Zhodna sa źmienami, što rychtujucca, esemeskaj zmohuć vyklikać u vypadku mabilizacyi, a taksama na mierapryjemstvy pa mabilizacyjnaj padrychtoŭcy. Fota: Minabarony
Zakonaprajekt «Ab źmienie zakonaŭ pa pytańniach zabieśpiačeńnia nacyjanalnaj biaśpieki», apublikavany na Nacyjanalnym pravavym internet-partale, praduhledžvaje siarod inšaha papraŭki ŭ zakon «Ab voinskim abaviazku i voinskaj słužbie».
Uvodzicca novy vid pozvy — pa SMS. «Hramadzianie mohuć być apavieščanyja ab nieabchodnaści jaŭki ŭ vajskovy kamisaryjat, upraŭleńnie Kamiteta dziaržaŭnaj biaśpieki pa vobłaści z dapamohaj SMS-paviedamleńnia».
Esemeskaj mohuć vyklikać u vypadku mabilizacyi, a taksama na mierapryjemstvy pa mabilizacyjnaj padrychtoŭcy.
Apieratary elektrasuviazi buduć abaviazanyja rassyłać SMS pa śpisach ad vajenkamataŭ i KDB.
Akramia taho, apierataram daviadziecca na zapyt vajenkamataŭ abo KDB u tydniovy termin pieradavać źviestki ab numarach hramadzian, jakija stajać na vajskovym uliku abo abaviazanyja na im stajać.
A sami hramadzianie pavinny buduć paviedamlać u vajenkamat ab źmienie asabistaha numara telefona.
Što tyčycca papiarovych pozvaŭ pad raśpisku, ich zaraz možna budzie ŭručać nie tolki pa miescy žycharstva pryzyŭnika, ale i pa miescy pracy i «miescy znachodžańnia» — praściej kažučy, u lubych miescach, dzie čałavieka vyjaviać. Zajmacca raznosam pozvaŭ zmohuć pracaŭniki lubych arhanizacyj, na jakija takuju zadaču ŭskładuć vajenkamat, miascovy vykankam ci KDB.
Raspaŭsiudžvać infarmacyju ab mabilizacyi i nieabchodnaści jaŭki ŭ vajenkamaty abaviažuć i ŭsie zarehistravanyja ŚMI.
Hety zakonaprajekt pakul nie značycca na paradku dnia na sajcie Pałaty pradstaŭnikoŭ, ale, vierahodna, jon budzie ŭniesieny tudy ŭ najbližejšy čas. U vypadku jaho pryniaćcia zakon ustupić u siłu na nastupny dzień paśla aficyjnaha apublikavańnia.
Nie tolki vojska
Paźbiehnuć atrymańnia pozvy i luboha inšaha aficyjnaha apaviaščeńnia zaraz budzie nielha nie tolki ŭ vypadku z vojskam, ale i va ŭsich inšych śfierach žyćcia. Heta praduhledžana zakonaprajektam «Ab źmienie kodeksaŭ» — jaho parłamient užo adobryŭ u dvuch čytańniach.
Dakumient uvodzić paniaćcie «jurydyčna značnaje paviedamleńnie». Heta lubyja zajavy, apaviaščeńni, paviedamleńni, patrabavańni i inšyja paviedamleńni, jakija ciahnuć uźniknieńnie, źmianieńnie abo spynieńnie hramadzianskich pravoŭ i abaviazkaŭ.
Takija paviedamleńni mohuć mieć miesca jak pry ŭzajemadziejańni dziaržavy z hramadzianinam (vyklik u sud, milicyju, na dopyt i inšaje), tak i ŭ vypadku ździełak pamiž hramadzianami. Pry hetym pravavyja nastupstvy ŭźnikajuć z momantu dastaŭki paviedamleńnia.
Hałoŭnaje ŭ hetym novaŭviadzieńni — toje, što jurydyčna značnaje paviedamleńnie budzie ličycca dastaŭlenym navat u tych vypadkach, kali jaho adpravili poštaj abo elektronnymi srodkami (pa SMS, je-mejłu, u miesiendžar), ale adrasat «pa abstavinach, jakija zaležać ad jaho», hetaha paviedamleńnia nie atrymaŭ ci ź im nie aznajomiŭsia.
Praściej kažučy, kali čałaviek nie adčyniŭ dźviery paštaljonu, jaki prynios pozvu, abo adklučyŭ telefon, kab nie atrymać SMS, — heta jamu ŭžo nijak nie dapamoža.
Fakta adpraŭki budzie dastatkova, kab paviedamleńnie ličyłasia jurydyčna dastaŭlenym. A heta značyć, što ŭchilicca ad atrymańnia takich paviedamleńniaŭ budzie niemahčyma.
Jak skazała na pres-kanfierencyi, pryśviečanaj zakonaprajektu, staršynia pastajannaj kamisii Pałaty pradstaŭnikoŭ pa zakanadaŭstvie Śviatłana Lubieckaja, ciapier jość vypadki, što «asobnyja ŭdzielniki pravaadnosin» uchilajucca ad atrymańnia paviedamleńniaŭ, kab nie vykonvać svaich abaviazkaŭ.
«Zakon siońnia ahulnaha praviła ab tym, kali asoba ličycca naležnym čynam apavieščanaj, nie źmiaščaŭ. Hety prabieł zapoŭnieny. Jurydyčna značnyja paviedamleńni ličacca ŭručanymi, i asoby buduć apavieščanymi ŭ lubych vypadkach, kali heta asoba pa abstavinach, jakija zaležać ad jaje, nie była apavieščana abo ŭchiliłasia ad atrymańnia. Jak časta byvaje, elektronnyja srodki adklučanyja, albo fajły nie adkryvajucca, albo budzie inšaje štučnaje stvareńnie ŭmoŭ dla pieraškod u atrymańni», — patłumačyła deputat.
Hetaja papraŭka, vierahodna, pačnie dziejničać jašče niachutka. Zakon pavinien uchvalić Saviet Respubliki i padpisać Łukašenka, a paśla aficyjnaha apublikavańnia jon ustupić u siłu praz hod.
