Źniataja na «Biełaruśfilmie» karcina «Vaŭki» nie prajšła adbor dla ŭdziełu ŭ Bierlinskim mižnarodnym kinafiestyvali.
Pra heta paviedamiła hałoŭny redaktar Nacyjanalnaj kinastudyi «Biełaruśfilm» Natalla Ściažko 14 śniežnia na pres-kanfierencyi ŭ Minsku.
Nahadajem, u kancy žniŭnia «Biełaruśfilm» zajaviŭ ab namiery ŭpieršyniu pradstavić svaju mastackuju stužku na Bierlinskim mižnarodnym kinafiestyvali, što projdzie ŭ lutym 2010 hoda. Na Bierlinale płanavałasia nakiravać psichałahičnuju dramu «Vaŭki» režysiora Alaksandra Kołbyšava pavodle matyvaŭ adnajmiennaj apovieści Alaksandra Čakmienieva.
Dziejańnie filma adbyvajecca ŭ paślavajennyja hady. Zimoj z ešałona z asobymi źniavolenymi źbiahaje Kirył Palatajeŭ. Prabirajučysia skroź zaśniežany les, jon dabirajecca da rodnaj vioski.
Adnak nie ŭsie jaje žychary hatovyja pryniać byłoha adnaviaskoŭca — na jaho ładziać sapraŭdnaje palavańnie. Znajomyja Palatajeva dapamahajuć jamu ŭciačy ŭ les, dzie vyratavany ad ludziej-vaŭkoŭ jon natykajecca na zhraju sapraŭdnych vaŭkoŭ. U filmie źniatyja Andrej Panin, Dźmitryj Uljanaŭ, Uładzimir Haściuchin.
Na «Biełaruśfilmie» była stvorana śpiecyjalnaja rabočaja hrupa dla padrychtoŭki ŭsich nieabchodnych dakumientaŭ dla ŭdziełu ŭ Bierlinale. Sumiesna z režysioram i zdymačnaj hrupaj jana padrychtavała subcitry da karciny na anhlijskaj i niamieckaj movach, što źjaŭlajecca adnym z hałoŭnych umoŭ fiestyvalu.
Ściažko śćviardžaje, što pra film «Vaŭki» ŭ arhkamitecie Bierlinale byli vielmi dobryja vodhuki, adnak heta «nie ich farmat». «Bierlinale — heta bolš art-chausnaje kino», — adznačyła śpiecyjalist.
Pavodle jaje słoŭ, tema Vialikaj Ajčynnaj vajny i jaje nastupstvaŭ ciapier nie vyklikaje cikavaści ŭ Jeŭropie.
Hałoŭny redaktar «Biełaruśfilma» zajaviła, što film «Vaŭki» budzie sprabavacca dla ŭdziełu ŭ inšych fiestyvalach. Pavodle jaje słoŭ, najlepšy fiestyval dla hetaj karciny — Maskoŭski.
