Ilustracyjnaje fota «Naša Niva»
Prastuda i anhina — spadarožniki vosieni
Hryp jak taki ŭ vosieński pieryjad davoli redki — jašče nie siezon. «Vosieńskaja chvaroba» — prastuda. Časta heta adenavirusnaja infiekcyja ci staraja znajomaja anhina. Abiedźvie jany paškodžvajuć mindaliny i nasahłotku.
Simptamatyčna adenavirus padobny na virus hrypu, tolki radziej daje charakternyja dla jaho ciažkija ŭskładnieńni. A tak usio padobna — chvaroba pačynajecca z pavyšeńnia tempieratury, hałaŭnoha bolu, słabaści, myšačnych bolaŭ i źnižeńnia apietytu. Časam moža naziracca pačyrvanieńnie vačej, kanjunktyvit i pavieličeńnie limfavuzłoŭ.
Źnižany imunitet daje dobruju hlebu dla rezkaha i bieskantrolnaha razmnažeńnia tak zvanych umoŭna-patahiennych bakteryj, jakija žyvuć na padniabiennych mindalinach. Pačynaje baleć horła, padymajecca tempieratura, łomić u sustavach. Mindaliny pavialičvajucca i pakryvajucca charakternym biełym nalotam — mienavita tak zajaŭlaje pra siabie anhina. Lačeńnie anhiny čaściej za ŭsio składajecca ŭ pryjomie kursa antybijotykaŭ, ale adenavirusnaja infiekcyja (jak i inšyja reśpiratornyja virusnyja infiekcyi) ich nie baicca. Tamu nielha prymać antybijotyki biez pryznačeńnia śpiecyjalista. Za heta možna raspłačvacca da kanca žyćcia dysbakteryjozam abo inšymi ŭskładnieńniami.
Vielmi važna chałodnaj vosieńniu apranacca pa nadvorji: ciopła, ale nie tak, kab pad kučaj adzieńnia vy ŭvieś čas adčuvali siabie mokrym ad potu. Abutak pavinien być nadziejny, kab raz i nazaŭždy vyklučyć niepryjemnuju mahčymaść pramačyć nohi.
Nie lanujciesia brać z saboj parason. Adkrytaja ŭ chałodnaje nadvorje šyja — lohkaja zdabyča dla anhiny. Achoŭvajcie jaje, nie zabyvajučy nadzieć śvitar z vysokim kaŭniarom ci šalik.
Cystyt i zapaleńnie nyrak
Prastudzić lohka možna nie tolki horła ci dychalnyja šlachi, ale taksama nyrki i močapałavuju sistemu. Pra takija chvaroby, jak cystyt abo pijełaniefryt čaściej za ŭsio my ŭspaminajem mienavita ŭ vosieńska-zimovy pieryjad. Pry hetym cystyt źjaŭlajecca «pieršyncam», ź jakoha vyrastaje mnostva zapalenčych paškodžańniaŭ močapałavoha traktu, u tym liku i zapaleńnie nyrak — pijełaniefryt.
Cystyt prychodzić razam z častymi abciažaranymi i balučymi pozyvami da močaspuskańnia. U takija momanty chočacca addać usio, kab mieć mahčymaść schadzić u tualet biez bolu.
Mača mutnieje, tempieratura cieła pavyšajecca da subfiebrylnaj, pieraśleduje ahulnaje niedamahańnie. Zapuščanaja chvaroba maje i chraničnuju formu — u pieryjad remisii ničoha nie nahadvaje ab joj, akramia chiba što pačaščanaha močaspuskańnia. Ale projdzie niekatory čas, i pieryjad abvastreńnia znoŭ zajavić ab sabie. Heta chvaroba nie lubić, kali jaje zapuskajuć. Chvarobatvornyja mikroby, jakija i vyklikajuć cystyt, lohka padymajucca pa močavyvodziačych šlachach až da nyrak.
Tak uźnikaje ŭzychodny pijełaniefryt, jaki pa pačatkovych simptomach padobny da banalnaj prastudy: pavyšajecca tempieratura, źjaŭlajucca hałaŭnyja boli i młosnaść. Ale jość i jarkija admietnyja prykmiety — boli ŭ vobłaści pajaśnicy zzadu, jakija addajuć u žyvot, ściahno i pachvinnuju vobłaść. Pijełaniefryt lohka stanovicca chraničnym zachvorvańniem. Jon moža ŭvieś čas turbavać tupymi nyjučymi bolami ŭ pajaśnicy, asabliva ŭ syroje chałodnaje nadvorje, a taksama enurezam abo balučym močaspuskańniem, jak pry cystycie.
Hałoŭnaja abarona ad cystytu — paźbiahać pieraachaładžeńnia. Nielha doŭha siadzieć u adnoj pozie, asabliva ŭ chałodnym pamiaškańni, treba paźbiahać praźmiernych fizičnych nahruzak, nieracyjanalnaha charčavańnia, pastajannaha niedasypańnia, stresaŭ. Dastatkova tonkaj bializny pad mini-spadnicaj, i cystyt nie prymusić siabie čakać.
Vysoki cisk, bol u sustavach, jazva
U hipiertonikaŭ vosieńniu svaje kłopaty. Niespakojnaje nadvorje niasie z saboj skački atmaśfiernaha cisku, i, takim čynam, pavyšajecca cisk arteryjalny. Dozu nieabchodnych lekaŭ davodzicca pavialičvać i być uvieś čas napahatovie, trymać pad rukoj tanomietr.
