Niečakana sumny praciah atrymała historyja dymčataj kotki, jakaja ŭ pačatku žniŭnia ŭ Maładziečnie ŭ dvary doma Uschodniaha mikrarajona ciarpliva čakała haspadyniu. Zaraz Volha sa ślazami na vačach vymušana ź joj rasstacca, piša Kraj.by.
Kotku ŭ kancy lipienia zaŭvažyli ŭ dvary žychary piacipaviarchovika №140 na Vialikim Haścincy. Niekalki dzion i načej zapar vusataja pryhažunia ŭ travie pad kustom ciarpliva kahości čakała. Žychary doma navat pačali šukać joj novych haspadaroŭ.
Fota: Kraj.by
Na toj momant historyja skončyłasia ščaśliva. Vyśvietliłasia, što haspadynia kotki Volha pracuje ŭ Minsku paźmienna — dva dni praz dva. U čarhovy adjezd haspadyni na pracu Basia prosta źbiehła ad jaje.
«Ja nie mahu vykinuć Basiu na vulicu ci addać pieršamu sustrečnamu»
U sieradu Volha patelefanavała žurnalistam z balnicy i paprasiła ab dapamozie. Miedycynski ahlad pakazaŭ, što Volha ŭ siłu źmienaŭ stanu zdaroŭja bolš nie moža žyć u adnym pamiaškańni z žyviołami. Kali praciahvać pražyvać razam z Basiaj, u žančyny budzie raźvivacca alerhičnaja reakcyja.
— Na žal, taki vierdykt doktara, — kaža Volha. — Daktary zabaranili mnie trymać kotku. Viadoma ž, ja nie mahu jaje prosta vykinuć na vulicu. Ale i addać pieršamu sustrečnamu, aby zbyć z ruk, ja taksama nie hatovaja. Usio ž taki piać hadoŭ razam pražyli. A ciapier ža chapaje drennych ludziej i navat žyvadzioraŭ. Chaciełasia b znajści novych haspadaroŭ, jakija palubiać Basiu i buduć pra jaje kłapacicca. Ja padumała, što dziakujučy žurnalistam my zmožam znajści takich ludziej, jakim nie pabaimsia jaje davieryć i budziem spakojnymi za dalejšy los Basi. Jana, darečy, niadaŭna znoŭ nachulihaniła, źbiehła z kvatery, my jaje znajšli praź piać dzion. Padabrała žančyna ŭ našym mikrarajonie, praz dva damy, ale ŭ jaje svoj kot, tamu i jana nie moža zabrać Basiu.
Fota: Kraj.by
Zaraz kotka časova žyvie ŭ Naści, dački Volhi, i zabaŭlajecca z Rościkam, maleńkim synam Naści.
— Basia ładzić ź dziećmi, kali, viadoma, jany nie ciahajuć jaje za chvost i vusy, inakš albo padrapaje, albo ŭciače pad najbližejšuju kanapu. Rościk pra heta ŭžo viedaje, — uśmichajecca Naścia.
— Niemahčyma pieradać, jak nam škada rasstavacca z Basiaj, ale i ja nie mahu pakinuć jaje ŭ siabie. Heta žyllo my zdymajem, a haspadynia kvatery suprać žyvioł. Mamina siastra žyvie ŭ Lebiedzievie (miastečka pad Maładziečnam), ale ŭ jaje svaich šeść ci siem kotak. U maminaj plamieńnicy sabaka. I tam nijak. Nie ŭžyvucca. Moj dziadula ŭžo stareńki, nie zmoža jaje trymać. U majho brata dva miesiacy tamu naradziłasia dačka, dy i jaho siamja žyvie na zdymnaj kvatery. Jak bačycie, my pierabrali ŭsie varyjanty i nie znajšli nijakaj mahčymaści addać kotku svajakam. Vyjście adno — šukać novych haspadaroŭ, ale abaviazkova takich, jakija palubiać Basiu i buduć pra jaje kłapacicca.
Fota: Kraj.by
Naścia adznačaje, što ŭ ježy Basia niepieraborlivaja. Tolki ryby nie lubić. Lubimy łasunak — syroje kurynaje miasa. Jeść vadkija kacinyja karmy. Z zadavalnieńniem jeść suchi korm «Darlinh».
Zachoča pić, a ŭ paiłcy vady nie budzie, biez prablem zabiarecca na kuchni da vadapravodnaha krana i pačnie jaho ablizvać. Basia łaskavaja, hullivaja, ale za žyvot jaje lepš nie čapać. Samaja cikavaja asablivaść — jana pa-čałaviečamu chrapie ŭ śnie.
Fota: Kraj.by
— Basia sterylizavanaja. Na vulicu budzie rvacca, kali pačnie padazravać, što vy źbirajeciesia nadoŭha pakinuć jaje adnu, i joj pryjdziecca sumavać, — źviartaje ŭvahu Naścia. — Mama źjazdžała na dvoje sutak u Minsk na pracu, i Basia, adčuvajučy heta, chacieła ŭciačy. Ciarpieć nie moža adzinoty. My z Rościkam pastajanna doma — i ŭ jaje navat dumka pra ŭcioki nie ŭźnikaje. Tolki na bałkon moža vyjści, dyj to nienadoŭha. Što tyčycca vydatkaŭ na jaje ŭtrymańnie, to my ich prosta nie zaŭvažajem. Śpiecyjalnaha artykuła vydatkaŭ na kotku ŭ biudžecie niama. Zachapić joj u kramie pajeści — heta jak chleba ci małaka kupić.
Dobrym ludziam, jakija zabiaruć Basiu i buduć pra jaje kłapacicca, Naścia padoryć novy łatok, pieranosku i lažanku.
Volha, Naścia, Rościk i Basia. Fota: Kraj.by
Kali vy chočacie zabrać Basiu da siabie, patelefanujecie Anastasii pa telefonie: 8 (029) 584-02-74. Abo nabiarycie numar Volhi: 8 (029) 872-04-81.
Čytajcie taksama:
U Brytanii znajšli kotku z dvuma nasami
U vioscy pad Hrodnam znajšli zialonaje kaciania. I heta jaho naturalny koler
«Treciaj zimy Bim moža nie pieranieści». Pad Maładziečnam sabaka-achoŭnik druhi hod žyvie na łancuhu
