Takier Karłsan. Fota: AP Photo / Lynne Sladky, File
Viadomy amierykanski žurnalist i televiadoŭca Takier Karłsan, jakoha na dniach zaŭvažyli ŭ rasijskaj stalicy, paćvierdziŭ čutki pra toje, što ŭ jaho jość damoŭlenaść nakont intervju z Uładzimiram Pucinym, piša Bi-bi-si.
Karłsan prylacieŭ u Maskvu na minułym tydni. U aŭtorak jon paviedamiŭ u sacsietcy Ch: «Siońnia ŭviečary my voźmiem intervju ŭ prezidenta Rasiei Uładzimira Pucina. My heta chutka zrobim».
Pa słovach Karłsana, intervju budzie pakazana ŭ nieadredahavanym vyhladzie na jaho sajcie Tucker Carlson Network i paźniej u sasietcy X, dzie ŭ Karłsana vielizarnaja aŭdytoryja.
Karłsan padziakavaŭ uładalniku Ch Iłanu Masku, jaki paabiacaŭ nie błakavać intervju, i skazaŭ, što čakaje sproby jaho cenzury z boku zachodnich uradaŭ. «Uziać takoje intervju — heta źviazana z ryzykami, viadoma», — zajaviŭ Karłsan.
Jon śćviardžaje, što administracyja Bajdena sprabavała pieraškodzić arhanizacyi hetaha intervju.
Takier Karłsan nieadnarazova ź simpatyjaj adhukaŭsia pra Uładzimira Pucina. Jaho palityčnyja pohlady padzialajuć mnohija kansiervatyŭna nastrojenyja amierykancy, niezadavolenyja šmatmiljardnaj amierykanskaj padtrymkaj Ukrainy.
Karłsan taksama nie chavaje svajoj antypatyi da prezidenta Ukrainy Zialenskaha, nazyvaŭ jaho dyktataram i vykazvaŭsia pra jaho vielmi niepryhoža. Jon abvinavaciŭ amierykanskija ŚMI ŭ «karupcyi» za toje, što jany nie chočuć havaryć z Pucinym i achvotna publikujuć intervju z Uładzimiram Zialenskim, jakija jon nazvaŭ «liślivymi natchnialnymi hutarkami», jakija ŭciahvajuć ZŠA ŭ vajnu va Uschodniaj Jeŭropie.
Hałoŭnaja televiadoŭca mižnarodnych navin CNN Kryścijana Amanpur nazvała hetyja zajavy Karłsana absurdnymi. «Heta absurd — my ŭvieś čas prosim ab intervju (z Pucinym), my heta robim užo šmat hadoŭ», — cytuje jaje brytanskaja Daily Telegraph.
Styŭ Rozienbierh, redaktar Bi-bi-si pa Rasii, paćvierdziŭ, što Bi-bi-si za apošnija 18 miesiacaŭ nakiravała ŭ Kreml niekalki takich zapytaŭ i niaźmienna atrymlivała ŭ adkaz «nie».
Pa słovach Karłsana, arhanizacyja jaho intervju z Pucinym zaniała šmat miesiacaŭ, a robić jon heta vyklučna dla taho, kab infarmavać amierykancaŭ, pradstaviŭšy im roznyja punkty hledžańnia.
«My tut nie tamu, što lubim Uładzimira Pucina, my tut tamu, što lubim Złučanyja Štaty i chočam zastavacca kvitniejučymi i svabodnymi», — skazaŭ Karłsan, znachodziačysia ŭ Maskvie.
«My nie zaklikajem vas zhadžacca z tym, što Pucin moža skazać u hetym intervju, ale my zaklikajem vas jaho pahladzieć, — skazaŭ jon. — Vy pavinny viedać jak maha bolš, i tady, jak svabodny hramadzianin, a nie rab, vy zmožacie vyrašyć sami».
Va Ukrainie idzie vajna, jakaja źmianiła śviet, a amierykancy pra jaje viedajuć niedastatkova. Takier Karłsan dadaŭ, što paprasiŭ ab intervju ź Zialenskim.
Na viaršyni papularnaści ŭ ZŠA Karłsan uźlacieŭ, staŭšy nadzvyčaj upłyvovaj zorkaj telekanała Fox, dzie z 2016 pa 2023 hod jon vioŭ viačerniaje palityčnaje telešou Tucker Carlson Tonight, aŭdytoryja jakoha časam pieravyšała 5 młn hledačoŭ.
