Paleścincy kala źniščanaha izrailskaha tanka la aharodžy siektara Haza, subota, 7 kastryčnika 2023 h. Fota: Hassan Eslaiah / AP Photo
Telehram-kanał «Biełaruski siłavik» — siarod tych, chto aktyŭna publikuje naviny nakont padziej u Izraili. Ën radujecca pośpiecham paleścincaŭ i repościć dopisy rasijskich šavinistyčnych kanałaŭ.
«Sajuźnikaŭ u nas tam niama. Samaje hałoŭnaje, što možna zdabyć u hetym kanflikcie, tak heta zapavolvańnie luboj dapamohi Izraila JEZ i Ukrainie», — adznačaje «Biełorusskij siłovik».
Pry hetym kanał sprabuje padać baki kanfliktu jak aboje raboje.
Infakazačka Volha Bondarava, pamiž vinšavańniami z dniom naradžeńnia Pucina i hrodzienskaj milicyi, taksama aktyŭna repościć antyizrailskija kanały. Nie zabyła jana ablić brudam i rasijskich zorak, jakija pierajechali ŭ Izrail na znak pratestu suprać rasijskaha napadu na Ukrainu.
Dopisaŭ pra Ału Puhačovu i Maksima Hałkina na staronkach roznych prapahandystaŭ šmat. Adzin z takich — repost jašče adnaho łukašenkaŭskaha prapahandysta Juryja Uvarava.
Zapościła Bondarava i videafejk, u jakim terarystyčny ruch CHAMAS dziakuje Ukrainie za prodaž im zbroi. Piša, što vialikaja častka RPH, jakija vykarystoŭvali terarysty suprać mirnaha izrailskaha nasielnictva i sałdat, była pastaŭlena z krainy, jakaja sama zaraz znachodzicca ŭ stanie vajny. Nasamreč, heta chłuśnia.
Kanał «Žoŭtyja ślivy» taksama smakuje situacyju.
A voś prapahandyst Ryhor Azaronak pisaŭ pra kanflikt u Izraili nie tak šmat. Ale i jon pažartavaŭ ź dziaŭčat, jakija tančyli z čyrvona-čornym ściaham AUN z zorkaj Davyda — znakam salidarnaści jaŭrejaŭ z ukrainskim supraciavam, i vykazaŭ zaniepakojenaść losam šoŭmiena Jaŭhiena Bułki, jaki nie zmaŭčaŭ u 2020 hodzie, a paśla pierajechaŭ u Izrail.
Akramia taho, Azaronak zakłapaciŭsia pravami terarystaŭ, zatrymanych izrailskaj armijaj.
«Amnesty International, Freedom House, Chielsinski kamitet, ABSIE dy inšyja mižnarodnyja pravaabarončyja kantory staranna zapluščać na heta vočy», — piša prapahandyst.
Radykalnyja prapanovy robić «Minskaja praŭda».
U artykule prapahadysta RT, jaki drukuje hazieta, śćviardžajecca, što rasijskaje i biełaruskaje hramadstva adzinyja ŭ padtrymcy Paleściny, a pieramoha Paleściny na akupavanych terytoryjach — heta pieramoha Maskvy i Minska. «My ŭžo pieramahli», — pišacca tam.
Hałoŭnaja hazieta krainy «Biełaruś siehodnia» na hałoŭnaj staroncy trymaje inśpiekcyju hałoŭnakamandujučym umacavanaha rajona pad Žabinkaj i skančeńnia ŭborki hrečki ŭ čatyroch abłaściach.
Ale i jana adzinaja ź inšymi łukašenkaŭskimi ŚMI ŭ tym, što na padziei ŭ Izraili taksama hladzić vačyma Maskvy. Kałonka na temy izrailska-paleścinskaha kanfliktu ŭ «SB» skančajecca ŭhodlivym cytavańniem aŭtara z Maskvy: «Jak vyklučna dakładna adznačyła ŭ svaim Telegram-kanale prafiesarka MHIMO Alena Panamarova … arhanizacyja i padrychtoŭka siońniašniaha napadu i asabliva jaho simvalizm — u hadavinu vajny Sudnaha dnia — kaža pra toje, što hałoŭnyja intarasanty vialikaj vajny siadziać u ciopłych kabinietach u Vašynhtonie i Łondanie».
U hetaj cytacie — dumka, pazbaŭlenaja ŭsiakaj łohiki, akramia adnoj. Što b ni zdaryłasia na śviecie, paŭtaraj, što skaža Maskva. I što b ni zdaryłasia, abvinavačvaj Zachad.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
