Šmat kamu znajomaja situacyja, kali paśla sytnaha abiedu ci viačery arhanizm prosić čaho-niebudź sałodkaha. Jak tłumačać dyjetołahi, u hetaha moža być niekalki pryčyn.
Niezbałansavanaje charčavańnie moža być pryčynaj, čamu vam chočacca sałodkaha
Mahčyma, vaš abied niedastatkova kałaryjny. Tamu arhanizm i patrabuje desiertu.
Jak adznačajuć dyjetołahi, arhanizm atrymlivaje enierhiju ad troch asnoŭnych makranutryjentaŭ — białkoŭ, tłuščaŭ i vuhlavodaŭ, a taksama (u mienšaj stupieni) ad charčovych vałoknaŭ.
Ale akramia kałoryj nieabchodna, kab arhanizm atrymaŭ usie nieabchodnyja inhredyjenty, jakija zabiaśpiečać nieabchodny čas dla prachodžańnia ježy praz stravavalna-kišačny trakt i stymulujuć vypracoŭku harmonaŭ, adkaznych za pačućcio sytaści. Tamu važnaje paŭnavartasnaje charčavańnie, jakoje ŭtrymlivaje białki, tłušč, klatčatku i tak zvanyja składanyja vuhlavody.
Białku šmat u miasie, rybie, jajkach, babovych. Tłušču — u alei, sale, maśle, tłustych miasie i rybie dy avakada. Na składanyja vuhlavody bahatyja chleb, krupy, makarona, bulba.
Klatčatka robić praces zasvajeńnia hlukozy bolš praciahłym, a składanyja vuhlavody — bolš raŭnamiernym. Tłušč zapavolvaje pieramiaščeńnie ježy ŭ straŭnikava-kišačnym trakcie, a białok stymuluje arhanizm vypracoŭvać harmon sytaści. Kali charčavańnie zbałansavanaje, to arhanizm nie budzie prasić sałodkaha.
Kali ž vy, naprykład, z zadavalnieńniem pajeli sasisak z kietčupam, to ŭ takoj ježy šukać krynicu składanych vuhlavodaŭ nie varta. U vyniku adładžany miechanizm «pieratraŭlivańnia i zasvajeńnia» pačnie razładžvacca.
Niedachop składanych vuhlavodaŭ aznačaje, što arhanizm nie atrymaŭ hlukozy — asnoŭnaj krynicy enierhii, i budzie pasyłać sihnały ab chutčejšym zadavalnieńni svajoj patreby. Słodyčy, jak viadoma, zjaŭlajucca krynicaj hlukozy, jakaja chutka zasvojvajecca.
Tamu, rajać dyjetołahi, kali vam zachaciełasia sałodkaha paśla sytnaha abiedu, abaviazkova praviercie, nakolki zbałansavanym jon byŭ. I ŭ nastupny raz pastarajciesia dapoŭnić jaho adpaviednym čynam.
Parušeńnie abmienu rečyvaŭ moža być pryčynaj pačućcia hoładu
Kali praha vašaha arhanizmu da sałodkaha nie prapadaje navat paśla zbałansavanaha charčavańnia, to ŭ takim razie śpiecyjalisty rajać źviarnucca da doktara i zdać nieabchodnyja analizy.
Žadańnie sałodkaha moža być sihnałam taho, što vaša cieła nie funkcyjanuje naležnym čynam, u pryvatnaści, što ŭ vas jość prablemy z pravilnym rehulavańniem uzroŭniu hlukozy, jakaja prysutničaje ŭ arhaniźmie paśla ježy.
Da zachvorvańniaŭ, jakija vyklikajuć niekantralavanuju ciahu da sałodkaha, adnosiacca: rezistentnaść da insulinu, reaktyŭnaja hipahlikiemija, cukrovy dyjabiet i pieraddyjabiet. Tamu ŭ takich situacyjach varta zdać adpaviednyja analizy.
Pastajannaja ciaha da sałodkaha taksama moža być prykmietaj taho, što vašamu arhanizmu nie chapaje pažyŭnych rečyvaŭ — u pryvatnaści, žaleza, mahniju abo vitaminaŭ hrupy V. Heta pryvodzić da stomlenaści i prablem ź pieraŭtvareńniem makraelemientaŭ u enierhiju. I ŭ hetym vypadku arhanizm znoŭ budzie imknucca zabiaśpiečyć siabie chutkadastupnaj enierhijaj, jakuju zabiaśpiečvajuć słodyčy.
Jakoje moža być u hetym vypadku rašeńnie? Dyjetołahi rajać dapoŭnić svoj racyjon celnaziernievymi praduktami (krupy, chleb hrubaha pamołu, karyčnievy rys, celnaziernievaja makarona), arechami, kakavaj i babovymi.
Sałodkaje — važnaja krynica dobrych emocyj
Zdarajecca, što praha sałodkaha ŭ nas źviazana z peŭnymi emocyjami. Mahčyma, u dziacinstvie baćki abiacali nam lubimy desiert u jakaści ŭznaharody za całkam zjedzieny abied. A moža, z cukierkami ŭ nas źviazanyja ŭspaminy pra niejkija pryjemnyja vypadki. U vyniku naš mozh pravodzić pramuju asacyjacyju pamiž sałodkim i zadavalnieńniem.
Ale, jak śćviardžajuć śpiecyjalisty, akramia asacyjacyi prysmakaŭ z uznaharodaj i dobrymi emocyjami, žadańnie sałodkaha źviazana jašče i z našym dalokim minułym. Jak viadoma, u našych prodkaŭ sałodkija sadavina i miod byli biaśpiečnaj i kałaryjnaj krynicaj ježy. Takim čynam, sihnały mozhu na pošuk sałodkaj ježy — vynik jaho evalucyjnaj adaptacyi.
Tamu ničoha dziŭnaha ŭ tym, što my paśla «salonaj» ježy ciahniemsia da sałodkaha. Karani hetaj ciahi zdaŭna hłyboka praraśli ŭ naš mozh i ciažka z hetym zmahacca. Ale «ciažka» nie aznačaje «niemahčyma». Praca nad źmienaj zvyčak patrabuje ciarpieńnia i času.
Śpiecyjalisty taksama rajać nie stvarać z žadańnia sałodkaha paśla abiedu vialikaj prablemy. Možna znajści prostaje rašeńnie, uklučyŭšy desiert u svoj racyjon u jakaści dadatkovaha pryjomu ježy, naprykład, jak padviačorak.
Čytajcie jašče:
Voś što važna dla zachavańnia zdaroŭja vašych zuboŭ
Błohier z entuzijazmam pakazaŭ, jak charčavacca za 9 rubloŭ na dzień
«Niejmavierny śviet novych smakaŭ». Viehanka raskazała, jak pierachodziła na raślinnuju ježu
