Vyjava: vecteezy
U adnym z daśledavańniaŭ, u jakim udzielničała bolš za 50 000 čałaviek, 95% hieteraseksualnych mužčyn skazali, što jany zvyčajna abo zaŭsiody adčuvajuć arhazm padčas seksualnaj blizkaści, u toj čas jak tolki 65% hieteraseksualnych žančyn skazali toje ž samaje.
Niekatoryja ludzi ličać, što hety razryŭ źviazany z tym, što žanočy arhazm bijałahična niaŭłoŭny ci ŭvohule iluzorny. Kali b heta było praŭdaj, uzrovień žanočaha arhazmu nie adroźnivaŭsia b u zaležnaści ad abstavin. Adnak nasamreč mnohija daśledavańni pakazvajuć, što žančyny adčuvajuć bolš intensiŭny arhazm, kali znachodziacca ŭ adzinocie, čym z partnioram.
Jak minimum 92% žančyn atrymlivajuć arhazm, kali zadavalniajuć siabie samastojna, pryvodzić niesuciašalnuju statystyku The Conversation. Žančyny taksama arhazmujuć bolš padčas stałych adnosin u paraŭnańni z vypadkovym seksam. U daśledavańni z udziełam bolš čym 12 000 studentaŭ tolki 10% žančyn skazali, što adčuvali arhazm padčas pieršaha spatkańnia — u paraŭnańni z 68%, jakija atrymlivali asałodu ad seksu ŭ blizkich adnosinach.
Čamu tak adbyvajecca?
Va ŭsich hetych scenarach, kali žančyny čaściej dasiahajuć kulminacyi, bolšaja ŭvaha nadajecca stymulacyi klitara, jakaja patrabujecca bolšaści žančyn dla dasiahnieńnia arhazmu. Heta maje sens, uličvajučy, što klitar i pienis majuć vielmi padobnuju pryrodu i pierapoŭnienyja adčuvalnymi da dotyku niervovymi kančatkami i erektylnaj tkankaj.
Prafiesarka Łory Minc (Laurie Mintz), jakaja vykładaje psichałohiju čałaviečaj seksualnaści ŭ Fłarydskim univiersitecie, dla adnoj sa svaich prac pravodziła apytańnie siarod vialikaj kolkaści žančyn, pytajučysia pra samy nadziejny šlach da arhazmu. Pa słovach spadaryni Minc, tolki 4% apytanych kazali pra praniknieńnie, u toj čas jak astatnija 96% kazali pra stymulacyju klitara — samastojna abo ŭ spałučeńni z praniknieńniem.
Takim čynam, hałoŭnaja pryčyna «razryvu arhazmaŭ» u tym, što žančyny nie atrymlivajuć nieabchodnaj stymulacyi klitara. I šmatlikija kulturnyja paterny, źviazanyja z pałavym aktam, u cełym spryjajuć hetamu: sapraŭdy, nieźličonaja kolkaść filmaŭ, telepieradač, knih i pjes pakazvaje, što žančyny atrymlivajuć arhazm ad zvyčajnaha pałavoha aktu z praniknieńniem i biez stymulacyi klitara. Papularnyja mužčynskija časopisy časta dajuć parady ab pozach pry pałavym akcie, kab davieści žančyn da arhazmu. I choć niekatoryja z pazicyj uklučajuć u siabie stymulacyju klitara, asnoŭny mesedž tut pa-raniejšamu ŭ tym, što praniknieńnie źjaŭlajecca centralnym i samym važnym u seksie, a stymulacyja klitara časta razhladajecca tolki jak «preludyja», ci, inačaj kažučy, mienšaja forma seksu.
Niadziŭna, što zhodna z daśledavańniami mužčyny adčuvajuć siabie bolš mužnymi, kali ich partniorka adčuvaje arhazm. Jak i niadziŭna, što žančyny mohuć imitavać arhazm, pierš za ŭsio padčas pałavoha aktu, kab abaranić eha partniora. Sapraŭdy, daśledavańni pakazvajuć, što ad 53% da 85% žančyn pryznajucca, što imitujuć arhazm. Niekatoryja daśledavańni pakazvajuć, što bolšaść žančyn chacia b raz u žyćci imitavali arhazm.
