Vyjava: skrynšot ź videa telekanała LaSexta
Siarod siaredniaviečnych kamiennych budynkaŭ ispanskaha miastečka Kaseres (Cáceres) možna znajści restaran i hatel «Atryjo» (Atrio), udastojeny troch zorak Mišlen, jaki prapanuje naviedvalnikam śviata trufieli, maluskaŭ i ibieryjski chamon. Zapić heta ŭsio možna najlepšymi vinami, jakija tolki možna kupić za hrošy. Vinny sklep źmiaščaje 40 000 butelek, i sami ŭładalniki hatela nazyvajuć jaho «pierlinaj» budynka.
29-hadovaja Pryscyła Łara Hievara, byłaja mieksikanskaja karaleva pryhažości, i 47-hadovy Kanstancin Dumitru, jaje rumyna-niderłandski partnior, nie byli čužymi dla «Atryjo»: jany ahladali restaran prynamsi try razy za niekalki miesiacaŭ da viačery, jakaja adbyłasia 26 kastryčnika 2021 hoda i «vyliłasia» ŭ adzin z samych dziorzkich kradziažoŭ vina ŭ najnoŭšaj historyi. Jak raspaviadaje The Times, para skrała vino redkich uradžajaŭ ahulnym koštam kala 1,6 miljona jeŭra.
Spačatku ŭsio išło jak pa maśle: Hievara zarehistravałasia ŭ hateli pa padroblenym šviejcarskim pašparcie i z pustym zaplečnikam. Supracoŭnik hatela, jaki padniaŭ sumku žančyny, zaŭvažyŭ, što jana vielmi mała važyć, ale vyhladu nie padaŭ. Paźniej da Hievary dałučyŭsia Dumitru.
Vyjava: Solarpix
Kali paśla dehustacyjnaha mieniu z 14 straŭ u 2:10 nočy Hievara patelefanavała na stojku rehistracyi i zamoviła jašče sałatu, piersanał pačali raździrać smutnyja sumnievy (asabliva paśla nieadnarazovaha pytańnia pra «čas, jaki spatrebicca na padaču»). Pieršapačatkova dziažurny kanśjerž admoviŭsia pakinuć svoj post, kab pryhatavać sałatu, ale ŭ vyniku sastupiŭ, adyšoŭšy prykładna na 20 chvilin. Pa viersii śledstva Dumitru za hety čas skraŭ elektronny kluč, jaki adkryvaŭ vinny sklep.
Patrapić usiaredzinu jon, adnak, nie zmoh, bo ŭziaŭ nie toj kluč — tamu patelefanavaŭ naparnicy, kab taja znoŭ adciahnuła ŭvahu kanśjerža. Hetym razam Hievara zamoviła pudynh. Žančyna była nastolki nastojlivaj, što kanśjerž iznoŭ pahadziŭsia pakinuć svoj post.
Tym časam Dumitru viarnuŭsia ŭ sklep ź inšym klučom, narešcie zmoh uvajści ŭ dehustacyjnuju zału i pakłaŭ u try miaški 45 plašak vina. Jak zajavili potym prakurory na sudzie, hatel abvinavačanyja pakinuli kala 5-j ranicy, niesučy z saboj zaplečnik i dźvie sumki z butelkami, u jakija pakłali ručniki z vannaj haściničnaha numara, kab paźbiehnuć zvonu plašak.
Toj samy vinny sklep / Fota: atriocaceres.com
U vyniku Hievara i Dumitru byli prysudžanyja da čatyroch i čatyroch z pałovaj hadoŭ pazbaŭleńnia voli adpaviedna paśla taho, jak ich pryznali vinavatymi ŭ kradziažy pry abciažarvajučych abstavinach. Sud abaviazaŭ ich vypłacić strachoŭščykam škodu ŭ pamiery bolš za 750 000 jeŭra, kab kampiensavać im skradzienyja viny, u tym liku butelku Château d'Yquem 1806 hoda (košt adnoj hetaj plaški ŭ mieniu składaŭ 350 000 jeŭra).
Para była aryštavanaja praź dzieviać miesiacaŭ pry sprobie pierasiačeńnia miažy pamiž dźviuma bałkanskimi krainami. Padčas suda Dumitru admaŭlaŭ abvinavačańni. Jak skazaŭ jahony advakat: «Sorak piać butelek i čatyry ručniki nie źmieściacca ŭ dźvie spartyŭnyja sumki, i hety čałaviek nie moža ich tak lohka nasić».
Taksama ŭźnikli pytańni nakont kart-klučoŭ, u tym liku zdahadki, što nichto, akramia supracoŭnikaŭ hatela, nie moh viedać, jak vyhladaje pravilny majstar-kluč da sklepa. Pa słovach rabotnikaŭ hatela na sudzie, abiedźvie mahnitnyja karty znachodzilisia ŭ častkova schavanaj skryncy na stojcy rehistracyi, pry hetym klučy byli pieramiašanyja ź inšymi padobnymi kartami, kab zamaskavać hałoŭny majstar-kluč. To-bok, kab daviedacca, jaki kluč byŭ patrebny, navat supracoŭnik hatela pavinien byŭ by pracavać na recepcyi.
Nichto tak i nie zmoh patłumačyć, jak złodziei zrazumieli, jaki kluč patrebny i čamu jany spačatku skarystali kluč da numara 106, jaki ŭ tuju noč zajmali siabry haspadaroŭ. Źnikłaje vino tak i nie było znojdziena, a niekatoryja detali (naprykład, jak plaški pakinuli hatel i ich miescaznachodžańnie), dahetul zastajucca zahadkaj.
Čytajcie taksama:
U biełaruskaj kulturnaj prastory skrali boks z danatami na dapamohu Ukrainie
