Hiendyrektar «Minskbuda» Alaksandr Jacko raspavioŭ, što ŭ hetym hodzie arhanizacyja ŭviała ŭ ekspłuatacyju 17 žyłych damoŭ dla tych, chto maje ŭ hetym patrebu. Naprykład, u 2023 hodzie zavieršana kompleksnaja zabudova i transfarmacyja mikrarajonaŭ u Čyžoŭcy (Čyžoŭka-6 i Čyžoŭka-6a).
— Faktyčna za 3 hady byŭ źniesieny pryvatny siektar, jaki raźmiaščaŭsia na hetym učastku, i ŭźviedziena bolš za 600 kvater dla majučych patrebu ŭ palapšeńni žyllovych umoŭ. Zaraz hety rajon maje skončany architekturny vyhlad. Na terytoryi, prylehłaj da «Paŭnočnaha bieraha», pačali realizacyju prajekta zabudovy na vulicy Vyhockaha.
Navinki
U cełym u kvartale płanujecca pabudavać 10 damoŭ, žyllo ŭ jakich atrymajuć 1.818 čarhavikoŭ. Sumarnaja płošča kvater — zvyš 100 tysiač «kvadrataŭ». Damy pabudujuć u kanstrukcyjach novaj sieryi 24-RS z sučasnymi płaniroŭkami kvater. Usie damy pa vulicy Vyhockaha, jak udakładniaje «Minskbud», buduć pabudavanyja na elektraaciapleńni: u kvaterach zaprajektavanyja elektryčnyja kanviektary, a ŭ jakaści krynicy haračaj vady buduć vykarystoŭvacca bojlery.
Aktyŭnyja raboty pačalisia sioleta. Damy №14 i 15, zhodna z hienpłanam, buduć trochsiekcyjnymi pa 225 kvater kožny. U pieršym domie pad numaram 14 pa hienpłanie zapłanavana 19 pavierchaŭ i 3 siekcyi. Jon budzie raźličany na 225 kvater z poŭnym azdableńniem. Adnapakajoŭki — na 2—4 pakoi. Žyllo tut atrymajuć tyja, chto maje patrebu. Dom majuć namier pabudavać za 14 miesiacaŭ.
Zatym źjaviacca jašče 6 vysokich damoŭ, dziciačy sad na 350 miescaŭ i škoła na 1.020 miescaŭ.
Što tam ciapier? Z adnaho boku — čystaje pole, z druhoha — prymykaje žyły mikrarajon Navinki (a kankretna taja jaho častka, u jakoj raźmieščany manastyr). Pačatkovyja budaŭničyja pracy trapili na śviežyja Jandeks.Panaramy, źniatyja ŭ lipieni hetaha hoda.
Tam užo paśpieli ŭźvieści padmurak 14-ha doma, budoŭla idzie badziora.
Pramzona na Hurskaha
Tut buduć budavać na miescy vytvorčaj bazy «Minskbuda» ŭ miežach vulic Hurskaha i Hłaholeva, dzie ciapier u asnoŭnym raźmiaščajucca składy. Vulica Hłaholeva — adna z samych industryjalnych va ŭsioj stalicy. Sprava i źleva tut zapar płaty, asfaltu niama, zatoje jość kinutyja aŭtamabili, budaŭničaje śmiećcie i rejki.
Zaraz idzie praces afarmleńnia dazvołu na prajektavańnie. Potym jašče hod spatrebicca dla raspracoŭki dakumientacyi, tamu budaŭničyja raboty mahčymyja nie raniej 2024-2025 hadoŭ.
Kurasoŭščyna
U Kurasoŭščynie źbirajucca asvoić dźvie budaŭničyja placoŭki: u rajonie vulic Siarova — Žłobinskaja — Asanalijeva — Lubanskaja i Siarova — Lubanskaja — Asanalijeva. Tut buduć znosicca dvuchpaviarchoviki 1940-1960-ch hadoŭ pabudovy. Na hetaj terytoryi płanujecca ŭźvieści bolš za 60 tysiač kvadratnych mietraŭ ahulnaj płoščy žylla. U 2024-m pačnuć budavać pieršy dom, vykarystoŭvajučy sistemu karkasnaha domabudavańnia Minskaha domabudaŭničaha kambinata.
Damy buduć 9-16-paviarchovyja. Pieršyja dva zapłanavanyja ŭzdoŭž vuł. Siarova, adzin — pad adsialeńnie žycharoŭ, druhi — dla mienčukoŭ, jakija majuć patrebu. Užo prystupili da realizacyi majomasnych pravoŭ hramadzian, adnačasova idzie prajektavańnie.