Likvidacyja razryvu
Adnak nie ŭsio tak zmročna. Uličvajučy ŭpłyŭ kulturnych faktaraŭ na «razryŭ miž arhazmami», źmianieńnie našaha staŭleńnia da seksu i pałavoha aktu moža dapamahčy značna palepšyć seksualny dośvied žančyn. Sapraŭdy, važna infarmavać ludziej ab tym, što žančyny nie majuć abmiežavanaj bijałahičnaj zdolnaści da arhazmu. Tamu seksualnaja adukacyja mužčyn i žančyn moža źmianić situacyju ŭ lepšy bok.
Tym nie mienš takija viedy sami pa sabie naŭrad ci likvidujuć «razryŭ» na asabistym uzroŭni. Zhodna z papularnaj knihaj pa seksualnaj terapii (Principles and Practice of Sex Therapy), žančynam patrebnyja navyki, kab prymianić hetyja viedy na praktycy. Heta aznačaje, naprykład, što žančyn treba zaachvočvać da masturbacyi, kab daviedacca, čaho jany žadajuć u seksualnym płanie. I heta treba spałučać z navučańniem kamunikacyi, kab jany mahli dzialicca hetaj infarmacyjaj z partniorami.
Žančyny pavinny adčuvać prava na zadavalnieńnie i mahčymaść atrymlivać takuju ž stymulacyju jak u adzinocie, tak i z partnioram. Heta aznačaje, što hieteraseksualnyja pary pavinny pazbavicca staroha kłasičnaha scenara, jaki patrabuje preludyi z dalejšym pałavym aktam z abaviazkovym praniknieńniem, paśla jakoha seks zakančvajecca. Zamiest hetaha partniory mohuć atrymlivać arhazm pa čarzie z dapamohaj aralnaha seksu abo manualnaj stymulacyi, kali partniorka atrymlivaje arhazm, a potym nastupaje kłasičny pałavy akt. Akramia taho, žančyny mohuć dakranacca i stymulavać siabie rukami abo vibrataram padčas zvyčajnaha pałavoha aktu. Darečy, daśledavańni pakazvajuć, što žančyny, jakija vykarystoŭvajuć vibratar, atrymlivajuć bolš arhazmaŭ.
Važna adznačyć, što roŭnaść arhazmaŭ — heta značna bolš, čym prosta jakasny seks. Adčuvańnie prava na zadavalnieńnie pavialičvaje jak svabodu žančyny ŭ tym, kab kazać partnioram, čaho jany žadajuć u seksualnym płanie, tak i žanočuju svabodu ŭ asabistaj seksualnaj abaronie.
Tak, daśledavańnie pakazała, što pačućcio prava na seksualnaje zadavalnieńnie pavialičvaje ŭpeŭnienaść žančyn jak u admovie ad seksualnych dziejańniaŭ, jakija im nie padabajucca, tak i ŭ vykarystańni abarony ad ciažarnaści i infiekcyj, jakija pieradajucca pałavym šlacham.
Zhodna ź inšym artykułam ab seksualnym vychavańni i zadavalnieńni, napisanym dvuma amierykanskimi daśledčykami achovy zdaroŭja, kali maładyja ludzi daviedajucca, što seks pavinien prynosić zadavalnieńnie, u ich budzie mienš šancaŭ vykarystoŭvać jaho ŭ manipulatyŭnych i škodnych metach. Takim čynam, navučańnie tamu, što seks — heta zadavalnieńnie dla abaich partnioraŭ, a nie toje, što robiać z žančynami dziela zadavalnieńnia mužčyn, taksama moža dapamahčy źnizić uzrovień seksualnaha hvałtu.
Čytajcie taksama:
Paśla arhazmu (asabliva razam) lepš śpiš, ciapier aficyjna
Štučny intelekt paprasili samastojna vizualizavać arhazm. Voś što z hetaha atrymałasia
