Kaho pastaviać śpikieram Pałaty pradstaŭnikoŭ zamiest śpisanaha Andrejčanki? 4

Fota: house.gov.by

Uładzimir Andrejčanka zajmaŭ pasadu ažno z 2008-ha, ale narešcie nadyšoŭ čas i jamu iści na piensiju. U śpisach kandydataŭ Andrejčanki ŭžo nie budzie. Chto ž, na našu dumku, budzie pretendavać na miesca ŭ topie-5 samych vysokich pasadaŭ Biełarusi?

Uładzimir Andrejčanka ŭ časie naviedvańnia Biahomlskaj škoły-internata Dokšyckaha rajona. 22 śniežnia 2023 hoda. Fota: house.gov.by

Michaił Orda

Na našu dumku, absalutny favaryt. U Ordu sumiaščajecca adrazu niekalki važnych kryteraŭ.

Michaił Orda vyhladaje absalutnym favarytam na pasadu staršyni Pałaty pradstaŭnikoŭ. Fota: «Naša Niva»

Pa-pieršaje, absalutnaja addanaść. Jon znachodzicca niedzie niepadaloku ad Łukašenki ad pačatku 2000-ch, spačatku jak kiraŭnik padkantrolnaha BRSM, paśla jak staršynia biazzubych prafsajuzaŭ. I ni razu nie daŭ usumnicca ŭ svajoj viernaści. U 2020-m mienavita Ordu davieryli kiravać pieradvybarčaj hrupaj Łukašenki. Praŭda, vybarčaja kampanija, jak pakazała historyja, była pravalnaj.

I ŭ hetym, jak ni paradaksalna, druhaja pieravaha Ordy. Jon hadami prajaŭlaŭ siabie jak šeraha vykanaŭcu, niazdatnaha na jakasny skačok. Dla Łukašenki stratehična vyhadna trymać na top-pasadach mienavita takich ludziej. Navat kali b jany ź niejkich pryčyn pasprabavali kinuć vyklik sistemie, u ich naŭrad ci b niešta atrymałasia.

Treci arhumient za Ordu — jaho ŭzrost. Dla biełaruskaj palityki 57 hadoŭ — heta nie małady i pierśpiektyŭny, a toj, chto ŭžo viartajecca z kirmašu. Prykładna ŭ takim ža ŭzroście zastupaŭ na pasadu i Andrejčanka. 

Fonava možna zhadać jašče i pra vopyt pracy ŭ Pałacie pradstaŭnikoŭ — Michaił Orda zasiadaŭ tam ažno try sklikańni, z 2000 da 2012.

Aleh Ramanaŭ

Kali «Biełaja Ruś» budzie mieć absalutnuju bolšaść u parłamiencie, to nie było b dzivam, kab jaje staršynia staŭ śpikieram. Ale dla Łukašenki hety varyjant moža padasca zanadta ryzykoŭnym.

Aleh Ramanaŭ. Fota: Rada Fiederacyi RF

Byłoha rektara Połackaha dziaržaŭnaha ŭniviersiteta Aleha Ramanava paklikali ŭ vialikuju palityku tolki pazaletaś. Kiravać partyjaj čynoŭnikaŭ — važnaja misija, na jakoj možna zarabić palityčny kapitał na budučyniu. I na hetuju pasadu, anałahaŭ jakoj raniej nie było, aściarožna pastavili Ramanava — čałaviek z rehijonaŭ, jaki nikoli raniej nie pracavaŭ u Minsku, dyj uvohule kruciŭsia va ŭniviersiteckich kołach, a nie siarod siłavikoŭ.

Pasada śpikiera parłamienta adkryła b pierad Ramanavym jašče bolšyja pierśpiektyvy — napeŭna, zavialikija dla łukašenkaŭskaj sistemy.

Iryna Kaścievič

U biełaruskim parłamiencie niefarmalna isnujuć žanočyja kvoty. Viadoma, u zakonie hetaha nie prapisana, ale kali Administracyja prezidenta padbiraje kandydataŭ u deputaty pad budučaje pryznačeńnie, dola žančyn padbirajecca trochi bolšaja za tracinu. Ciapier jana 35% — nie soramna pakazać u cyvilizavanym śviecie.