Ale jaho karjera na hetym kansiervatyŭnym telekanale, jaki tradycyjna padtrymlivaje respublikancaŭ, zaviaršyłasia davoli raptoŭna.
Ranicaj 24 krasavika 2023 hoda Takier Karłsan byŭ zvolnieny z Fox News. Takoha pavarotu padziej jon vidavočna nie čakaŭ, pakolki napiaredadni paabiacaŭ hledačam vyjści ŭ hety dzień viečaram u efir.
Aficyjna pryčyna zvalnieńnia nazvanaja nie była, ale amierykanskaja presa pisała, što pryniać takoje rašeńnie kiraŭnika karparacyi Rupierta Mierdaka zaachvociŭ pazoŭ, vyłučany ŭ suviazi z repartažam Karłsana ab zachopie 6 studzienia 2021 hoda prychilnikami Donalda Trampa Kapitolija i raspaŭsiudžvańnie ŭ efiry iłžyvych śćviardžeńniaŭ Trampa ab tym, što jaho paražeńnie na vybarach 2020 hoda stała vynikam falsifikacyj.
Karłsan rasstaŭsia z Fox News praz šeść dzion paśla taho, jak karparacyja Fox, jakaja vałodaje kanałam, pahadziłasia ŭ pazasudovym paradku vypłacić 787,5 młn dalaraŭ firmie-vytvorcu mašyn i prahramnaha zabieśpiačeńnia dla hałasavańnia Dominion Voting Systems.
Hetaja firma padała na Fox Corp. u sud za toje, što, na dumku pazoŭnikaŭ, ich kanał raspaŭsiudžvaŭ paklop Trampa i jaho prychilnikaŭ, jakija śćviardžali, što vyniki prezidenckich vybaraŭ 2020 hoda sfalsifikavanyja, u tym liku z dapamohaj mašyn dla hałasavańnia.
Paśla sychodu z Fox Karłsan nabyŭ samastojnaść i naŭrad ci straciŭ u papularnaści: u sacsietcy X u jaho hihanckaja aŭdytoryja ŭdziačnych prychilnikaŭ vielmi pravych pohladaŭ i amataraŭ teoryj zmovy.
54-hadovy Takier Karłsan pa-raniejšamu padtrymlivaje Donalda Trampa, vystupaje za rezkaje skaračeńnie nielehalnaj mihracyi ŭ ZŠA, za niaŭchilnaje vykanańnie prava vałodańnia zbrojaj, skieptyčna stavicca da prablemy hłabalnych klimatyčnych źmianieńniaŭ, ruchu Black Lives Matter, hiendarnaj ideałohii i niekatorych inšych libieralnych idej.
Jon nie curajecca kanśpirałahičnych teoryj i, u pryvatnaści, zajaŭlaŭ, što va ŭrada ZŠA jość kaśmičny karabiel inšapłaniecian, paŭtaraŭ vydumki rasijskich uładaŭ ab amierykanskich łabaratoryjach pa vytvorčaści bijałahičnaj zbroi ŭ Ukrainie, śćviardžaŭ, što Kachoŭskuju HES razburyli ŭkraincy, i abvinavačvaŭ Vašynhton u datyčnaści da padryvu hazapravodaŭ «Paŭnočny patok».
Rasijskija dziaržaŭnyja ŚMI rehularna adhukajucca pra Karłsana jak pra žurnalista, jaki «havoryć praŭdu», i časta jaho cytujuć. Ahienctva miedyjaanalityki «Šmakaŭ.Miedyja» padličyła dla telehram-kanała «Aściarožna naviny», što za apošni tydzień rasijskija dziaržaŭnyja ŚMI i z-kanały zhadali Karłsana prykładna 2050 razoŭ.
Siarod viadomych palitykaŭ, u jakich jon braŭ intervju apošnim časam, — premjer-ministr Vienhryi Viktar Orban i Chaŭjer Milej, jaki staŭ novym prezidentam Arhienciny.
Takier Karłsan budzie pieršym zachodnim žurnalistam, jaki ŭziaŭ intervju ŭ Pucina paśla pačatku poŭnamaštabnaj rasijskaj ahresii suprać Ukrainy.
Čytajcie taksama:
Zvolnili z pracy amierykanskaha televiadučaha, jaki tranślavaŭ naratyvy rasijskaj prapahandy
