Fota: Onliner.by
U redakcyju źviarnułasia Hanna razam ź inšymi ŭdzielnikami tura. Novy hod u ich prajšoŭ nietypova: 31 śniežnia hrupa praviała na ekskursii.
— Maja siabroŭka raniej jeździła z hetaj kampanijaj, i na pracy ja čuła pra jaje dobryja vodhuki. Tamu z turapierataram u pajezdku vyznačylisia chutka.
Kaštavała pajezdka 140 dalaraŭ u ekvivalencie i 100 rubloŭ za turystyčnuju pasłuhu.
— Da pajezdki ja telefanavała — udakładniała pra aŭtobus, ci budzie jon kamfortny. Mnie skazali, što tak. Adnak Setra — marka aŭtobusa — adnaznačna nie padychodziła pad pajezdku: ni pa kamforcie, ni pa tempieraturnym režymie.
Fota: Onliner.by
Ja siadzieła kala akna, i pajezdka nazad była vielmi ciažkaj. Jechała ŭ dźviuch šapkach, abkručanaja šalikam, u kurtcy — z voknaŭ dźmuła tak, što ja bajałasia prastudzić hałavu. Udakładniła ŭ arhanizatara, ci možna niešta zrabić. Adkaz byŭ: aŭtobus nie spraŭlajecca z tempieraturnym režymam.
Pierasadzić mianie ŭžo nie było mahčymaści, bo pierasadzili inšych. Dziakuj bohu, ja była ź ciopłymi rečami. A kali b nie, navat nie ŭjaŭlaju … lažała b ciapier z tempieraturaj, jak mnohija.
Hanna miarkuje, što aŭtobus zamianili prosta pierad pajezdkaj. Bo papiaredniaje rassadžvańnie nie supadała z aktualnym. A miescy dziaŭčyna ź siabroŭkaj dla siabie śpiecyjalna zabraniravali zahadzia.
Pa słovach turystki, paśla takoj pajezdki 15 čałaviek źlehli z tempieraturaj. Heta choć i hałoŭnaja pretenzija da arhanizataraŭ, ale daloka nie adzinaja. Jašče adna prablema — chałodny hatel: «z voknaŭ dźmuła prosta ŭ tvar. Ratavała tolki toje, što byli ščylnyja štory, jakija zmahli pierakryć chałodnaje pavietra».
Nie spadabałasia turystam i navahodniaja prahrama ŭ kafe: ni absłuhoŭvańnie, ni ježa, ni zabavy. Ale bolš za ŭsio — što nie spracavaŭ abiacany depazit na napoi. Na ekskursiju ŭ Kareliju zachacieli adpravicca nie ŭsie: ale tym, chto vyrašyŭ zastacca, pryjšłosia «zmahacca» za vysialeńnie a 12-j, a nie a 8-j ranicy.
Byli pretenzii i da častki padarožža pa Karelii: u hałoŭny punkt maršrutu pryjechali, kali ŭžo ściamnieła. Hannu źniervavała i miesca zboru hrupy dla viartańnia dadomu: na ŭskrainie horada, u hadzinie chady ad mietro. U dziaŭčyny źjaviŭsia vielizarny pieralik i bolš drobnych pretenzij. Ale asnoŭnaja — choład i jaho nastupstvy.
Nadvorje sapraŭdy na dni pajezdki vypała maroznaje. Kali hrupa viartałasia ŭ Minsk, za aknom było -30.
— Paśla pajezdki nam prapanavali zapoŭnić ankietu zvarotnaj suviazi, ja pakinuła svoj numar dla suviazi z kiraŭnictvam. Mnie pieratelefanavaŭ kiraŭnik i skazaŭ, što pasłuhi byli akazanyja ŭ poŭnym abjomie. Nichto nie aburaŭsia padčas pajezdki — usio ŭsich zadavalniała. Treba było supravadžalniku paviedamić — pamianiali b i hatel, i aŭtobus.
Adkaz turfirmy: «Ź jakim nastrojem turyst siadzie ŭ aŭtobus — z takim i źjedzie»
Z kiraŭnikom turfirmy EuroTrip, jakaja arhanizavała pajezdku, źviazalisia žurnalisty.
— U adzin z turaŭ siem čałaviek z 40 nie pryjšli na pasadku — zachvareli. Supracoŭniki ŭ ofisie chvarejuć. Niejkaja niezrazumiełaja epidemija. Padčas pajezdki ŭ Pieciarburh na vulicy było -20. Možacie pahladzieć na fota: mnohija chadzili biez šapak, statui abdymali… i vyhladali, darečy, vielmi ščaślivymi. Nielha ž vinavacić turfirmu ŭ tym, što jany zachvareli.
Ja nie nastojvaju, što z aŭtobusam było ŭsio ŭ paradku. Heta technika, pravilna? Usie detali techničnaha stanu treba vyśviatlać u pieravozčyka. Ale tempieraturny režym, jaki byŭ pa šlachu ŭ Kareliju — minus 30, źjaŭlajecca fors-mažoram, ekstremalnymi ŭmovami nadvorja. Ja viedaju, što byli turystyčnyja aŭtobusy, jakija naohuł nie zavialisia. Voś tam turysty namierźlisia. Naš pieravozčyk zrabiŭ usio, što ŭ jaho siłach: kiroŭcy nie hłušyli ŭsiu noč aŭtobus, kab usio było dobra.
