Šłyk: «Stahodździami mužčyny zajmali ŭsie lidzirujučyja miescy — z hetym składana raźvitacca»
Alaksandr Šłyk tłumačyć svaju pazicyju:
«Praktyka hiendarnych kvot šyroka raspaŭsiudžana va ŭsim śviecie. Na ŭzroŭni AAN pryznana, što kvoty, nakiravanyja na pavyšeńnie ŭdziełu žančyn u hramadskim i palityčnym žyćci — heta narmalna i nie źjaŭlajecca dyskryminacyjaj. Nie tak daŭno źjaviŭsia trend na vyznačeńnie kvot na ŭdzieł žančyn u radach dyrektaraŭ dziaržaŭnych kampanij. Dumaju, možna abmiarkoŭvać, kab na biełaruskich demakratyčnych vybarach pieršapačatkovaja kvota dla žančyn była 30%, kab potym pastupova ŭźniać jaje da 40%».
Alaksandr Šłyk. Fota: sajt Ofisa Cichanoŭskaj
Kali praciŭnikaŭ idei ŭdziełu žančyn u palitycy amal što niama, to sam barjer u sorak adsotkaŭ vyklikaŭ burnyja sprečki. Šłyk kaža:
«Hiendarnaja kvota ŭ 40% — heta toj paramietr, jaki vykarystoŭvajecca ŭ najbolš paśpiachovych krainach u płanie hramadskaha i palityčnaha žyćcia. Adnak, biezumoŭna, my pavinny imknucca da raŭnavažnaj prysutnaści mužčyn i žančyn na kirujučych pazicyjach. Kali nie stavić ambicyjnyja mety, my nie pryjdziem da hetaha parytetu».
Na dumku palityka, ideju krytykujuć tyja, chto znachodzicca na značnych pasadach — z-za roznych pryčyn čaściej za ŭsio takimi ludźmi akazvajucca mužčyny:
«Treba pryznać, što hiendarnyja kvoty isnavali i raniej: tolki da niadaŭniaha času stoadsotkavyja kvoty byli ŭ mužčyn — u niekatorych jeŭrapiejskich krainach žančyny ŭvohule nie mahli hałasavać da 1974 hoda. Mnie padajecca, važna pamiatać pra toje, što stahodździami mužčyny zajmali ŭsie lidzirujučyja miescy — z hetym składana raźvitacca i heta nie samaja pryvabnaja pierśpiektyva dla mužčyn».
Palityk dadaje: «Demakratyčnym siłam treba nahadvać sabie, što hiendarnaja roŭnaść — heta častka demakratyi. Składana ŭjavić sabie demakratyju, jakaja pracuje tolki dla pałovy hramadstva — dla mužčyn. Na dadzieny momant, na žal, u mianie niama adčuvańnia, što našyja palityki surjozna staviacca da temy hiendarnaj roŭnaści. Heta treba mianiać».
Rudzik: «Adkul nam brać palitykies?»
Niekatoryja aktyvisty sumniavajucca ŭ metazhodnaści kvot dla žančyn. Adnym z krytykaŭ idei staŭ były redaktar telehram-kanała NEXTA, siabra Kaardynacyjnaj rady Jan Rudzik.
Fota: Radyjo Ŭnet
U svaim telehram-kanale jon piša: «Heta było b navat śmiešna, kali b nie było vielmi sumna: na nastupnyja vybary ŭ KR daradca pa vybarach Ofisa Cichanoŭskaj Alaksandr Šłyk patrabuje ŭvieści hiendarnyja kvoty — 40% delehacyj pavinny być žančynami.
Nahadaju: raniej u APK Zareckuju ŭziali mienavita praz hiendarnyja patrabavańni. Treba była žančyna ŭ skład — uziali, aby brać. Navat u Jeŭraparłamiencie tolki 33% žančyn. A ŭ ich umovy i matyvacyja, pardon, krychu vidavočniejšyja, čym u našych strukturach buduć».
Błohier vykazaŭ sumnievy, što vykanańnie kvoty budzie paśpiachovym z-za adsutnaści žadańnia samich žančyn zajmacca palitykaj:
«Dy i ŭvohule — adkul nam brać palitykies, kali jany sami nie pryjduć? A što z zaachvočanymi mužykami rabić, jakija ŭ kvoty nie ŭłaziać? Durdom!»
Reziumujučy, Rudzik adznačyŭ, što novaŭviadzieńnie nie tolki nie palepšyć situacyju na demakratyčnym poli, ale i stvoryć dadatkovyja prablemy:
«Šmatpakutny biełaruski demruch roznaje bačyŭ, ale składvajecca ŭražańnie, što čalcy Ofisa prezident:ki štučna stvarajuć na roŭnym miescy prablemy i padymajuć paroh uvachodžańnia».
Mierkavańnie ekśpiertki
Niahledziačy na toje, što šmat u jakich krainach žančyn zaachvočvajuć da aktyŭnaha ŭdziełu ŭ palityčnym žyćci, dla mnohich biełarusaŭ paniaćcie hiendarnych kvot zastajecca ŭ navinku. My paprasili patłumačyć, jak pracuje hety instrumient, doktarku navuk, hiendarnuju daśledčycu Irynu Sidorskuju.
Fota: sacsietki ekśpiertki
«Ja liču hiendarnyja kvoty dziejnym instrumientam prasoŭvańnia hiendarnaj roŭnaści — važnaha składnika demakratyi. Pierš za ŭsio tamu, što bieź ich my budziem vypraŭlać hiendarnuju dyskryminacyju našmat daŭžej, čym ź ich dapamohaj. Našaha žyćcia dla hetaha dakładna nie chopić, a chočacca pabačyć pazityŭnyja pieramieny», — kaža Iryna.
Ekśpiertka adznačaje: «Hiendarnyja kvoty dapamahajuć, bo hramadstva pryzvyčaiłasia da peŭnaha paradku rečaŭ i ličyć jaho narmalnym i naturalnym — jano ž nie bačyła inšych mahčymaściej. Hety instrumient dazvalaje zrabić mahčymym nievidavočnaje, pryčym nievidavočnaje dla ŭsich bakoŭ — i dla mieniedžmientu arhanizacyi, i dla pracujučych u joj supracoŭnikaŭ i supracoŭnic, i dla tych, chto, dziakujučy hiendarnaj kvocie, zmoža realizavać siabie i prynieści karyść».
Pa słovach ekśpiertki, takija kvoty asobna patrebny ŭ śfierach, dzie tradycyjna małaja žanočaja prystutnaść — u palitycy, na top-pasadach u biznesie, asabliva ŭ IT, bankaŭskaj śfiery, naftahazie, a taksama ŭ palicyi i armii. «Palityku tut staŭlu na pieršaje miesca, bo palityki, prymajučy takija rašeńni, dajuć prykład usim astatnim», — padkreślivaje Iryna Sidorskaja.
Čytajcie taksama: