«Časy, kali my atrymlivali vizy na hod-try-piać, na žal, prajšli. Zaraz viza na paŭhoda ličycca padarunkam losu, a na hod — prosta cudam. Pry hetym turfirmy nie mohuć dać harantyj ni adnosna taho, što vam adkryjuć vizu na peŭny termin, ni adnosna taho, što jaje naohuł adkryjuć. I dobrasumlennyja apieratary adrazu i sumlenna papiaredžvajuć pra heta svaich klijentaŭ. Rašeńnie zaležyć tolki ad konsuła», — padkreślivaje Alaksiej, pradstaŭnik adnaho ź biełaruskich turahienctvaŭ.
«Kolkaść admovaŭ pa turystyčnych vizach dasiahaje kala 90%»
— Zastałosia nie tak šmat pasolstvaŭ, jakija naohuł adkryvajuć nam što-niebudź, — adrazu ŭdakładniaje surazmoŭca. — Pačniem z Francyi, tamu što ŭ hetuju ambasadu trapić praktyčna niemahčyma. Zapisacca mohuć tolki arhanizavanyja hrupy ad turystyčnych firmaŭ, pry hetym zapis vielmi limitavany i, jak praviła, raśpisany na dva-try miesiacy napierad. Padača na francuzskuju vizu maje na ŭvazie pajezdku ŭ tur, jaki vy pavinny apłacić.
Hetaja ž umova źjaŭlajecca abaviazkovaj dla pasolstva Vienhryi. Bolš za toje, Vienhryja nie prosta prapanuje vam kupić tur, ale jašče moža i pravieryć, ci sapraŭdy vy vykarystoŭvali vizu pa pryznačeńni. Až da taho, što jany navat adpraŭlali zapyty ŭ hatel z prośbaj paćvierdzić pražyvańnie tam turystaŭ.
U Francyju dakumienty prymajuć u samim pasolstvie, adpaviedna, nie spatrebiacca vydatki za pasłuhi vizavaha centra. U Vienhryju, naadvarot, padać dakumienty možna tolki praź vizavy centr. Zatoje čakać pryjdziecca mienš, na praciahu miesiaca. Pry hetym zapisacca ŭ hetuju ambasadu na padaču dakumientaŭ možna pasprabavać i samastojna, prykłaŭšy ček ab apłacie haścinicy. Abiedźvie ambasady adkryvajuć vizy ŭ asnoŭnym na paŭhoda-hod i praktyčna nie admaŭlajuć.
Dla padačy na niamieckuju vizu pryjom dakumientaŭ taksama viadziecca tolki ŭ pasolstvie pa papiarednim zapisie. Ale ŭ ich krychu inšaja sistema: pakidaješ zajaŭku i čakaješ, pakul paćvierdziać datu padačy. Čakańnie moža doŭžycca miesiacami. Adzin z prykładaŭ: zapisali čałavieka ŭ traŭni, u vieraśni pryjšoŭ adkaz, što padača dakumientaŭ pryznačanaja na krasavik. Kali zapytvajecca viza pa zaprašeńni, adkazvajuć trochi chutčej.
Charvatyja z 1 studzienia hetaha hoda ŭstupiła ŭ jeŭrazonu i stała siabram Šenhienskaha pahadnieńnia. Na heta pasolstva my ŭskładali vialikija nadziei. Ale jany nie apraŭdalisia. Razhlad dakumientaŭ na vizu tam doŭžycca 3 miesiacy, i ŭsie vizy, jakija vychodzili, byli adnarazovymi.
U pasolstva Italii na turystyčnuju vizu padača robicca praź vizavy centr. Niepasredna ŭ ambasadu źviartajucca albo tyja, u kaho jość zaprašeńni ad rodnych, albo datyčnyja biznesu. Zapis u vizavy centr raśpisany prykładna na miesiac napierad. Pry hetym varta ŭličyć, što elektronnaja sistema pracuje vielmi drenna. Tamu tyja, chto nie moža zapisacca anłajn, a takich bolšaść, zajmajuć žyvuju čarhu na vulicy, składajučy śpisy.
Supracoŭniki vizavaha centra sami pa hetych śpisach abzvońvajuć i paviedamlajuć pra datu padačy. Na dadzieny momant pasolstva papiaredziła, što pry raźmierkavańni słotaŭ na apošni tydzień listapada i pieršy tydzień śniežnia pryjarytet addajuć arhanizavanym turystyčnym hrupam.