Nielha abyści ŭvahaj i boli ŭ sustavach. Sprava ŭ tym, što sustavy, choć by adnojčy paciarpieŭšy ad luboha ŭździejańnia (niachaj heta budzie traŭma ci zapaleńnie), stanoviacca bolš porystymi i pačynajuć prapuskać vilhać. U drennaje nadvorje vilhotnaść pavietra pavyšana, a značyć, bolš rastvoranaj u pavietry vady zdolna prakraścisia praz skurnaje pokryva ŭ paškodžanyja ŭčastki kaścianoj tkanki. Mienavita tamu našy kostki časam «nyjuć» pierad daždžom ci śniehapadam.
Kali vy pakutujecie na asteachandroz, vosieńskija miesiacy taksama nie projduć bieź śledu. Rezki bol, prastreły pry ruchach u šyi i pajaśnicy mohuć naviedvać u niekalki razoŭ čaściej. A vyratavańnie prostaje — nie lenavacca i rabić śpiecyjalnuju lačebnuju zaradku.
Jazvavaja chvaroba ŭ vosieński pieryjad taksama časta abvastrajecca. Varta naviedać svajho ŭrača i zahadzia pryniać prafiłaktyčnaje lačeńnie. Kurs śpiecyjalnych preparataŭ dapamoža paźbiehnuć niepažadanaha abvastreńnia zachvorvańnia.
Užyvajcie pryrodnyja antybijotyki
Daŭno zaŭvažana: syty čałaviek nie stomicca i nie źmierźnie — pry pieratraŭlivańni ježy vyłučajecca hetak nieabchodnaja arhanizmu ciepłynia. Ale enierhiju arhanizmu dajuć nie białki, a tłuščy i vuhlavody. Usiaho 200 hramaŭ ranišniaj kašy z masłam dapamohuć nie źmierznuć pa darozie na pracu abo va ŭniviersitet.
U abied nie admaŭlajcie sabie ŭ białkovaj ježy. Miasa, ryba, ptuška źmiaščajuć vialikuju kolkaść białkoŭ, niezamiennych tłustych kisłot, vitaminaŭ, narešcie, žaleza i cynku ŭ lohkazasvajalnaj formie. Jany dapamahajuć nam umacavać imunitet, pavysić pracazdolnaść, adčuvać siabie badziorymi i aktyŭnymi ŭ samaje zołkaje nadvorje. Pry niedachopie ŭ vosieńskim racyjonie miasnoj ježy raźvivajecca aniemija, źjaŭlajecca słabaść, drymotnaść, źnižajucca achoŭnyja siły arhanizma. Zrazumieła, časovaja admova ad miasa moža akazać dabratvorny ŭpłyŭ na arhanizm. Adnak vosień — nie samy lepšy čas dla viehietaryjanstva.
Nie zabyvajcie ab pryrodnych antybijotykach — chrenie, cybuli i časnyku. Hetyja aharodninnyja prypravy zdaŭna vykarystoŭvalisia dla baraćby z prastudnymi zachvorvańniami. Chren źmiaščaje ŭ 5 razoŭ bolš vitaminu S, čym cytrusavyja.
Karani hetaj raśliny našpihavanyja vielizarnaj kolkaściu cukroŭ, minieralnych solaŭ, efirnych alejaŭ, fitancydaŭ, utrymlivajuć vitaminy hrupy V, nikacinavuju kisłatu i lizacym. Chren vałodaje bakterycydnym, supraćzapalenčym dziejańniem, zdolny nadziejna abaranić nas ad prastudy pry rehularnym užyvańni. Jaho jaduć pry ŭpadku sił i stomie.
Cybula bahataja na efirnyja alei, vitaminy S i hrupy V, fłavanoidy, žaleza i minieralnyja rečyvy. Cybulny sok akazvaje vydatnaje antybakteryjalnaje dziejańnie, utrymlivaje raślinnyja harmony, jakija źnižajuć uzrovień cukru ŭ kryvi. Dla abarony ad prastudy nieabchodna źjadać pałovu siaredniaj syroj cybuliny ŭ dzień.
Časnok vałodaje vydatnym antybakteryjalnym, supraćvirusnym i imunastymulacyjnym dziejańniem. Z dapamohaj časnaku zdaŭna lačyli nie tolki prastudu, ale i čumu, chaleru, vospu. Ciapier nam viadoma, što časnok vałodaje supraćrakavym dziejańniem, źnižaje chalesteryn i razredžvaje kroŭ.
U lubuju paru hoda starajciesia ŭžyvać jak maha bolš harodniny, listavoj zielaniny, sadaviny. Papieścicie siabie prysmakami. Sałodkaje prosta nieabchodna dla dobraha nastroju i pavyšeńnia pracazdolnaści va ŭmovach niedachopu śviatła i ciapła. Šakaład, haračaja kakava abo pirožnaje dadaduć badzioraści i ŭpeŭnienaści ŭ sabie.
Čytajcie taksama:
Jak pravilna pryhatavać chatnija zapasy i nie atrucicca imi?
Dzieci mohuć prapuskać u škole da piaci dzion biez daviedki — Minzdaroŭja
Dažyć da 120 moža stać mahčymaj pierśpiektyvaj
