Pa-pieršaje, hetamu muzieju bolš za try dziasiatki hadoŭ. Tut siłami piedahohaŭ, baćkoŭ i inšych zacikaŭlenych asob sabrany ekspanaty z roznych kutkoŭ Biełarusi. A pa-druhoje, tut vielmi harmanična spałučajucca pradmiety minuŭščyny i technałohii budučyni. Pra što idzie havorka? Pra akulary virtualnaj realnaści.
Jak karystacca hetymi technałohijami ŭ navučalnym pracesie, nam raskazała nastaŭnica historyi i hramadaznaŭstva siaredniaj škoły № 86 imia Famy Zańko Hanna Turku:
— Jany lohkija i zrazumiełyja ŭ vykarystańni. My prosta pierachodzim pa QR-kodzie na staronku našaha muzieja, zatym uklučajem vykarystańnie virtualnych technałohij, ustaŭlajem smartfon u akulary, i z ulikam taho, što tut jość funkcyja hiraskopa, hetyja akulary pakazvajuć panaramu ŭsiaho muzieja. Pry čym panarama vielmi jakasnaja, što daje mahčymaść razhledzieć drabniutkija detali ekspanataŭ.
Pa słovach nastaŭnicy, dzieciam takija technałohii vielmi daspadoby. Ale jak ža akulary virtualnaj realnaści mohuć być skarystany na zvyčajnym uroku historyi?
U Hanny Turku na hetaje pytańnie byŭ hatovy prykład z praktyki:
— U nas jość tema «Kanfiesijnyja adnosiny na terytoryi Biełarusi ŭ 19 stahodździ». Urok pačynajecca jak kłasičny. Potym my pastupova pierachodzim da novych technałohij. Padčas prahladu panaramy školnikam treba adkazać na samyja roznyja pytańni, naprykład: «Jakija z pradstaŭlenych ekspanataŭ buduć mieć dačynieńnie da relihijnaha žyćcia biełarusaŭ?», «Pradstaŭnikam jakich kanfiesij naležać tyja ci inšyja ekspanaty?», «Pa jakich prykmietach možna vyznačyć prynaležnaść kultavaj rečy pradstaŭniku toj ci inšaj kanfiesii?» i h. d.
Pry hetym, pavodle słoŭ piedahoha, školniki pavinny arhumientavać, jak jany vybrali toj ci inšy ekspanat. Hetyja pytańni abaviazkova pieramiažoŭvajucca z ustupnymi słovami, kamientarami pa novaj temie ad nastaŭnika. Takim čynam heta dapamahaje lepš zasvojvać materyjał i na svaje vočy ŭbačyć toje, pra što raniej tolki čuli.
