Sieladziec ź ihrušami, žuravinami, jabłykami i sielderejem — alternatyva «šubie». Recept 1

Fota: Getty Images

Sieladziec z hrušaj i žuravinami

Spatrebicca:

• 1 kh sieladca a-la macijas,
• paŭšklanki vocatu,
• dźvie hrušy,
• kala 50 h sušanych žuravin,
• 2 nievialikija čyrvonyja cybuliny,
• łaŭrovy list,
• rapsavy alej.

1. Sieladziec vymyjcie i zamačycie ŭ miscy z vadoj na hadzinu. Zatym źlicie vadu i jašče raz zalicie sieladziec, hetym razam dadaŭšy paŭšklanki vocatu. Vytrymajcie jašče dźvie hadziny.
2. Źlicie ź sieladca vadu i narežcie jaho pałoskami šyrynioj prykładna 2-3 sm.
3. Pierakładzicie rybu ŭ jomistaść, dzie jana budzie hatavacca. Potym parežcie cybulu nievialikimi kubikami i dadajcie da sieladca.
4. Hrušy narežcie kubikami prykładna 1 sm i taksama dadajcie.
5. Pasypcie ŭsio žuravinami, dadajcie łaŭrovy list i zalicie rybu alejem.

Sieladziec z zapiečanaj harodninaj i jabłykami

Spatrebicca:

• kala 200 h morkvy
• kala 150 h cybuli
• 2 jabłyki (lepš sałodkija)
• 240 h sieladca
• sol
• pierac
• alej dla hatavańnia
• krop (pa žadańni)

Jak hatavać:

1. Natrycie morkvu na siaredniaj tarcy, cybulu narežcie kubikami.
2. Dva jabłyki abłupicie, vydalicie siemiečki (lepš za ŭsio heta rabić admysłovaj pryładaj). Potym narežcie jabłyki tonkimi kruhłymi łustačkami ź dziračkami ŭ siaredzinie (jak na jabłyčnyja čypsy). Možna narezać i pa-inšamu, ale tak budzie bolš pryhoža.
3. Na razahretuju patelniu nalicie alej, zmažcie im usiu pavierchniu i dadajcie łustački jabłykaŭ. Zapiakajcie 2-3 chviliny adzin bok, zatym pieraviarnicie i hatujcie 2-3 chviliny ź inšaha boku. Vykładzicie piečanyja jabłyki na talerku i dajcie im astyć.
4. Na patelniu nalicie alej, dadajcie narezanyja cybulu i morkvu, sol i pierac. Uvieś čas pamiešvajučy, smažcie kala 10 chvilin na siarednim ahni.
5. Kali harodnina dobra prasmažycca, vyklučajcie ahoń. Trymajučy patelniu ŭ ruce, źlohku nachilicie jaje ŭbok, kab adzin bok patelni apynuŭsia nižej, a inšy vyšej. Pierasuńcie harodninu ŭ vierchni bok i pryciśnicie, kab ściok lišni alej (tak tłušču budzie mienš).
6. Akuratna łyžkaj vykładzicie harodninu na talerku, kudy budziecie kłaści sieladziec. Vykładzicie harodninu roŭnym płastom i dajcie joj astyć.
7. Sieladziec parežcie na nievialikija kavałački i pakładzicie nad astyłymi cybulaj i morkvaj.
8. Na sieladziec vykładzicie zapiečanyja jabłyčnyja łustački. Strava amal hatovaja!
9. Možacie taksama dadać žmieniu kropu — tak budzie bolš smačna i duchmiana, ale možna abyścisia i biez kropu abo zamianić jaho inšaj zielaninaj na vaš vybar.

Sieladziec ź sielderejem, jabłykami i harčycaj

Na 6 porcyj:

• 250 h file sieladca
• pałova korania sieldereju (kala 250 h)
• 1 sałodkija fijaletavyja cybuli
• 1 jabłyk (pažadana kisły)
• 2 stałovyja łyžki majanezu
• 0,5 stałovaja łyžka śmiatany
• 0,5 stałovaja łyžka ziarnistaj harčycy
• 0,5 čajnaja łyžka majaranu
• 0,5 čajnaja łyžka mołataha čornaha piercu

  Jak hatavać:

1. Sieladziec narežcie kavałačkami patrebnaha pamieru i pakładzicie ŭ sałatnicu razam z drobna narezanaj cybulaj.
2. U nievialikaj jomistaści źmiašajcie majanez, śmiatanu, harčycu i śpiecyi.
3. Korań sieldereju ačyścicie i natrycie na bujnaj tarcy, vykładzicie na sieladziec.
4. Jabłyki natrycie na toj ža tarcy, adrazu vykładajcie na sielderej, zalicie zapraŭkaj i staranna źmiašajcie.
5. Pierad tym, jak padavać, stravu lepš patrymać u chaładzilniku minimum hadzinu, jašče lepš — noč. Padavajcie ź lubimym chlebam.

Aliŭje, krabavaja sałata i sieladziec pad šubaj… ​Što samaje škodnaje za navahodnim stałom i jak ź im zmahacca?

Viedajecie, navošta skrynia pad duchoŭkaj? Voś try sakrety duchovak, jakija dapamohuć rychtavać navahodniaje zastolle

Mer ukrainskaha Dniapra stamiŭsia treci dzień jeści aliŭje dy «šubu» i prapanavaŭ ad ich admovicca

Ź sieryi «Naša strava»: Sieladziec pa‑biełarusku 

2

0

1

1

0

0

Nashaniva.com