Brendan Kavana razmaŭlaje z kitajskaj žančynaj. Skryn videa DrKBoogieWoogie / YouTube
Brendan Kavana (Brendan Kavanagh) ci, jak jaho jašče nazyvajuć, Dr K. — sučasny brytanski pijanist, jutubier i vykładčyk ihry na fartepijana, jaki śpiecyjalizujecca na styli buhi-vuhi. Ciapier u jaho kanała ŭ jutubie zvyš 2 miljonaŭ padpisčykaŭ. Pijanist rehularna vystupaje na adkrytych placoŭkach, dzie raźmieščanyja hramadskija pijanina. Časam svaje vystupy jon tranśluje adrazu ŭ efir.
19 studzienia 2024 hoda adbyŭsia strym muzykanta, padčas jakoha jon vykonvaŭ muzyku na ahulnadastupnym pijanina łondanskaha vakzała Sent-Pankras. Vystup pačaŭsia ŭ zvyčajnaj dla muzyki maniery, ale chutka pieratvaryŭsia ŭ niešta niečakanaje.
Niepadalok ad Kavany z apierataram i jašče adnym pijanistam znachodziłasia hrupa ludziej z šaści-siami čałaviek, jakija trymali ŭ rukach čyrvonyja ściahi Kitaja, byli apranutyja ŭ čyrvonaje ci mieli na sabie čyrvonyja šaliki. Jany zdymali svajo videa i patrapili na zapis Kavany.
Kali pijanist skončyŭ ihrać, adna z žančyn padyšła i paprasiła vydalić videa. Jana śćviardžała, što ichniaja hrupa zdymała kitajskaje telešou i što ich pravy na vyjaŭleńnie siabie abaronienyja.
Kavana zapiarečyŭ, što ŭ Vialikabrytanii pravy na indyvidualnyja zdymki nie prymianiajucca ŭ hramadskich miescach, takich jak vakzał. Abmiarkoŭvajučy hetuju temu z žančynaj, jon skazaŭ: «My nie ŭ Kitai», na što jana adkazała: «Ja taksama brytanka».
Zatym jon pakazaŭ na kitajski ściah u jaje ruce i spytaŭ, čamu jana trymaje «kamunistyčny ściah». Na heta adzin z mužčyn z hrupy pačaŭ kryčać: «Nie dakranajsia da jaje!» (anhł. Don't touch her!), choć muzykant nie čapaŭ žančynu, tolki ściažok.
Usio skončyłasia ŭmiašańniem palicyi, jakaja pryhasiła kanflikt. Ale videa stała virusnym (pa stanie na 6 lutaha 2024 hoda jano było prahledžana bolš za 9,9 miljonaŭ razoŭ na aficyjnym kanale pijanista). Pra kanflikt, jaki atrymaŭ nazvu «Pijanahiejt», napisali mnohija bujnyja anhłamoŭnyja vydańni pa ŭsim śviecie.
Brendan daŭ niekalki intervju roznym kanałam, zajaviŭšy, što vystupaje za svabodu samavyjaŭleńnia i rasceńvaje toje, što zdaryłasia, jak sprobu raspaŭsiudžvańnia kitajskaj cenzury na terytoryju Vialikabrytanii.
Jak paźniej akazałasia, asnoŭnymi ŭdzielnikami kanfliktu byli zusim nie turysty, jak pieršapačatkova pisałasia ŭ presie, a ludzi, jakija krucilisia ŭ vysokich kołach Vialikabrytanii — u tym liku palityčnych. Usie jany byli blizkija da Kamunistyčnaj partyi Kitaja. A adnu ź siabrovak hrupy — Kryścin Li — brytanskija śpiecsłužby jašče ŭ lipieni 2022 hoda pryznali «ahientkaj upłyvu».
Skrynšot paviedamleńnia brytanskaj sakretnaj słužby MI5. Pavodle: lindependant.fr
Bolšaść kamientataraŭ nie tolki na jutubie, ale navat u kitajskaj sacyjalnaj sietcy Weibo, padtrymali pazicyju pijanista. 27 studzienia Brendan vypuściŭ novaje videa z taho ž miesca na vakzale Sent-Pankras.
U hetym videa jon jašče raz vystupiŭ z asudžeńniem cenzury, u jakaści ž simvała vybraŭ Vini-Pucha, vyjavy jakoha zabaronienyja ŭ Kitai, a taksama nalepku «8964» z adsyłkaj na zadušeńnie pratestu na płoščy Ciańańmeń 4 červienia 1989 hoda. Hety vystup muzykanta zdymali dziasiatki žurnalistaŭ i błohieraŭ, a samo videa na jaho aficyjnym kanale za sutki nabrała 1,3 miljona prahladaŭ.
Brendan Kavana hraje na pijanina. Pobač — cacka Vini-Puch. Skryn videa DrKBoogieWoogie / YouTube
Padčas vystupu Kavana raskazaŭ, što paśla zahruzki videa jon atrymaŭ elektronnyja listy z pahrozami śmierci, i jamu daviałosia dva dni žyć u furhonie za horadam. Ale ciapier, pavodle jaho słoŭ, jon bolš nie baicca i znoŭ adčuvaje siabie kamfortna.
Paźniej na adras administracyi jutuba byli nakiravanyja skarhi z patrabavańniem vydalić videa.
Brendan Kavana trymaje ściah Tajvania. Fota: staronka muzykanta ŭ fejsbuku
Adnak rolik zastajecca bieź źmien. A 5 lutaha brytanski pijanist sfatahrafavaŭsia kala taho ž pijanina sa ściaham Tajvania i apublikavaŭ fota na svajoj staroncy ŭ fejsbuku. Tam ža jon raźmiaściŭ videa «Urok tajvanskaj movy», u jakim pakazvaje, jak vučycca havaryć pa-tajvańsku «Napierad, Tajvań!»
Čytajcie jašče:
Kitaj prysudziŭ aŭstralijskaha piśmieńnika da śmiarotnaha pakarańnia
Skrynia Pandory. Jak Tajvań moža zładzić apakalipsis u Kitai?
U Francyi ŭpieršyniu stryt-artyst dabiŭsia vypłaty jamu hihanckaha hanararu za repradukcyju