Ispanski vizavy centr u Minsku, jak viadoma, pracuje ź pierabojami. Paŭhoda byŭ začynieny, potym adkryŭsia, praz dva miesiacy znoŭ zakryŭsia. U hetyja pierapynki biełarusy jeździli ŭ Maskvu, kab adkryć vizu praz Hienieralnaje konsulstva Ispanii ŭ RF. Pajezdki byli niatannymi i prablemnymi. Urešcie, aŭtobusy z hramadzianami Biełarusi biez pašpartoŭ, jakija viartalisia paśla padačy dakumientaŭ, pačali razvaročvać na rasijska-biełaruskaj miažy.
Krychu bolš za miesiac tamu ŭ Minsku znoŭ zapracavaŭ vizavy centr. Słoty vykidvajuć raz u miesiac na nastupny miesiac. Razhlad dakumientaŭ u ispanskim konsulstvie doŭžycca 6 tydniaŭ.
Chtości pamiataje, što jašče niadaŭna Ispanija vydavała amal usim vizy na miesiac. Adnak usie vizy, vydadzienyja našym klijentam za apošni čas, vyklučna adnarazovyja.
Jašče ŭ nas jość ambasada Hrecyi. Mabyć, tudy patrapić možna lahčej za ŭsio, ale pracent admovaŭ vielmi vysoki. A vizy, jakija staviać, amal usie — adnarazovyja.
Dapuścim, u nas z pačatku hetaha hoda tolki adna klijentka atrymała hadavuju vizu ŭ hrečaskaj ambasadzie, i na jaje hladzieli prosta jak na inšapłaniecianku.
Narešcie, pasolstva Polščy, jakoje niadaŭna adnaviła vydaču turystyčnych viz. Ale, jak ni sumna, pracent admovaŭ pa ich ciapier prosta varjacki. Treba skazać, što paśla skandału z-za karupcyjnymi schiemami ŭ kampanii VFS Global palaki stali admaŭlać pa ŭsich vidach viz.
U Biełarusi ŭ ciapierašni čas zastalisia try konsulstvy — u Minsku, Breście i Hrodnie. Jak praviła, dakumienty, jakija razhladajucca konsułami tam, vychodziać sa stanoŭčymi adkazami. Adnak u suviazi z tym, što popyt zanadta vialiki, i konsuły, što zastalisia ŭ Biełarusi, nie spraŭlajucca z takim abjomam, šmat dakumientaŭ adpraŭlajecca na razhlad u Varšavu. I voś adtul idzie vielmi vialiki pracent admovaŭ.
Humanitarnyja vizy palaki ciapier naohuł nie adkryvajuć. Vizy dla ajcišnikaŭ pa prahramie Poland Business Harbour (PBH) adkryvajuć, ale ŭžo z umovami, nie dla ŭsich vykanalnymi. Ich zrabili bolš žorstkimi dla taho, kab ludzi nie vykarystoŭvali hetyja vizy nie pa pryznačeńni. I ciapier kali bačać, što ŭ vas była humanitarnaja viza abo viza PBH i vy pa joj jeździli jak turyst, chutčej za ŭsio vy atrymajecie admovu.
Źmianilisia ŭmovy padačy dakumientaŭ: konsulstvy ŭ Minsku i Breście pryviazali ich da miesca rehistracyi. U Hrodnie pakul prymajuć usich. U pakiecie dakumientaŭ na vizu katehoryi D (pracoŭnuju), jakuju raniej davali ŭ cełym biez prablem, surjozna źmianilisia patrabavańni da zaprašeńnia na pracu, što, viadoma, pamienšyć kolkaść falsifikavanych dakumientaŭ, ale ŭ toj ža čas značna ŭskładnić šlach tym, kamu sapraŭdy treba.
Što tyčycca turystaŭ, to ciapier da ŭsiaho inšaha im treba prykładać ček ab apłacie hatela. Adnak ni heta, ni ŭsio astatniaje ničoha nie harantuje. Kolkaść admovaŭ pa turystyčnych vizach dasiahaje paradku 90%.
Z apošniaha: turysty vykupili hatel u Zakapanym, atrymali admovu i ciapier usimi praŭdami dy niapraŭdami sprabujuć viarnuć hrošy za darahi hatel. Ščaśliŭčykam adkryvajuć vizy albo pad pajezdku, albo ŭsiaho na niekalki miesiacaŭ.
«Viza adnamu čałavieku abyjdziecca minimum u 1500 rubloŭ»
Ale navat z ulikam usich ciažkaściaŭ, adznačaje pradstaŭnik turahienctva, kolkaść achvotnych atrymać zapavietny dopusk u Jeŭropu zastajecca niaźmienna vysokim. A pakolki praktyčna ŭsie ambasady pastupova pamianšajuć kolkaść słotaŭ dla padačy, kankurencyja raście, adpaviedna, pavialičvajecca košt pytańnia.
