Fota: sacsietki
Jak pisała Delfi.lt, Viktar vyjšaŭ z mašyny, i jaho źbiŭ ciahač, kiroŭca jakoha nie zaŭvažyŭ čałavieka na šašy.
Pra Viktara Saviča «Našaj Nivie» raspavioŭ jahony pryjaciel Andrej Šarenda: jany abodva apynulisia ŭ Litvie prykładna ŭ adzin čas i pa padobnych pryčynach. Pavodle Andreja, Viktar Savič trapiŭ u Litvu ŭ 2021 hodzie paśla taho, jak suprać jaho raspačali kryminalnuju spravu:
«U Litvie jon byŭ u statusie ŭciekača. Paśla pačatku vajny va Ukrainie 24 lutaha jon spaliŭ kala biełaruskaj ambasady svoj biełaruski pašpart i praktyčna na nastupny dzień dobraachvotna pajechaŭ na front, zapisaŭsia ŭ połk Kalinoŭskaha i prabyŭ tam bolš jak paŭhoda, viarnuŭsia letaś uvosień. U Vilni jon aktyŭna zajmaŭsia hramadskaj dziejnaściu, pisaŭ vieršy, u tym liku napisaŭ słovy niefarmalnaha himna pałka Kastusia Kalinoŭskaha».
Baćki Viktara Saviča taksama byli vymušany źjechać ź Biełarusi śledam za synam, ale jany žyvuć u inšych krainach, praciahvaje Andrej Šarenda:
«Ciapier jany pryjechali ŭ Vilniu, dzie palicyja daśleduje incydent z DTZ. Jak mnie viadoma, zdaryłasia nastupnaje. Jon viartaŭsia dachaty, heta było ŭžo praktyčna na miažy Vilni, i ŭ jahonaj mašynie zahłuch mator. Viktar vyjšaŭ zirnuć, što zdaryłasia. U pryciemkach kiroŭca ciahača jaho nie zaŭvažyŭ…
U žyćci hetaha chłopca było šmat psichałahičnych ciažkaściej, ale jon usio pieraadoleŭ. I tut, u Vilni, jon pačaŭ žyćcio nanoŭ. Jon byŭ vielmi dobrym siabram, jak zaŭždy dapamahaŭ u ciažkuju chvilinu. Vielmi kryŭdnaja, niedarečnaja i niesvoječasovaja śmierć».
Jak piša «Fłahštok», Viktar Savič udzielničaŭ u bai, u jakim zahinuŭ viadomy biełaruski dobraachvotnik z pazyŭnym «Brest», i frantavyja padziei mocna ŭrazili maładoha čałavieka. Tym časam śpiecsłužby Biełarusi ŭziali ŭ zakładniki baćkoŭ Viktara. Siłaviki raspačali z dobraachvotnikam pryvatnuju pierapisku, u jakoj jamu pahražali i publikavali videa baćkoŭ z turemnaj kamiery. Jon razarvaŭ kantrakt z ZSU i patrapiŭ u skandał, kali jaho intervju źjaviłasia na prapahandysckim kanale «Biełaruś 1».
Toje intervju dla dziaržTB ź Viktaram padmanam zapisaŭ litoŭski juryst Mantas Danielus (jon skazaŭ, što hety rolik dla ambasady ZŠA) — u Litvie jaho ciapier sudziać pa abvinavačvańni ŭ špijanažy na karyść uładaŭ Biełarusi.
