Fantazijnaja hraviura XIX stahodździa, u jakoj nibyta adlustravanyja abstaviny padarožža Kaciaryny ŭ XVIII stahodździ
Rehijanalnyja dziaržaŭnyja ŚMI Homielskaj vobłaści adspravazdačylisia pra vyniki foruma «Biznes-dni ŭ Homieli», jaki prajšoŭ u Homieli ŭ pačatku śniežnia. Na mierapryjemstvie, arhanizavanym Homielskim adździaleńniem Biełaruskaj handlova-pramysłovaj pałaty, raskazali pra vynik supracy biełaruskich śpiecyjalistaŭ z rasijskimi kalehami z Branskaj dy Smalenskaj abłaściej i Sankt-Pieciarburha.
Havorka idzie pra vialiki transpamiežny prajekt «Darohami Kaciaryny», zhodna ź jakim buduć prakładzienyja turystyčnyja maršruty pa histaryčnych miescach Homielščyny, jakija «naviedvała rasiejskaja impieratryca». U pryvatnaści, paviedamlajecca, što prapracoŭvajecca jak turystyčnaja infrastruktura, tak i rovarnyja adrezki šlachoŭ, mahčymaści naviedvańnia abjektaŭ, stvareńnie tematyčnych suvieniraŭ i h. d.
Abmierkavańnie prajektu «Darohami Kaciaryny» ŭ miežach Homielskaha biznes-forumu. U centry zdymka — pieršaja sakratarka ambasady Rasii, kiraŭnica Ruskaha doma ŭ Homieli Volha Baranienka. Fota: Homielskija viedamaści
Prezientacyja prajekta «Darohami Kaciaryny» adbyłasia ŭ lutym 2023 hoda. Jak adznačyła jaho inicyjatarka, dyrektarka ŭstanovy «Terytoryja raźvićcia — XXI stahodździe» Iryna Bahdaniec: «Ideja stvareńnia novych turystyčnych abjektaŭ uźnikła na asnovie lehiendaŭ i histaryčnych faktaŭ pra padarožža Kaciaryny II pa terytoryi Homielskaha i Karmianskaha rajonaŭ».
Da hetaha prajektu niepasredna dałučanaja rasijskaja ambasada i jaje instytuty:
«Asnoŭny prajekt, jaki my siońnia abmiarkoŭvajem i jaki padtrymaŭ Ruski dom, — «Darohami Kaciaryny» — cikavy dla abiedźviuch krain (…) Viedaju, što mnohija rehijony Rasii dałučylisia da prajektu, jaho cikava pašyrać (…) Prajekt namahajecca adnavić maršrut pajezdak impieratrycy, jakaja lubiła padarožničać (…) Maršrut nie vypadkova pačynajecca z Homielskaj vobłaści, na hetaj ziamli Kaciaryna byvała nie raz i mienavita tut šlach vyrašyli paŭtaryć», — zaŭvažyła ŭ kamientary «Homielskim viedamaściam» niadaŭna pryznačanaja kiraŭnička Ruskaha doma Volha Baranienka.
Z hetaj frazy vynikajuć, jak minimum, dźvie vysnovy. Pa-pieršaje, Rasija vydzialaje i budzie vydatkoŭvać hrošy na prasłaŭleńnie ŭ Biełarusi carycy Kaciaryny II. Pa-druhoje, dla realizacyi dadzienaha prajektu buduć pryciahvacca čynoŭniki roznych uzroŭniaŭ, u vyniku čaho ŭ ich budzie farmiravacca łajalnaje staŭleńnie da rasijskich impierskich naratyvaŭ.
Užo ciapier da prajektu dałučanyja ŭstanovy adukacyi Homielskaha i Karmianskaha rajonaŭ, miascovyja čynoŭniki, «deputaty» i studenty Homielskaha dziaržaŭnaha ŭniviersiteta imia Skaryny.
Homielski prajekt «Darohami Kaciaryny» ŭžo zajmieŭ padtrymku ŭ Rasii, maje ŭznaharodžańni ŭ naminacyi «Za zachavańnie adzinaj sajuznaj kulturnaj spadčyny» ŭ naminacyi «Najlepšaja ideja turystyčnaj padziei», finał jakoj prachodziŭ u Nižnim Noŭharadzie. A ŭ pačatku 2024 hoda startuje mižnarodny konkurs na lepšyja idei «Suvieniry ad Kaciaryny», vyniki jakoha buduć padviedzienyja ŭ traŭni na forumie «Viasna ŭ Homieli».
Čytajcie taksama:
Što stała z rasijskimi pomnikami, jakija impieryja staviła ŭ nacyjanalnych pravincyjach
U Mahilovie «rusifikavali» kryž na miescy stalinskich rasstrełaŭ
