Pavieł Hubaraŭ i Ihar Hirkin-Strałkoŭ. Fota: Alexander Nemenov / Alexander Zemlianichenko / AP. Kałaž: «Naša Niva»
Pavieł Hubaraŭ, adzin z padnačalenych i paplečnikaŭ «byłoha ministra abarony DNR» Ihara Hirkina-Strałkova, pačaŭ taho publična krytykavać i abražać za «chłuśniu, kryvadušnaść i podłaść».
Svaje dumki, apublikavanyja ŭ asabistym telehram-kanale, Hubaraŭ abiacaŭ dapoŭnić «vialikim tekstam», u jakim razburyć «miedyjny mif pra vysakarodnaha hieroja Strałkova».
«Ja vam na palcach dakažu, što niama i nie było nijakaha vysakarodnaha i pryncypovaha hieroja Strałkova, a jość Hirkin — iłžyvy, kryvadušny, podły intryhan i nikčemnaść. Dačakajciesia majho vialikaha tekstu i nie marnujcie svoj čas i emocyi na pustyšku Hirkina», — napisaŭ Pavieł Hubaraŭ u anonsie svajho «vialikaha tekstu» pra Hirkina-Strałkova.
Na dumku Hubarava, Strałkoŭ zachacieŭ iści ŭ prezidenty Rasii «jašče z momantu padziej u Słaviansku», a prajekt KRP (Kłub razzłavanych patryjotaŭ) byŭ stvorany Strałkovym tolki dla prasoŭvańnia jaho prezidenckich ambicyj. Praca ž u hetym kłubie dla Hubarava prachodziła «ŭ stanie pastajannaha stresu ad babskich isteryk Hirkina».
Hubaraŭ ličyć, što mienavita prezidenckija ambicyi Strałkova stali hałoŭnaj pryčynaj jaho aryštu, ale pry hetym «nichto nie budzie represavać Hirkina, bo heta tolki vychavaŭčaja praca z metaj adpudzić jaho ad prezidenctva, a zatym vyzvalić».
U hetym jon «znajšoŭ padabienstva» z vypadkam Siarhieja Cichanoŭskaha.
«Hirkina nichto nie budzie represavać. Heta inšaje, heta vychavaŭčaja praca. Jahony aryšt pravilna paraŭnoŭvać z aryštam błohiera Cichanoŭskaha ŭ Biełarusi na vybarach Łukašenki.
U palityčnaj sistemie Rasii niama nijakich vybaraŭ. Hirkin siadzić z-za svaich prezidenckich ambicyj nie tamu, što ŭłady jaho bajacca, a z pryncypu, jak by što nie zdaryłasia.
Hirkina vypuściać, jak tolki pahroza ad jaho ŭdziełu ŭ vybarach źniknie. Tym bolš, što jon siadzić pa śmiešnym artykule (č. 2 art. 280 KK RF, publičnyja zakliki da ekstremizmu praź internet, da piaci hadoŭ pazbaŭleńnia voli — NN), pa jakim redka dajuć nie toje što aryšt, ale i pazbaŭleńnie voli (rasijan rehularna aryštoŭvajuć i pazbaŭlajuć voli pa hetym artykule — NN)», — razvažaje Pavieł Hubaraŭ.
Na krytyku ŭ zdradzie Hirkina-Strałkova i ŭ tym, što «brydka krytykavać čałavieka, jaki siadzić u SIZA», Hubaraŭ adkazaŭ, što «Hirkin siadzić u sanatornych umovach sam-adzin, z televizaram, chaładzilnikam, charčavańniem, lačeńniem, bieźlimitnymi pieradačami i dobrym staŭleńniem z boku nahladčykaŭ».
Ihar Hirkin-Strałkoŭ i Pavieł Hubaraŭ u 2014 hodzie paśla abmienu i vyzvaleńnia Hubarava z ukrainskaj turmy. Fota: pikabu.ru
Charakterna, što sam Pavieł Hubaraŭ niadaŭna raspaviadaŭ, što kali ŭ 2014 hodzie byŭ va ŭkrainskaj turmie (jakuju Hubaraŭ taksama nazyvaŭ «sanatoryjem»), mienavita Ihar Strałkoŭ zdoleŭ dabicca jaho vyzvaleńnia, abmianiaŭšy taho na niekalkich pałonnych supracoŭnikaŭ śpiecnaza «Alfa» Słužby biaśpieki Ukrainy (SBU).
Tady SBU znajšła i aryštavała Hubarava za arhanizacyju prarasijskich mitynhaŭ i aktyŭnuju padtrymku adździaleńnia Danbasa ad Ukrainy, a taksama za ŭdzieł u zachopie administracyjnych budynkaŭ Daniecka. Usio heta adbyvałasia na fonie pieramohi prychilnikaŭ Jeŭramajdanu-2014 ŭ Kijevie i sprobach Rasii destabilizavać Danbas i anieksavać Krym.
Uspaminajučy tyja padziei i kamientujučy rolu Strałkova ŭ svaim vyzvaleńni z ukrainskaj turmy, Pavieł Hubaraŭ nazvaŭ taho «ščyrym patryjotam, jakim jon i źjaŭlajecca». Kazaŭ jon heta jašče ŭ vieraśni hetaha hoda ŭžo paśla aryštu Hirkina-Strałkova ŭ Rasii «za ekstremizm».
Darečy, Pavieł Hubaraŭ uletku ładziŭ pikiet u padtrymku Ihara Strałkova kala budynka suda, dzie tamu abirali mieru strymańnia. Hubaraŭ patrabavaŭ vyzvaleńnia Strałkova i zajaŭlaŭ, što toj «abhruntavana krytykavaŭ dziejańni Minabarony Rasii».
Čytajcie taksama:
Žonka Hirkina prakamientavała fota, na jakim toj nibyta mocna źbity ŭ SIZA
«Jon svaryŭsia na ludajedaŭ za ich niedastatkovy apietyt». Navalny nazvaŭ Strałkova palitviaźniem
