Fota: pres-słužba ADKB
Alaksandr Łukašenka ŭkazam № 344 ad 2 listapada ŭnios źmieny va ŭkaz № 116 ad 25.03.2003 hoda «Ab pytańniach źniešniaj raźviedki». 4 listapada dakumient aficyjna apublikavany na Nacyjanalnym pravavym internet-partale i ŭstupaje ŭ siłu adrazu paśla apublikavańnia.
Va ŭkazie vyłučanaja hałoŭnaja meta źniešniaj raźviedki. Heta «vyklučeńnie raptoŭnaści ŭźniknieńnia za miežami Respubliki Biełaruś pahroz nacyjanalnaj biaśpiecy i svoječasovaje zabieśpiačeńnie kiraŭnictva krainy nieabchodnaj infarmacyjaj dla pryniaćcia adpaviednych rašeńniaŭ».
U pieralik asnoŭnych zadač źniešniaj raźviedki ciapier dadadziena «realizacyja papieradžalnych mier pa niedapuščeńni škody nacyjanalnym intaresam i biaśpiecy Respubliki Biełaruś z boku śpiecyjalnych słužbaŭ i arhanizacyj zamiežnych dziaržaŭ, terarystyčnych i ekstremisckich arhanizacyj, arhanizavanych złačynnych hrup i asobnych asob».
Jak viadoma, u śpis ekstremisckich arhanizacyj dadadzienyja mnohija srodki masavaj infarmacyi, redakcyi jakich byli vymušanyja pakinuć Biełaruś paśla 2020 hoda i ciapier znachodziacca za miažoj. Taksama ŭ hety śpis uklučajuć i asobnych ludziej.
U novaj redakcyi taksama dajecca aznačeńnie źniešniaj raźviedki. Ciapier heta «asablivy vid dziejnaści subjektaŭ źniešniaj raźviedki, jaki praduhledžvaje abaronu nacyjanalnych intaresaŭ Respubliki Biełaruś šlacham zdabyvańnia i vykarystańnia raźviedvalnaj infarmacyi, a taksama akazańnia sadziejańnia dziaržaŭnym orhanam i arhanizacyjam u realizacyi mier u halinie palityčnaha i sacyjalna-ekanamičnaha raźvićcia Respubliki Biełaruś».
Raniej u vyznačeńni była prapisanaja «abarona žyćciova važnych intaresaŭ asoby, hramadstva i dziaržavy».
Raźviedvalnyja słužby orhanaŭ dziaržaŭnaj biaśpieki ciapier buduć vieści raźviedku va ŭsich śfierach nacyjanalnaj biaśpieki. Raniej hetyja śfiery byli kankretyzavanyja.
Raźviedvalnyja słužby Uzbrojenych sił buduć vieści raźviedku ŭ vajskovaj śfiery, jakaja ŭklučaje raźviedku ŭ vajskova-palityčnaj, vajskova-stratehičnaj, vajskova-techničnaj, infarmacyjnaj, vajskova-ekanamičnaj, vajskova-ekałahičnaj, vajskova-bijałahičnaj śfierach. U novaj redakcyi dadadzienyja vajskova-stratehičnaja, infarmacyjnaja i vajskova-bijałahičnaja śfiery.
Orhany pamiežnaj słužby buduć zajmacca raźviedkaj u śfiery praviadzieńnia dziaržaŭnaj pamiežnaj palityki ŭ intaresach achovy miažy i harantavańnia pamiežnaj biaśpieki.
Raźviedvalnyja słužby atrymlivajuć paŭnamoctvy na «stvareńnie lehiendarnych arhanizacyj abo ich padraździaleńniaŭ, apieratyŭnych ulikaŭ, daviedačnych, infarmacyjnych sistem i elektronnych infarmacyjnych resursaŭ, nieabchodnych dla funkcyjanavańnia raźviedvalnych słužbaŭ». Raniej jany mahli tolki ŭnosić prapanovy «ab stvareńni arhanizacyj abo ich padraździaleńniaŭ, nieabchodnych dla funkcyjanavańnia raźviedvalnych słužbaŭ».
