«Katiušin rasčiot» — tak nazyvajecca pieradača na «Biełaruś-1», jakuju viadzie Kaciaryna Cichamirava. Temy hučać nastupnym čynam:
- «Chto rychtuje bajevikoŭ dla Biełarusi?»;
- «Chto źlivaje biełaruskich najmitaŭ?»;
- «Brudnyja mietady ekstremistaŭ»;
- «Źbiehłyja ŭ 2020-m chočuć viarnucca damoŭ»;
- «Banderaŭski Hitleriuhiend».
Mienavita Kaciaryna Cichamirava pasprabavała razyhrać pradstaŭnicu Kaardynacyjnaj rady Volhu Kavalkovu. Prapahandystka zahrymiravałasia, pradstaviłasia pamočnicaj «adnaho rasijskaha aliharcha» i vyjšła na suviaź z Kavalkovaj. Cichamirava prapanoŭvała svajoj surazmoŭcy hrašovuju dapamohu ŭ rasijskich rublach, a taksama pytałasia, ci pahodzicca jana zamiaścić Śviatłanu Cichanoŭskuju na miescy lidarki demakratyčnych siłaŭ.
Ciapier Cichamirava šmat robić repartažaŭ pra połk Kalinoŭskaha.
«Heta daroha ŭ adzin kaniec. Ukrainskija viarchi nie škadujuć ni svaich, nie paškadujuć i čužych. Da apošniaha ŭkrainca, da apošniaha najmita», — kazała prapahandystka ŭ adnym z apošnich rolikaŭ.
U hety čas u siužecie milhała fota zabitaha Ivana «Bresta» Marčuka, jakoje aktyŭna kačavała ŭ rasijskich Z-pablikach. Chto ž takaja hetaja Kaciaryna Cichamirava?
«Niapravilnaja ŭkrainka»
Da Biełarusi žančyna nie maje nijakaha dačynieńnia. Jana sama rodam ź Sievastopala, z Krymu.
«Kali brać nacyjanalnaść, to ja ŭkrainka», — kazała jana ŭ intervju vydańniu «Biełaruś siehodnia». Cichamiravaj 35 hadoŭ.
U inšym svaim dopisie ŭ sacyjalnaj sietcy Facebook Cichamirava padzialiłasia, što jana «niapravilnaja ŭkrainka, bo rasiejka».
«Ja, Kaciaryna Cichamirava, u dziavoctvie Saluk, a pa maci — Pališčuk. Ja dačka niapravilnych ukraincaŭ, jakija vyzvalali Kijeŭ, šturmavali nieprystupny Kionihśbierh, adnaŭlali Sievastopal i adbudoŭvali rasijski Kalininhrad. Tak, ja niapravilnaja ŭkrainka, tamu što ruskaja!» — napisała jana.
Ź Sievastopala ŭ Kalininhrad siamja Cichamiravaj pierajechała, kali budučaja prapahandystka jašče chadziła ŭ škołu. U Krymie ŭ jaje zastavalisia babka ź dziedam, jakija ŭžo pamierli.
Taksama jana ŭspaminaje, jak u 1990-ja ź inšymi dziećmi sustrakała ŭ Krymie niamieckich turystaŭ. «Jak maleńkija rasijskija małpački skakali pierad imi za marki i słodyčy».
Zmahałasia z prajavami «hiermanskaści» ŭ Kalininhradzie
U Kalininhradzie dziaŭčyna vučyłasia na nastaŭnicu rasiejskaj movy i litaratury. Pry hetym kazała, što zaŭsiody maryła pracavać žurnalistkaj.
Mara spraŭdziłasia, Kaciaryna stała supracoŭničać z kalininhradskim radyjo «Russkij kraj». Hetaje ŚMI siabie pazycyjanuje nastupnym čynam:
- «Radyjostancyja, jakaja stvaraje svaju redakcyjnuju palityku na asnovie ajčynnych duchoŭnych i maralnych kaštoŭnaściaŭ».
- «My russkije, s nami Boh», — hetyja słovy Suvorava byli łozunham pracy «Russkoho kraja».
Svaim kantentam radyjostancyja nahadvała niešta siaredniaje pamiž «Riehnumom» i «Caŕhradom».
«Ja pracavała na radyjostancyi, nabližanaj da Ruskaj pravasłaŭnaj carkvy. Jano nazyvałasia tak mienavita praź ideałahičnaje supraćstajańnie «jeŭrapiejskaści», — kazała Cichamirava.
U inšym intervju jana padkreślivała, što joj kazali: «Praca ŭ «Russkom kraje» — heta jak čornaja mietka na ŭsio žyćcio».
Sama jana padčas pracy ŭ Kalininhradzie aktyŭna zmahałasia z prajavami «hiermanizacyi» ŭ horadzie. Svaim nastaŭnikam nazyvaje žurnalista Andreja Vypałzava, jaki jakraz prasłaviŭsia asudžeńniem «hiermanizacyi» Kalininhrada.