Minsk-Uschodni
Niedaloka ad čyhunačnaj stancyi Minsk-Uschodni, na jašče adnoj pramysłovaj placoŭcy «Minskbuda», taksama źjavicca žyllo. A kankretna — u rajonie vulic Zacharava i Andrejeŭskaj. Čamuści «Minskbud» nazyvaje hetaje miesca cichim centram, choć žyllo kala čyhunki naŭrad ci nazavieš cichim.
Pakul što kancepcyja prachodzić uzhadnieńnie, i kali jana budzie adobrana, to tut płanujecca ŭźvieści piać budynkaŭ. Na pieršym etapie — try 17-19-paviarchovyja damy z pavyšanymi spažyvieckimi charaktarystykami, z ubudavanymi pamiaškańniami sacyjalnaha i handlovaha pryznačeńnia. Kancepcyjaj taksama praduhledžany parkinhi i łandšaftny dyzajn terytoryi. Dyzajn žyłoha kompleksu prapanavała studyja «Arch-Nuvo».
Vałhahradskaja
Dyrektar UKB Minharvykankama Anžeła Babaryka raspaviała, kali pačnuć asvojvać placoŭku pablizu vulicy Vałhahradskaja, na miescy zavoda «Ahat». Jana kaža, što ciapier pa ŭčastku ŭ rajonie praśpiekta Niezaležnaści iduć pieradprajektnyja raboty:
— Treba razumieć, što tam — vielmi vialikaja terytoryja, na jakoj nieabchodna budzie ažyćciavić znos vialikaj kolkaści abjektaŭ, a taksama — pieraklučeńnie vialikaj kolkaści sietak. Zajści na hetuju placoŭku my płanujem dzieści ŭ 2026 hodzie.
Pa prajekcie bolšuju častku vytvorčych budynkaŭ i pabudoŭ źbirajucca źnieści. Damy buduć nie vyšej za 32 mietry: u zadańni na prajektavańnie jość abmiežavańni pa vyšyni zabudovy. Miarkujecca, što heta budzie dzieviać dziesiacipaviarchovych damoŭ prykładna na 1.180 kvater.
Na terytoryi ŽK zapłanavany dziciačy sad, hramadskija abjekty i šmatuzroŭnievyja parkinhi. A voś škoła, paliklinika i apteka nie praduhledžanyja. Što tyčycca žyłoj zabudovy, pradumany zakrytyja i napaŭzačynienyja hrupy šmatkvaternych damoŭ z arhanizacyjaj biestranspartnych dvarovych prastor.
Uzdoŭž vulic Vałhahradskaj i Kiedyški pabudujuć damy z kramami, majsterniami i inšymi abjektami na pieršych pavierchach. Praz kvartał projdzie piešachodnaja darožka, jakaja viadzie da mietro. Uzdoŭž vulicy Kiedyški zapłanavanaja vieładarožka.
Kavalskaja słabada
Niedaloka ad stancyi mietro «Kavalskaja Słabada» zachavaŭsia niemałych pamieraŭ pryvatny siektar: u miežach vulic Avakiana — Bychaŭskaja — Pienzienskaja — Aeradromnaja i Sieńnickaja — Naftavaja — Aeradromnaja — Žukoŭskaha. Anžeła Babaryka nazvała terminy, kali jaho źbirajucca źnieści.
— Ciapier idzie pieradprajektnaja praca pa zabudovie hetaha ŭčastka. Realizacyju majomasnych pravoŭ pačniom dzieści z 2026 hoda. Choć u pačatku hoda paviedamlałasia, što adsialeńnie («realizacyja majomasnych pravoŭ») pačnuć užo ŭ hetym hodzie. Tut namiečany kvartały novaj šmatkvaternaj zabudovy. Na terytoryi buduć škoła, dziciačy sad, inšyja abjekty sacyjalnaj infrastruktury. Zabudoŭščykam vyznačany UKB Minharvykankama.
Łošyca
Łošyca — adzin z samych chutkarosłych rajonaŭ stalicy. Na byłoj pustcy tut užo ŭźviali z tuzin šmatpaviarchovikaŭ. Ale tut jašče i vialiki pryvatny siektar. Jaho, viadoma, taksama źbirajucca vykarčavać. Anžeła Babaryka tłumačyć:
— Ciapier raspačataja realizacyja majomasnych pravoŭ hramadzian, dla taho, kab možna było ažyćciavić znos na hetaj terytoryi. Niepasredna da budaŭnictva my płanujem prystupić u 2025 hodzie. [ … ] Taksama ŭžo pačata budaŭnictva dvuch žyłych damoŭ dla adsialeńnia hramadzian z pryvatnych damoŭ, u pieršuju čarhu — z taho ŭčastka, na jakim my płanujem budavać Łošycu-5. Akramia taho, pačałosia budaŭnictva i Łošycy-10. Tam ciapier taksama ŭzvodzicca dom, kvatery ŭ jakim prapanujem adsialencam.
