Prajekt rajonnaj doški honaru. Vyjava z orshanka.by
«Absalutna niepatrebnaja ideja. Marnavańnie biudžetnych srodkaŭ!» — taki kamientar sabraŭ najbolšuju kolkaść padabajek na staroncy «Aršanskaj haziety» ŭ sacyjalnaj sietcy «Ukantakcie». Siarod 23 kamientaroŭ da hetaj naviny nie znajšłosia nivodnaha prychilnaha. Anałahičnaja situacyja i na staroncy vydańnia ŭ Instagram.
«Čamu nie pytajucca ŭ žycharoŭ, kali prymajucca takija rašeńni? My ŭsie płacim padatki. Heta zmarnavanyja hrošy, a ŭ nas vartyja žalu dziciačyja placoŭki, brakuje abstalavańnia ŭ paliklinikach, nie kažučy ŭžo pra ramonty», — piša adzin z 43 kamientataraŭ u inście.
Aršancy pieraličvajuć dziasiatki abjektaŭ, na jakija možna było b vydatkavać hrošy.
«Kolki heta kaštuje? Bajusia navat ujavić», — pytajecca ŭdzielnik abmierkavańnia.
Ciapier doška honaru ŭ Oršy vyhladaje tak. Fota: orshanka.by
Na pytańnie pra košt abjekta ŭ rajoncy i jaje sacsietkach nichto nie adkazaŭ. Na aficyjnym sajcie Aršanskaha rajvykankama taksama niama nijakich źviestak pra košt novych stendaŭ.
Miarkujučy z rendara ŭ rajonnaj haziecie, novy haradski abjekt budzie adzin u adzin padobny da doški honaru, ustalavanaj u 2020 hodzie ŭ Viciebsku.
Doška honaru ŭ Viciebsku. Fota: viciebsk.cc
Heta dva stendy, ablicavanyja hranitam i dekaravanyja arnamientam z anadziravanaha aluminiju. Pamiž stendami — steła z hierbam Respubliki Biełaruś, ale ŭ aršanskim varyjancie na joj budzie raźmieščany hierb horada. Try hady tamu viciebskaja doška honaru abyšłasia haradskomu biudžetu bolš jak u 150 tysiač rubloŭ, abo ŭ 67 tysiač dołaraŭ pa tahačasnym kursie.
Čytajcie taksama:
U centry Oršy mužčyna pamior na tratuary
Na zavodzie ŭ Oršy adbyŭsia vykid pary, traŭmavanyja piaciora rabočych
U Oršy pabudujuć hrandyjozny vajskova-patryjatyčny centr dla dziaciej i moładzi
