Skrynšot z adnaho z praŭładnych akaŭntaŭ u tvitary, «Naviny Kaściukovičy»
«Śviatłana Cichanoŭskaja prapanavała zabivać paleścinskich dziaciej vusnami «čałavieka ź jaje kamandy» — takoje pasłańnie pravodziać u Ch (byłym tvitary) akaŭnty, źviazanyja z łukašenkaŭcami.
Raźličany hety post na čytača, jaki nie viedaje rasiejskaj movy i nie viedaje, chto takaja Taćciana Martynava. Efiekt nievialiki — u pastoŭ da pary socień prahladaŭ i zusim niama reakcyj. A na samich akaŭntach dziaržaŭnych prapahandystaŭ — vobmal padpisantaŭ.
Prykłady publikacyj u tvitary ad biełaruskich praŭładnych resursaŭ
Ahułam takich publikacyj kala pary dziasiatkaŭ, usie jany całkam kapirujuć pieršapačatkovy tekst «Žoŭtych źlivaŭ» — śmiećcievaha kanała, stvoranaha dla dyskredytacyi apanientaŭ Alaksandra Łukašenki. Asobna my źviarnuli ŭvahu na kamientary — amal usie jany adnolkavyja i ad praŭładnych aktyvistaŭ.
Kamientary pad publikacyjaj «Žoŭtych źlivaŭ»
Siarod kamientataraŭ — kiraŭnica barysaŭskaha BRSM Uładzisłava Krahileva (jana zapościła toje samaje i Ukantakcie), kiraŭnica biarezinskaha BRSM Kaciaryna Aŭramčyk, hałoŭny redaktar praŭładnaj haziety «Słonimski vieśnik» Kirył Laščenka i kiraŭnik adździeła ideałohii Hrodzienskaha harvykankama Uładzimir Saciuk, jaki da 2019-ha byŭ namieśnikam načalnika hrodzienskaj milicyi.
Chto takaja Taćciana Martynava i što jana skazała?
Adznačym, što Taćciana Martynava, jakaja ź viasny 2020-ha viadzie błoh «Chopić bajacca», anijakim čynam sa štabam Śviatłany Cichanoŭskaj nie źviazanaja. Cichanoŭskaha jana nazyvała hopnikam, a Cichanoŭskuju — «p*****c».
Taćciana Martynava ŭ Biełarusi była radyjoviadoŭcaj i suŭładalnicaj bara «Piatnica». Uviesnu 2020-ha jana stvaryła palityčny błoh «Chopić bajacca» i praz pahrozu pieraśledu ŭ lipieni 2020-ha adnoj ź pieršych vyjechała ź Biełarusi.
Jana časta vykazvaje marhinalnyja idei, jakija cytujuć dziaržaŭnyja miedyja. Asabliva časta — «Žoŭtyja źlivy».
Hetym razam jana vykazałasia pra paleścinskich dziaciej. Maŭlaŭ, jany adroźnivajucca ad izrailskich tym, što ich ź dziacinstva vučać nienavidzieć habrejaŭ. «A ŭ 16 hadoŭ maci daje dziciaci aŭtamat i kaža: zabi habreja», padsumavała jana.
Paśla hetaha na Martynavu źviarnuli ŭvahu tureckija ŚMI. Blizkaje da Erdahana miedyja Ahaber apublikavała jaje z zahałoŭkam «Hniusnaje vykazvańnie biełaruskaj žurnalistki pra paleścinskich dziaciej». Padchapili jaho i inšyja miedyja ŭ musulmanskich krainach, jaje vykazvańni cytujucca ŭ sotniach publikacyj.
Hetaja zajava adlustroŭvaje pierakanańni samoj Martynavaj. Ale anivodnaja biełaruskaja struktura jaje nie padtrymała.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
U čym fienomien CHAMAS? U čym ich ideja i adkul jany ŭzialisia? Raskazvaje arabist
Mirnaje nasielnictva Hazy praktyčna pazbaŭlena mahčymaści adtul vybracca, navat u Jehipiet
Paśla rozhałasu ŭ internecie z sajta «Minskaj praŭdy» vydalili antyizrailski artykuł
Cikava, zahuhliŭ hetyŭ martynavu... A jana našuju movu ŭvohule viedaje? Ci heta taki pryjom noŭnejmaŭ, kab zrabić bačnaść što jość słuchačy - rabić rasiejskamoŭny kancient ... "avoś kto i zajdiet"?