Nam padčas tura naohuł nie pastupała skarhaŭ ni ad kiraŭnikoŭ hrupy, ni ad samoj hrupy. Choć va ŭsich jość pramy kantakt. Kali b aŭtobus byŭ sapraŭdy ŭ takim stanie, jak apisvajuć turysty, my b dakładna pamianiali transpartny srodak.
My pracujem užo dziesiać hadoŭ i pracujem zaŭsiody na reputacyju. Toje ž tyčycca i prablem z numaram u hateli.
Akramia taho, pa našaj infarmacyi, turysty hrebavali praviłami ab raśpivańni śpirtnych napojaŭ u darozie. I adpaviedna, heta paŭpłyvała na ich imunitet i termarehulacyju.
Kiraŭnik turfirmy zhadžajecca tolki z tym, što niedapracavaŭ čałaviek, jaki supravadžaŭ. Na jaho dumku, treba było abmierkavać z hrupaj usie prablemy, źviarnuć uvahu na kanfliktnyja situacyi.
— Tak, było choładna. Ale my nie možam mianiać tempieraturu ŭ haradach. U nas u tyja ž daty jašče dva aŭtobusy vyjazdžali: usie viarnulisia zadavolenyja. Ź jakim nastrojem turyst siadzie ŭ aŭtobus — z takim i źjedzie. A tam pretenzii pačalisia prosta z pasadki — da ŭsiaho vakoł.
Ja nie spračajusia, što mahło padduvać kamuści. Ale kali b heta była surjoznaja pałomka, jakaja nie davała b aŭtobusu mahčymaści jechać, to my b, viadoma ž, vypravili heta. U dadzienym kankretnym vypadku spracavaŭ niejki efiekt masy, a pa fakcie ničoha nie adbyłosia. Usio było pa damovie, pa prahramie, navat nidzie spaźnieńniaŭ nie było.
Jašče adzin punkt, jaki pradstaŭnik turfirmy hatovy abmierkavać z turystami, — niavykarystany depazit. Usich niezadavolenych zaprašaje ŭ ofis pa kampiensacyju 500 rasiejskich rubloŭ (blizu 18 biełaruskich rubloŭ).
Kanflikt pa-raniejšamu nie vyrašany. Hanna patrabuje viarnuć pałovu koštu tura, pradstaŭniki turfirmy admaŭlajuć, bo ŭsie pasłuhi byli akazany ŭ poŭnym abjomie.
Kamientar jurysta: «Źmienšyć košt u dva razy nierealistyčna»
Dapamahła razabracca ŭ pytańni juryst Palina Aviarjanava:
— Situacyja składanaja, bo nikim nie było zafiksavana, jakaja tam była tempieratura. Ale jak heta možna było zrabić? Tolki kali ŭ kahości b byŭ z saboj hraduśnik. Toje ž samaje tyčycca i tempieratury ŭ hateli. Sud budzie patrabavać dokazaŭ. A subjektyŭnaj frazy «chałodna « budzie niedastatkova. Navat kali pra heta skažuć niekalki čałaviek. Usio zaležyć ad taho, jak da spravy pastavicca sudździa. Ja b uziała takich ludziej, ale pry ŭmovie, što pradumana stratehija dakazvańnia.
Što tyčycca źmianšeńnia sumy ŭ dva razy, to heta nierealistyčna. Možna zajaŭlać patrabavańnie ab suraźmiernym pamianšeńni koštu tura. Ale heta treba abhruntavać — koštam papaŭnieńnia niedachopaŭ akazanaj pasłuhi. U vypadku ź nizkaj tempieraturaj zrabić heta niemahčyma. Naprykład, byŭ vypadak, kali turysty pryjechali ŭ hatel z akvaparkam, a toj byŭ začynieny na ramont. Tady my šukali hatel anałahičnaha ŭzroŭniu biez akvaparku i vyličvali roźnicu koštu puciovak. Jaje i viartała turfirma.
Adziny momant, jaki ja baču: Možna spahnać maralnuju škodu za parušeńnie pravoŭ spažyŭca na jakaść akazanaj pasłuhi. Ale znoŭ ža — treba dakazać jaje niajakasnaść.
Jašče možna zapatrabavać skasavańnia damovy. Bo niedachopy pasłuhi ŭžo niemahčyma likvidavać z-za jaje charaktaru. Ale niedachopy pavinny być pryznanyja istotnymi, tady možna patrabavać i viartańnia ŭsich vypłačanych srodkaŭ, i kampiensacyi maralnaj škody. Paŭtaru čarhovy raz: pytańnie tolki ŭ dakazvańni ŭ sudzie.
Vysnova karotkaja: kali ŭ turystyčnaj pajezdcy ŭźnikajuć sprečnyja momanty, usio treba fiksavać na fota, a jašče lepš — na videa.
Čytajcie taksama:
Sinoptyki paabiacali ŭzmacnieńnie marazoŭ
Škarpetki na batarejkach i nie tolki. Hadžety, jakija dapamohuć sahrecca ŭ lutyja marazy
Što rabić u vypadku pieraachaładžeńnia? Parady ad ratavalnikaŭ
