Andrej Kušniaroŭ. Fota: jahonaja staronka ŭ fejsbuku
U niadzielu «Žoŭtyja źlivy» i inšyja praŭładnyja telehram-kanały pačali raspaviadać, što były vajar Andrej «Rycar» Kušniaroŭ pamior kala miesiaca tamu. Reposnuli dopis jak telehram-kanał hrodzienskaha HUBAZiK, hetak i niekatoryja mienšyja kanały.
Repost naviny «Žoŭtych źlivaŭ» z telehram-kanała hrodzienskaha HUBAZiK
U adkaz Kušniaroŭ paśmiajaŭsia z prapahandystaŭ u svaim Telegram-kanale. «Infapartniory z «Žoŭtych źlivaŭ» raptoŭna i zaŭčasna zachłynulisia ślinaj. Rycar žyvy», — napisaŭ jon.
Skrynšot z kanała «Rycarskija historyi»
«Naša Niva» sazvaniłasia z Andrejem:
«Pa-pieršaje, ja žyvy, to-bok, heta fejk. Pa-druhoje, takija rečy ŭkidajuć užo nie pieršy raz. Naprykład, z Nastaśsiaj «Sievier» była historyja, što znajšli padobnuju na jaje zabituju dziaŭčynu i navat vysyłali fatazdymki svajakam. To-bok, heta sproba akazać infarmacyjny cisk.
Na fota, jakoje raspaŭsiudziła prapahanda, sapraŭdy moj vajskovy kvitok. Niezrazumieła, ci jość jon u ich fizična abo heta tolki fota. Admietna, što ŭ dopisie na rasijskim sajcie-krynicy Wartears taksama jość fota ź niejkich maich dakumientaŭ, uziataje z bazy — mahčyma, prarasijskija resursy naładzili supracoŭnictva ź biełaruskimi śpiecsłužbami, kab atrymlivać źviestki biełarusaŭ.
Spačatku ja ŭ ich byŭ «bjuci-błohieram, jaki nie vajuje», paśla staŭ «bajevikom», paśla ŭvohule pamior. I ŭ ich čamuści heta vielmi dobra sychodzicca, što bajaźliviec, jaki niedzie tam chavajecca, moža pamierci na vajnie. Mahčyma, cikavaść da mianie taksama źviazanaja z tym, što ja jašče i «kiraŭnik ekstremisckaha farmiravańnia».
Ja prabyŭ u Pałku Kalinoŭskaha piać-šeść miesiacaŭ, z hetaha času ja nie tam. Ale jany ŭsich zapar biełarusaŭ, jakija vajavali va Ukrainie, «zapisvajuć» u połk.
Ich hetaja pravakacyja spracavała, bo mnie čałaviek 40 napisała, kab zapytacca, jak ja i ci nie pamior. Ciapier žyvu va Ukrainie, u asnoŭnym u Kijevie. Na zdaroŭje pakul nie skardžusia».
Andreju Kušniarovu 41 hod. Jon z Homiela, pracavaŭ u IT. Spačatku byŭ aktyvistam ruchu «Za Svabodu», ale ŭ krasaviku 2021-ha ŭstupiŭ u partyju «Demakratyčny sajuz», jakuju stvarali pad ehidaj Vaskrasienskaha. Davaŭ šmat intervju dziaržaŭnym ŚMI.
Paśla napadu Rasii na Ukrainu mužčyna pajechaŭ vajavać — dobraachvotnikam u Połk Kalinoŭskaha. Paśla sychodu z pałka ŭznačalvaje Asacyjacyju biełaruskich vieteranaŭ. Viadzie telehram-kanał «Rycarskija historyi», pryznany «ekstremisckim farmavańniem»
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
