Vioska Klimaŭka Prybytkaŭskaha sielsavieta. Fota: sozhnews.by
Hramadzianie Biełarusi mohuć samastojna finansavać raschody na dobraŭparadkavańnie łakalnych terytoryj. Dla hetaha ŭ zakanadaŭstvie praduhledžana takaja norma, jak samaabkładańnie. Uznosy zjaŭlajucca dobraachvotnymi, uklučajucca ŭ miascovy biudžet i pavinny nakiroŭvacca na mety, vyznačanyja schodam miascovych žycharoŭ. Adnak na praktycy vyśviatlajecca, što srodki nie zaŭsiody raźmiarkoŭvajuć na pieršasnyja patreby ludziej.
Žycharka pasiołka Cahielnia Prybytkaŭskaha sielsavieta pasprabavała vyśvietlić, na što pajšli srodki samaabkładańnia, kali ŭ pasiołku svoječasova nie pravodzicca zamiena lichtaroŭ vuličnaha aśviatleńnia.
Z adkazu staršyni Prybytkaŭskaha sielsavieta Haliny Čumakovaj vyśvietliłasia, što zamienu lichtaroŭ za košt srodkaŭ, sabranych hramadzianami, zrabić nielha, bo hetyja vydatki pavinny finansavacca ź biudžetu.
Za 9 miesiacaŭ 2023 hoda miascovyja žychary pieraličyli ŭ Prybytkaŭski sielsaviet 2,2 tysiač rubloŭ, ź jakich 375 rubloŭ — unioski žycharoŭ Cahielni. Staršynia sielsavieta pryviała prykład vydatkavańnia srodkaŭ. Heta akazałasia adnaŭleńnie nadpisaŭ na pomniku sałdatam, zahinułym padčas Druhoj suśvietnaj vajny ŭ vioscy Klimaŭka.
Plita pomnika, na jakija byli patračany srodki samaabkładańnia. Fota: sozhnews.by
Inicyjatyva ramontu pomnika zychodziła ad adździeła ideałahičnaj raboty, kultury i pa spravach moładzi Homielskaha rajvykankama. Była praviedziena źvierka danych, naniesienych na pomniku, z proźviščami, apublikavanymi ŭ knizie «Pamiać». Adnak u miascovym biudžecie srodki na heta nie znajšlisia. U vyniku na vypraŭleńnie źviestak na plitach ź imionami zahinułych było vydatkavana 800 rubloŭ sa srodkaŭ samaabkładańnia.
Pry hetym u Klimaŭcy taksama chapaje nadzionnych prablem. Uvieś čas vyklikajuć narakańni darohi, a miascovyja žychary, nie padłučanyja da vodapravoda, na vosieńska-zimovy pieryjad zastajucca biez vady. Homielski rajžyłkamhas z hetaha hoda pierastaŭ čyścić miascovuju studniu ŭ suviazi z tym, što ŭ vioscy jość vodapravod. Kałonki ž na zimovy čas apłamboŭvajucca z-za taho, što ličylniki nie vytrymlivajuć minusavych tempieratur.
U vyniku vychodzić paradaksalnaja situacyja. Miascovyja žychary ŭ ciomny čas sutak vymušany pieramiaščacca ŭ pociemkach, dastaŭlać vadu ź inšych nasielenych punktaŭ, tamu što ź biudžetu nie vydzialajucca adpaviednyja srodki. Zatoje ich dobraachvotnyja ŭnioski iduć na ramont pomnika, kłopat ab jakich u nas dekłaruje dziaržava.
