Dziaŭčyna raspaviała, što vyrašyła raźmiaścić svajo reziume na papularnym resursie dla pošuku pracy rabota.by. Na toj momant u jaje była praca, i aktyŭnym pošukam novaj dziaŭčyna nie źbirałasia zajmacca. Reziume zakinuła na ŭsialaki vypadak: a raptam niešta cikavaje prapanujuć?
Cikavaja prapanova źjaviłasia, ale zusim nie takaja, jakuju jana čakała.
− Mnie patelefanavaŭ niejki mužčyna i skazaŭ, što majo reziume jamu daŭ ejčar — byccam by ja sama adhuknułasia na ich vakansiju. Ja dakładna pamiatała, što nie rabiła hetaha, ale vyrašyła ŭsio ž źjeździć na sumoŭje, — dzielicca dziaŭčyna ŭ tyktoku.
Sumoŭje adbyvałasia ŭ dva etapy. Na pieršym, jak kaža dziaŭčyna, jaje amal što ničoha nie źbiantežyła, choć i było adčuvańnie, što niešta nie tak.
− Toje, što mianie krychu ździviła — heta absalutna pusty ofis. Tam siadzieła šmat moładzi z telefonami (jany ŭvieś čas rabili niejkija zvanki, zdajecca, razmaŭlali pra kryptu), ale nie było ničoha, što b śviedčyła: tut sapraŭdy pracujuć. Ni tečak z dakumientami, ni natatnikaŭ — absalutna ničoha.
Napružvała dziaŭčynu i toje, što prapanoŭvali davoli vysokija dla Biełarusi zarobki. Bo kali ŭsio sapraŭdy tak lohka, to čamu ŭsie nie pracujuć u hetaj cudoŭnaj arhanizacyi?
− Spytali: «Ci hatovy vy addavać kampanii 80 rubloŭ štomiesiac, kali budziecie zarablać 1500 dalaraŭ?» Nu kaniešnie, luby čałaviek pahodzicca. Na druhim sumoŭi vyśvietliłasia, što 80 rubloŭ — heta štomiesiačny płaciež pa kredycie (na tyja samyja 1500 dalaraŭ), jaki treba ŭziać, kab nabyć prava na dystrybutarstva pradukcyi hetaj firmy — filtry dla ačystki vady.
Dziaŭčyna raspaviała, što potym była na sumoŭjach u inšych kampanijach, dzie sustreła šmat ludziej, jakija stali achviarami toj niezrazumiełaj schiemy.
− Lohkich hrošaj realna nie byvaje, − reziumavała dziaŭčyna. − Na žal, heta praŭda žyćcia.
Za niekalki dzion historyja nabrała 260 tysiač prahladaŭ i bolš za 580 kamientaryjaŭ. Znajšłosia šmat tych, chto paćvierdziŭ, što paciarpieŭ ad hetaj firmy.
Skrynšot kamientaroŭ pad videa
− Heta čystaja praŭda, vielmi šmat ludziej paciarpieli, u tym liku i ja, na žal. Manipulacyi i ŭnušeńnie, voś što jany pravodziać na sumoŭi.
− Vypłačvaju kredyt na 2499 dalaraŭ pad 29%, kapiec. A paklikaŭ tudy pracavać siabar, jaki praz hod syšoŭ adtul, jak zarabiŭ.
− Maju siastru sprabavali raźvieści, jašče čałaviek pakazvaŭ fota z Dubaja, byccam jany tudy na karparatyŭ haniajuć.
Vyśvietliłasia, što fota z Dubaja taksama šmat chto bačyŭ. Akramia Dubaja pakazvali zdymki i z Tajłanda.
Niechta dapoŭniŭ, što ŭ kampanii jość ofis nie tolki na Alšeŭskaha (kudy jeździła hierainia rolika), ale i ŭ handlovym centry «Tytan»:
− U HC «Tytan» jany prapanujuć uziać kredyt na 800-1600 dalaraŭ, kab kupić navučańnie pa krypcie, a potym vy budziecie pracavać na ich i pradavać hetaje navučańnie. A mnie 18 hadoŭ, sprabavali ŭhavaryć uziać kredyt, mieniedžar vyhladaŭ davoli praŭdapadobna, była kuča ludziej i dypłomy niejkija.
Zdajecca, ŭ kamientaryi pryjšoŭ i niechta z toj samaj firmy, dzie pracu treba pačynać z kredytu: «Toj chto hetaha nie razumieje naturalna razvod, a chto žadaje vučycca i zarablać jon budzie zarablać, heta toje ž samaje što kursy» (punktuacyja aŭtara zachavana — NN).
Dziaŭčyna kateharyčna nie pahadziłasia:
− Kursy — heta toje, što treba dla navučańnia, pavyšeńnia kvalifikacyi. A voś heta nie kursy, a łachatron, heta ašukancy. Ja, jak čałaviek, jaki zarablaje hrošy ŭłasnym intelektam, mahu paćvierdzić: tak, zarabić možna, ale nie tam, dzie ciabie padmanvajuć, dzie ad ciabie patrabujuć uziać kredyt, jaki ty potym budzieš addavać. Mnie ščyra škada ludziej, jakija na heta pavialisia. Za pracu tabie pavinny płacić hrošy. Ty nie pavinien płacić hrošy, kab pracavać.
Čytajcie taksama:
Žychar Rečycy pradavaŭ u internecie niaisnyja smartfony. Zdoleŭ pradać 30 čałaviekam
Minčanka z synam chacieli zarabić na biržy, ale pazbavilisia 260 tysiač rubloŭ
Raźlik na kartku i 100% pieradapłata. Jak machlary pradajuć kvietki praź instahram