Na siońniašni dzień «Roskomnadzor» prypyniŭ licenziju «Russkoho kraja». Hałoŭny redaktar radyjo Michaił Čarankoŭ napisaŭ, što błakavańnie adbyłosia na fonie pieradvybarnaj začystki infarmacyjnaha pola albo «pa skarzie na adnu sa śviežych antyizrailskich i antysijanisckich publikacyj».
Na avatarcy ŭ Čarankova staić aryštavany Ihar Strałkoŭ. Sam Čarankoŭ mocna krytykuje Pucina, pry hetym padtrymlivaje vajnu va Ukrainie.
«Bajec prosicca ŭ atrad»
U Kalininhradzie Cichamirava vyjšła zamuž. Jaje abrańnikam staŭ dalnabojnik Alaksiej Cichamiraŭ. Ź im razam jany krychu padarožničali pa Jeŭropie.
Pierajezd u Minsk byŭ źviazany jakraz sa svajakami muža. U Biełarusi ŭ jaho žyŭ dzied, były vajskovy prakuror Uładzimir Davydaŭ. Spačatku jaho dahladała maci Alaksieja Cichamirava, ale potym jana pamierła. I tady ŭžo dzieda stali dahladać unuk ź niaviestkaj. Uładzimir Davydaŭ pamior u listapadzie 2021 hoda.
Spačatku Kaciaryna z mužam pryjazdžali ŭ Biełaruś na niekalki dzion kožnyja niekalki miesiacaŭ, a potym i całkam pierajechali. Adbyłosia heta ŭ 2020 hodzie, kali ŭ śviecie pačałasia epidemija karanavirusu.
Žančynie nie padabałasia, što ŭ paraŭnańni ź Biełaruśsiu ŭ Rasii treba paŭsiul nasić maski.
U niadaŭnim intervju dla pieradačy «Skažiniemołči» na «Biełaruś-1» jana kazała, što 30 žniŭnia 2020 hoda pajšła ŭ kramu, kab padrychtavać dzicia da 1 vieraśnia, i sutyknułasia z pratestoŭcami. Paśla liniejki ŭ škole jana napisała ŭ pryvat da kiraŭnika Biełteleradyjokampanii Ivana Ejsmanta. «Bajec prosicca ŭ atrad», — tak, pavodle Cichamiravaj, pačynałasia paviedamleńnie.
«Lačeńnie za dziaržaŭny košt na škoncy»
Nieŭzabavie jaje zaprasili pracavać na telebačańnie. «Nu, pajechali! Za Radzimu», — tak napisała Cichamirava ŭ svaim instahramie 10 kastryčnika 2020 hoda, źmiaściŭšy fota ź mikrafonam BT.
Užo ad listapada 2020 hoda rasiejka Cichamirava stała raskazvać hledačam BT pra toje, što demakratyja nie patrebna, a pratestoŭcam płaciać, i jak Zachadu patrebien tolki chaos u Biełarusi.
U žniŭni 2021 hoda Cichamirava ŭdzielničała ŭ pres-kanferencyi Alaksandra Łukašenki, jakuju jon davaŭ u hadavinu prezidenckich vybaraŭ. Była zaprošanaja na pryjom na stary Novy hod u Łukašenki.
Z časam Cichamiravaj stali daviarać «vykryvalnickija» repartažy, jana rychtavała siužet pra nobieleŭskaha łaŭreata Alesia Bialackaha. Praŭda, Cichamirava tak i nie znajšła ludziej, jakija b mahli niešta kiepskaje skazać pra Bialackaha. U roli «ekśpiertaŭ» vystupali ludzi ŭ zaciemnienych pakojach sa schavanymi tvarami i źmienienymi hałasami. Pra Bialackaha ž Cichamirava skazała, što jaho «premijavali sanatorna-kurortnym lačeńniem za dziaržaŭny košt na škoncy».
U 2022 hodzie z pačatku poŭnamaštabnaj vajny Rasii suprać Ukrainy Kaciaryna Cichamirava rašuča padtrymała rasiejskuju armiju. Mienavita joj naležać repartažy na BT ab tym, što vializnaja kolkaść trupaŭ siarod cyvilnaha nasielnictva ŭ Bučy — pastanoŭka. Prapahandystka pierakonvała, što admova Jeŭropy ad rasijskaha hazu — heta jaje samahubstva.
«Siońnia Dzień adzinstva narodaŭ Biełarusi i Rasii. Nie chapaje tolki treciaj siastry. Biednaja, razarvanaja djabalskimi tancami Ukraina… Chutka vierniecca ŭ siamju. U hetym niama sumnievaŭ», — pisała Cichamirava 2 krasavika 2023 hoda.
Hetym letam Cichamirava razam ź siamjoj jeździła na adpačynak u akupavany Krym. Pry hetym usio jašče čas ad času skardzicca ŭ svaich sacsietkach, jak sumuje pa Kalininhradzie i Bałtyjskim mory.
Čytajcie taksama:
Azaronak napisaŭ list Stalinu: «Pakłaniusia tabie. Vyšej za ciabie tolki Boh»