Iryna Kaścievič. Fota: beloi.by

Ministarka pracy i sacyjalnaj abarony Iryna Kaścievič — dobry varyjant dla śpikierstva na vypadak, kali Łukašenka vyrašyć adpravić u adstaŭku Natallu Kačanavu. Taja adnačasova zajmaje pasady śpikiera Savieta Respubliki i pamočnicy pa Minsku, i časam składvajecca ŭražańnie, što jaje ŭ hramadskaj prastory zašmat. Kačanava stała publičnym palitykam № 2 u łukašenkaŭskaj sistemie, i heta niasie ryzyki dla jaje samoj.

Kaścievič 56 hadoŭ, jana pieradpiensijnaha vieku. Novych palityčnych ambicyj u jaje nie pavinna ŭźniknuć, a zachavać bieskanfliktnuju atmaśfieru parłamienta časoŭ Andrejčanki joj udasca na vydatna.

Valer Małaška

Małaška byŭ niedarečnym papiarednikam Kaścievič u ministerstvie pracy. Niedarečnym — bo jaho pratrymali na pasadzie mienš za paŭtara miesiaca, a paśla pieraviali ŭ ministry zdaroŭja. U Minsk Małaška viartajecca z Mahilova, dzie apošnija hady pracavaŭ vice-hubiernataram.

Valer Małaška. Skryn videa: MogilevNews / YouTube

Jon dobra znaje praviły hulni dla čynoŭnikaŭ na roznych etapach, maje jakija-nijakija namienkłaturnyja suviazi, ale nikoli nie zabiraŭsia tak vysoka, kab adtul zachaciełasia skočyć jašče vyšej. Čym nie śpikier?

Darečy, Valeryj Małaška bałatujecca pa łukašenkaŭskaj Škłoŭskaj akruzie.

Dźmitryj Šaŭcoŭ

Adna z samych niezvyčajnych patencyjnych fihur — hienieralny sakratar Čyrvonaha Kryža Dźmitryj Šaŭcoŭ. Jon užo byŭ deputatam u 2012-2019 hadach, a ciapier znoŭ viartajecca ŭ parłamient.

Dźmitryj Šaŭcoŭ. Fota: BiełaPAN

Šaŭcoŭ davoli charyzmatyčny, što kapitalna bje pa jaho pierśpiektyvach. Ale jość i «pieravaha» — absalutnaja taksičnaść. Miedyk uklučany, padajecca, va ŭsie mahčymyja sankcyjnyja śpisy za svaje pajezdki ŭ «DNR» z šaŭronam Z. Ukraina navat zaklikała Mižnarodny kryminalny sud vydać ordar na aryšt Šaŭcova.

Ujavić, što taki čałaviek zajmieŭ by niejkuju padtrymku z boku niezaležnaha hramadstva, niemahčyma. Zatoje pryznačeńnie Šaŭcova było b revieransam u bok Rasii. 

Chto dakładna nie budzie śpikieram?

U niejkaj inšaj realnaści šancy atrymać pasadu śpikiera mieli b krykuny nakštałt Aleha Hajdukieviča abo kamunista Siarhieja Kliševiča — jakija jak minimum hučniej za ŭsio pryznajucca ŭ lubovi Łukašenku. Ale ŭ ich jość vidavočnyja palityčnyja ambicyi, i heta hulaje suprać ich.

Čytajcie jašče:

Pačyściŭ univiersitet, adpraŭlaŭ pieravychoŭvacca na parad. Chto taki Aleh Ramanaŭ, novy kiraŭnik «Biełaj Rusi»

Kiraŭnik Biełaruskaha Čyrvonaha Kryža Šaŭcoŭ praciahnie pracu, niahledziačy na parušeńnie normaŭ Mižnarodnaj fiederacyi 

Ministarka pracy Iryna Kaścievič idzie ŭ deputaty

6

8

2

3

6

13

Nashaniva.com