Pa źviestkach «Rabočaha ruchu», paśla incydentu na BAMie na «Naftanie» zvolnili ad 30 da 60 čałaviek. Ilustracyjnaje fota: «Naftan»
Naftan. Paśla vybuchu na BAMie zvolnili dziasiatki čałaviek
Pradstaŭnik «Rabočaha ruchu», znajomy ź situacyjaj na «Naftanie», raspavioŭ «Našaj Nivie», što zvalnieńni niazhodnych na pradpryjemstvie praciahvajucca.
Ź jaho słoŭ, paśla vybuchu na BAMie (u kancy listapada 2023 hoda, tady za dyviersiju zatrymali byłoha supracoŭnika «Naftana») adbyłasia čarhovaja chvala represij.
«Tady vielmi šmat čałaviek byli dapytanyja, častka atrymała sutki abo štrafy. Tyja, chto atrymaŭ pakarańnie, paźniej byli zvolnieny. Pa našych danych, paśla incydentu na BAMie na «Naftanie» zvolnili ad 30 da 60 čałaviek.
Aproč tych, chto traplaje na sutki abo atrymlivaje štraf pa palityčnych artykułach, z pradpryjemstva «prosiać» zvolnicca tych, chto nie prajšoŭ adbor paśla hutarak na ideałahičnuju prydatnaść sa słužbaj biaśpieki», — kaža surazmoŭca.
Padobnyja dziejańni z boku kiraŭnictva pryvodziać da deficytu kadraŭ. Sa słoŭ surazmoŭcy, vyrašyć prablemu niedachopu kadraŭ nie atrymlivajecca navat z ulikam taho, što zarobki na «Naftanie» znachodziacca na prymalnym uzroŭni.
Usio praz toje, što pa ideałahičnych matyvach adsiejvajuć da 90% patencyjnych kandydataŭ.
BČ — napičkana siłavikami
Palityčna matyvavanyja zvalnieńni i pahłyblenyja pravierki patencyjnych kandydataŭ na pracu adbyvajucca i ŭ padraździaleńniach Biełaruskaj čyhunki.
Siłaviki pracujuć na čyhuncy ŭ jakaści namieśnikaŭ načalnikaŭ adździaleńniaŭ. Ilustracyjnaje fota: «Naša Niva»
Pa źviestkach supolnaści čyhunačnikaŭ Biełarusi, kiraŭnictva BČ našpihavana vychadcami z KDB, MUS i prakuratury. Padobnyja štatnyja pamočniki jość va ŭsich adździaleńniach BČ. Pracujuć jany ŭ jakaści namieśnikaŭ načalnikaŭ adździaleńniaŭ.
Z hetych pryčyn supracoŭnikam čyhunki davodzicca rehularna sutykacca ź ideałahičnaj apracoŭkaj i zvalnieńniem niełajalnych režymu. Pry pryjomie na pracu kandydaty taksama prachodziać pilny kantrol pa linii siłavikoŭ.
Represii ŭ sistemie adukacyi
Palityčna matyvavanyja zvalnieńni praciahvajucca i ŭ biełaruskich VNU.
Pra chvalu čystak u BDU kazała i byłaja vykładčyca kafiedry mižnarodnych adnosin, kandydat histaryčnych navuk, palitołah Roza Turarbiekava. Jana źviazvała heta z parłamienckimi vybarami, bo padobnyja pracesy naziralisia pierad kanstytucyjnym refierendumam 2022 hoda.
U BDU zvalnieńni za palityku kuryruje prarektar pa biaśpiecy. Ilustracyjnaje fota: «Naša Niva»
Ź jaje słoŭ, śviežyja śpisy va ŭniviersitet pryjšli naprykancy minułaha hoda. U ich kandydaty na zvalnieńnie i panižeńnie. Niekatorych čakaje tolki vyklik na prafiłaktyčnyja hutarki. Pa słovach Turarbiekavaj, jak praviła, hetyja pracesy kuryruje aficer KDB, jon ža prarektar pa biaśpiecy.
Palitołah miarkuje, što heta nie apošniaja chvala represij navat z ulikam taho, što samych aktyŭnych daŭno zvolnili. Jana ličyć, što da prezidenckich vybaraŭ 2025 hoda «budzie praviedziena samaja, napeŭna, vialikaja kampanija pavodle taho ž scenaryja».
Pavodle infarmacyi Turarbiekavaj, da vosieni 2023 hoda tolki z BDU było zvolniena kala 100 dacentaŭ i prafiesaraŭ.
Jak raskazvali «Našaj Nivie», tolki na histfaku BDU naprykancy minuła hoda zvolnili dvuch vykładčykaŭ.
Zvalnieńni adbyvajucca nie tolki ŭ staličnych VNU. U apošnija dni 2023 hoda z HrDU im. Janki Kupały zvolnili Śviatłanu Marozavu, doktarku histaryčnych navuk i prafiesarku kafiedry historyi Biełarusi.
Zatrymańni — navat u chołdynhu «SB. Biełaruś siehodnia»
Niadaŭna stała viadoma, što ŭ Minsku adbylisia masavyja zatrymańni architektaraŭ. Padčas abłavy było zatrymana kala 40 čałaviek. Minimum čatyry ź ich ciapier u SIZA.
Zatrymlivali taksama adrazu čatyroch supracoŭnikaŭ pradstaŭnictva LG u Biełarusi.
Machavik represij zakranaje i tych, chto pa łohicy musiŭ być pa inšy bok barykad. Tak, zatrymlivali dvuch supracoŭnikaŭ «Alfa Radyjo», jakoje ŭ svaju čarhu ŭvachodzić u chołdynh «SB. Biełaruś siehodnia».
Čytajcie taksama:
«Prapanujem 2000-2500 rubloŭ na ruki — zakryć vakansii niama kim». Biznes nie moža znajści rabotnikaŭ
Pucin hanarycca, što ekanomika Rasii stała pieršaj u Jeŭropie. Ale ci tak heta?
