Fota: Vsat.lt
Supracoŭniki pamiežnaj słužby Litvy zatrymali na miažy z Polščaj hruzavy mikraaŭtobus, u jakim hramadzianin Ukrainy sprabavaŭ vyvieźci ŭ adnu z krain Zachodniaj Jeŭropy hrupu nielehałaŭ, piša Delfi.lv.
U minuły aŭtorak litoŭskija pamiežniki, jakija kantralavali ŭčastak šašy Maryjampale — Suvałki, źviarnuli ŭvahu na padazrony mikraaŭtobus Volkswagen Crafter z łatvijskimi numarami.
Za rulom aŭtamabila znachodziŭsia 41-hadovy ŭkrainiec, a ŭ hruzavym adsieku pamiežniki znajšli 17 nielehałaŭ. Usie jany pradstavilisia hramadzianami Banhładeš va ŭzroście ad 19 da 43 hadoŭ.
Kiroŭcu i jaho pasažyraŭ dastavili na błokpost, dzie ŭkrainiec pryznaŭsia, što arandavaŭ u Łatvii mikraaŭtobus i na im pieravoziŭ zamiežnikaŭ z Ryhi ŭ Polšču. U vypadku paśpiachovaj dastaŭki jamu abiacali 1000 jeŭra.
Vyśvietliłasia, što hetyja ludzi nielehalna pranikli ŭ Łatviju ź Biełarusi. Skarystaŭšysia pasłuhami pieravozčyka, jany płanavali dabracca da adnoj z krain Zachodniaj Jeŭropy z Łatvii praź Litvu i Polšču.
Raspačataje dasudovaje rasśledavańnie pa fakcie niezakonnaha pieramiaščeńnia ludziej praź dziaržaŭnuju miažu, što karajecca terminam da vaśmi hadoŭ.
Nieŭzabavie zatrymanych płanujecca pieradać pamiežnikam Łatvii. U čaćvier sud vynies rašeńnie adpravić hramadzianina Ukrainy pad aryšt na try miesiacy.
Čytajcie taksama:
Litoŭskija pamiežniki ŭžo vośmy dzień nie sustrakajuć mihrantaŭ z boku Biełarusi
Łukašenka pra nielehalnych mihrantaŭ: My nikoha tut łavić nie budziem
