Biełaruskija budaŭniki daroh na adnym z abjektaŭ va Ukrainie ŭ sakaviku 2020 hoda
Havorka viadziecca ab prysvajeńni biudžetnych srodkaŭ, za jakija rabiŭsia ramont 3,2 kiłamietra darohi ŭ Staravyžaŭskim rajonie Vałynskaj vobłaści. Adpaviedny tendar na praviadzieńnie darožnych rabot u 2019 hodzie vyjhrała ŭkrainska-biełaruskaja kampanija «Biełaŭtadar-Ukraina» (jaje majomaść i rachunki aryštavali paśla pačatku rasijskaha vajennaha ŭvarvańnia, ciapier kampanija znachodzicca ŭ stadyi bankructva), a raboty vykonvała ŭkrainskaje pradstaŭnictva bresckaha darožna-budaŭničaha tresta № 4, jaki ačolvaŭ Alaksandr Zarecki.
Košt rabot skłaŭ 13 miljonaŭ 491 tysiač hryŭniaŭ (krychu bolš jak paŭmiljona dalaraŭ u ekvivalencie pavodle kursa 2019 hodu. — RS).
U pryvatnaści, pavodle materyjałaŭ spravy, ukrainskaje pradstaŭnictva bresckaha darožna-budaŭničaha tresta № 4 vykarystoŭvała dla rabot asfaltna-bietonnuju sumieś horšaj jakaści, čym heta praduhledžvaŭ kantrakt, ale ŭ dakumientach pravodzili materyjały najvyšejšaj jakaści.
Spravu suprać hramadzianina Biełarusi zaviali 6 traŭnia 2020 hoda. Z taho momantu Alaksandr Zarecki znachodziŭsia va Ukrainie pad padpiskaj ab niavyjeździe. Ciapier jamu 63 hady.
Sud taksama pastanaviŭ kanfiskavać u Alaksandra Zareckaha majomaść, a taksama zabaraniŭ jamu na try hady zajmać adkaznyja pasady na pradpryjemstvach i va ŭstanovach.
Aproč taho, hramadzianin Biełarusi pavinien vypłacić kampiensacyju Departamientu infrastruktury Vałynskaj abłasnoj administracyi za naniesienuju škodu ŭ pamiery 1,363 miljona hryŭniaŭ (pryblizna 40 tysiač dalaraŭ pavodle aficyjnaha kursa Nacyjanalnaha banka Ukrainy. — RS), a taksama kampiensavać dziaržavie vartaść praviadzieńnia ekśpiertyz, jakaja skłała 16,8 tysiač hryŭniaŭ (470 dalaraŭ u ekvivalencie).
Asudžany moža abskardzić vyrak ciaham 30 dzion. Da momantu razhladu apielacyi vyrak nie nabudzie jurydyčnaj mocy, a Zarecki budzie zastavacca pad padpiskaj ab niavyjeździe z Ukrainy.
Da vajny biełaruskija darožnyja budaŭničyja kampanii vyjhravali miljardnyja tendary va Ukrainie. Raboty finansavali ź dziaržaŭnaha biudžetu Ukrainy.
Čytajcie taksama:
Premjer Słavakii nazvaŭ Ukrainu «najbolš karumpavanaj u śviecie»
U Polščy biełaruska zhubiła kašalok. Jaho prysabiečyŭ ukrainiec
