Učastak palicyi ŭ horadzie Najembiaran. Fota: sacsietki
Historyju zatrymańnia biełarusa Jarasłava Novikava raspavioŭ aktyvist Leanid Sasnoŭski ŭ tvitary. Jon paviedamiŭ, što Novikaŭ da apošniaha času žyŭ u Hruzii — pry hetym u rodnaj Biełarusi na jaho zaviedziena kryminalnaja sprava za ŭchileńnie ad abaviazkovaj vajskovaj słužby.
2 lutaha Jarasłaŭ pavinien byŭ pierajechać na čas u Armieniju. Adnak na armianskim baku jaho zatrymała pryhraničnaja słužba miascovaj palicyi — vyśvietliłasia, što Minsk abjaviŭ mužčynu ŭ miždziaržaŭny kryminalny vyšuk SND.
Ananimny pradstaŭnik Novikava padzialiŭsia z «Voś Tak», što Jarasłaŭ źbiraŭsia z Hruzii zjechać žyć i pracavać u Bałharyju, ale nie atrymaŭ u Tbilisi vizu. Tady bałharskaje pradstaŭnictva paraiła maładomu čałavieku viarnucca ŭ Biełaruś i pasprabavać znoŭ užo adtul. Z-za ryzyk, ź jakimi mužčyna moh sutyknucca na radzimie, jamu pryjšłosia adpravicca ŭ Armieniju, dzie jon płanavaŭ paŭtorna padacca na vizu.
Aktyvist Leanid Sasnoŭski dapamoh zatrymanamu znajści pravaabaroncu ŭ Armienii — jurysta Chielsinkskaj asacyjacyi ŭ Armienii Araika Papikiana. Novikavu dali mahčymaść pabačycca ź jurystam, a taksama patelefanavać svajakam. U razmovie z «Voś Tak» advakat paviedamiŭ, što ŭmovy ŭtrymańnia Jarasłava narmalnyja, «ich tam kormiać», ale jon kupiŭ zatrymanamu dadatkova ježy.
U prymiežnym punkcie palicyi horada Najembiaran na biełarusa skłali pratakoł i źmiaścili ŭ pastarunak, dzie jon znachodzicca da hetaha času. Telefon u mužčyny zabrali. Ananimny pradstaŭnik Novikava ŭ hutarcy z «Voś Tak» paviedamiŭ, što termin zatrymańnia byŭ praciahnuty da 72 hadzin z-za «marudlivaści biurakratyčnaj mašyny».
Biełaruski bok adpraviŭ u Armieniju zaklučeńni śledčaha i prakurora ab uzbudžeńni kryminalnaj spravy na Jarasłava, a taksama ab jaho vyšuku.
Advakat Papikian raspavioŭ, što 3 lutaha pa spravie Novikava byŭ pryznačany prakuror, ź jakim jon užo parazmaŭlaŭ i patłumačyŭ: zatrymańnie pa zakanadaŭstvie Armienii «niepravamierna». Tamu mužčyna pavinien być vyzvaleny. Adnak prakuror admoviŭ biełarusu ŭ dasudovym vyzvaleńni.
4 lutaha ŭ 12:00 (pavodle Jerevana) adbudziecca sud nad zatrymanym, jaki vyrašyć — vykonvać patrabavańni Minska pa ekstradycyi ŭchilista na radzimu ci nie. Papikian «amal upeŭnieny», što zapyt budzie adchileny i małady čałaviek vyjdzie na volu. U palicyi, śćviardžaje juryst, Novikavu skazali, što vypuściać jaho paśla suda.
Čytajcie taksama:
U indyjskim aeraporcie zhubili polski humanitarny DNŽ biełaruski. Što rabić u takim vypadku?
