrasajuza ŭklučyli taksama hramadzianina Biełarusi Siarhieja Astafurava, jaki ŭznačalvaje rasijskuju kampaniju «NTC Promtiechaero», jakaja zajmajecca pramysłovymi technałohijami i aeranavihacyjnymi sistemami. Kampanija ŭvachodzić u strukturu AT «Ałmaz-Antiej» — dziaržaŭnaha vytvorcy zbroi, supraćpavietranych sistem i kryłatych rakiet.
Aproč taho, sankcyjnyja abmiežavańni prapanujuć uvieści suprać Alaksieja Tałaja i jahonaha dabračynnaha fondu, jakija zajmajucca niezakonnym vyvazam ukrainskich dziaciej z akupavanych Rasijaj terytoryj Ukrainy. Papiarednie ŭ sankcyjny śpis uklučyli jahonaha partniora ŭ hetaj dziejnaści Dźmitryja Šaŭcova, kiraŭnika Biełaruskaha tavarystva Čyrvonaha Kryža.
Za anałahičnuju dziejnaść u sankcyjnyja śpisy płanujuć uklučyć staršyniu Navapołackaha harvykankama Dźmitryja Dziamidava, jakoha nazvali «adnoj z klučavych asob, datyčnych da prymusovaha vyvazu ŭkrainskich dziaciej u Biełaruś i ich dalejšaha ŭsynaŭleńnia rasijskimi i biełaruskimi siemjami».
U sankcyjnyja śpisy prapanavali ŭklučyć niedziaržaŭnuju arhanizacyju «Delfiny» i jaje zasnavalnicu Volhu Vołkavu, jakija kaardynavali vyvaz niekalkich hrup ukrainskich dziaciej i pravodzili ich pieravychavańnie. U dakumientach śćviardžajecca, što hetaja arhanizacyja stvorana ŭ Biełarusi, adnak dziaržaŭnyja ŚMI pisali, što Volha Vołkava źjaŭlajecca žycharkaj Daniecka i stvaryła svaju arhanizacyju mienavita tam. U dakumiencie, jaki ŭ svaim rasparadžeńni maje «Radyjo Svaboda», hramadzianstva Volhi Vołkavaj nie paznačana.
U prajekt sankcyj trapiŭ jašče adzin uradženiec Biełarusi, hramadzianstva jakoha nie paznačana, Vasil Šurpanaŭ, jaki naradziŭsia ŭ Klimavickim rajonie Mahiloŭskaj vobłaści.
Šurpanaŭ — hienieralny dyrektar AAT «Nižaharodski mašynabudaŭničy zavod». Heta rasijskaje vajskova-pramysłovaje dziaržaŭnaje pradpryjemstva, jakoje zajmajecca raspracoŭkaj artyleryjskich i rakietnych sistem, u tym liku zienitnych rakietnych kompleksaŭ S-300, jakija znachodziacca na ŭzbrajeńni rasijskaha vojska.
Usiaho ŭ čarnavy varyjant 13-ha pakieta ŭklučyli 105 fizičnych asob (hramadzian Rasii, Biełarusi, Ukrainy i inšych krain), a taksama 85 pradpryjemstvaŭ i kampanij z roznych krain, u tym liku ź Biełarusi.
U ES ličać ich «adkaznymi za dziejańni dziela padryvu abo pahrozy terytaryjalnaj cełasnaści, suvierenitetu i niezaležnaści Ukrainy».
Čytajcie taksama:
Krainy «Viejmarskaha trochkutnika» zaklikali ŭvieści kropkavyja sankcyi suprać Biełarusi
Łukašenkaŭskaja Biełaruś naźbirała kamplimientaŭ ad słavackich prarasijskich palitykaŭ
