Hienieralny sakratar Rady biaśpieki Alaksandr Valfovič 25 śniežnia adkryŭ u Navapołacku pamiatny znak u honar zahinułych desantnikaŭ i členaŭ ekipaža Ił-76, jaki 44 hady tamu raźbiŭsia pad Kabułam u druhi dzień Saviecka-Afhanskaj vajny. Siarod 67 zahinułych było šmat biełarusaŭ.
Pa słovach Valfoviča, voiny-internacyjanalisty, jakija zahinuli ŭ Afhanistanie, zmahalisia i sprabavali zadušyć ekstremizm i teraryzm, zrabić afhanski narod bolš ščaślivym, a žyćcio ŭ Afhanistanie bolš biaśpiečnym, nie ličačysia sa svaim žyćciom.
«Siońnia, na žal, hieapalityčnaja abstanoŭka ŭ śviecie nie stała praściejšaj, napeŭna, stała jašče bolš składanaj. Ekstremizm i teraryzm taksama ŭźniali hałavu i taksama ŭ roznych kutkach śvietu raźviazvajuć vojny i kanflikty. Siońnia šmat u čym suprać našaj krainy raźviazana hibrydnaja vajna, taksama sprabujuć ekstremisty, terarysty (ekstremistami i terarystami ŭłady Biełarusi nazyvajuć svaich palityčnych praciŭnikaŭ — NN) destabilizavać abstanoŭku na terytoryi našaj krainy, pierakreślić našu histaryčnuju pamiać, falsifikavać padziei Vialikaj Ajčynnaj vajny, vajny ŭ Afhanistanie, ale našu pamiać nie pierakreślić», — zajaviŭ Valfovič, paŭtaryŭšy standartnyja prapahandysckija štampy.
Dziaržsakratar zajaviŭ, što pakul u Biełarusi, «u adroźnieńnie ad demakratyčnaj Jeŭropy», pomniki adkryvajucca, a nie razburajucca, kraina niepieramožnaja. Nasamreč, heta chłuśnia, u Biełarusi razburajucca pomniki, u pryvatnaści — paŭstancam Kalinoŭskaha i voinam Armii Krajovaj.