— Vizavyja centry za svaje pasłuhi biaruć ad 80 da 130 jeŭra z ulikam konsulskaha zboru (35 jeŭra). Dzieci ŭ niekatorych pasolstvach vyzvalajucca ad jaho apłaty.
Plus košt turpasłuhi: dla viz katehoryi D — ad 350 rubloŭ, dla viz katehoryi C — ad 700. Treba skazać, što hety košt nie zusim zaležyć ad samich turahienctvaŭ. Reč u tym, što słoty ci zapisy «łoviać» śpiecyjalna navučanyja ludzi, jakija supracoŭničajuć z nami, naturalna, nie zadarma.
Tut peŭnych stavak niama, chto jak damovicca. Ale pakolki kvota miescaŭ, jakija vykidvajuć ambasady, pastajanna pamianšajecca, a kolkaść achvotnych atrymać vizu, naadvarot, pavialičvajecca, davodzicca hetuju płyń rehulavać canoj. Adsiul źjaŭlajucca ŭsialakija «pieršyja čerhi», «druhija», «premium» i h. d. Naturalna, spačatku zapišuć taho, chto zapłaciŭ bolš.
Kali dadać da hetaha ček na hatel, jaki ciapier patrabujuć usie, navat samy biudžetny prykładna ŭ 150 jeŭra na niekalki dzion, to ŭ vyniku viza adnamu čałavieku abyjdziecca minimum u 1500 rubloŭ. I heta tolki tam, dzie abaviazkovaj umovaj nie źjaŭlajecca kupla tura.
Ci vartaja absalutnaja adsutnaść harantavanaha vyniku takich hrošaj, kožny vyrašaje sam. Ale papiaredžvać pra viadomyja niuansy, ja liču, turfirmy abaviazanyja. Naprykład, ja raju vielmi ŭvažliva ŭzhadniać terminy pajezdki. Tamu što ciapier ambasady niaredka vydajuć pašparty sa spaźnieńniem. Naprykład, vizu staviać z 10-ha čysła, a pašpart viartajuć čałavieku tolki 12-15.
Terminy razhladu ŭ roznych pasolstvach prykładna viadomyja, ich abaviazkova treba ŭličvać. I kali dakumienty razhladajuć 6 tydniaŭ, a ŭ vas padača, dapuścim, na 1 śniežnia, to vizu treba zapytvać nie raniej, čym z 15 studzienia. Inakš možna spaźnicca ŭ svaju pajezdku.
— Dla standartnaha pakieta dakumientaŭ na turystyčnuju vizu nieabchodnyja daviedka ź miesca pracy i vypiska z rachunku. Jak być tym, u kaho niama pracy?
— Biespracoŭnyja paznačajuć svoj status, ale vypisku z rachunku jany abaviazanyja dać. Zrazumieła, što ŭ biespracoŭnaha maładoha čałavieka pavialičvajecca adsotak admovy. A voś piensijanieram vizy ŭ bolšaści vypadkaŭ adkryvajuć.
Naohuł my ŭvieś čas sutykajemsia z tym, što vypiska z rachunku stavić klijenta ŭ tupik. Ludzi nie chočuć kłaści ŭ bank hrošy i pakazvać, što jany ŭ ich jość. A ambasada ž patrabuje jašče, kab pa karcie byŭ ruch srodkaŭ za apošnija try miesiacy.
Da finansavych vydatkaŭ i ŭsich spadarožnych ciažkaściaŭ, mabyć, varta dadać składanaść prachodžańnia miažy i ryzyki, źviazanyja z hetym u apošni čas, nieabchodnaść vieryfikacyi ŭ MIS (mižbankaŭskaj infarmacyjnaj sistemie). Dziakuj palakam, jakija pryniali rašeńnie chavać fakt najaŭnaści ŭ čałavieka karty palaka pry vydačy vizy. Ale, paŭtarusia, kolkaść admoŭ hramadzianam, jakija nie majuć karty palaka, vielmi vialikaja.
Čytajcie taksama:
Najaŭnaść u biełarusaŭ «karty palaka» ciapier nie buduć paznačać na vizie
Jak samastojna spłanavać avijapadarožža i nie prahadać? Biełarusy padzialilisia łajfchakami
Šenhienskija vizy buduć afarmlacca anłajn i biez nalepak u pašparcie
Čamu biełaruski jeduć naradžać u Arhiencinu i kolki heta kaštuje
