Cimate Suładze. Fota: fejsbuk muzyki
«Ja sam vyzvaŭsia dapamahać, kali pabačyŭ naviny pra vybuch na Kachoŭskaj hidraelektrastancyi. Uraziła toje, jak ludzi ratavali chatnich hadavancaŭ. Baluča było čytać ab tym, što, naprykład, sabaki, jakija byli pryviazanyja na łancuhach, zahinuli. U mianie try sabaki, jakija dla mianie vielmi važnyja, tamu ja nie moh prosta hladzieć na hetu trahiedyju», — kaža muzyka.
Cimate źviazaŭsia z vałanciorskim fondam «Aŭtapryma», dastaviŭ humanitarny hruz ź Litvy va Ukrainu, a potym dapamahaŭ miascovym vałancioram. Čałaviekam, jakoha zaraz abvinavačvajuć u machlarstvie taksama źviazaŭsia z fondam paśla vybuchu na Kachoŭskaj HES, pradstaviŭsia ŭkrainskim vajskoŭcam i prapanavaŭ svaju dapamohu, pakul maje volny čas.
«Mnie dali jaho kantakty, my sustrelisia ŭ Adesie. Jon arhanizavaŭ dla mianie biaspłatny načleh, zapraŭlaŭ mašynu bienzinam. Mužčyna šmat čaho raspaviadaŭ pra toje, što adbyvajecca na poli boju. Vielmi prasiŭ jaho nie zdymać, bo jon u składzie DRH i jamu važna, kab vorah nie viedaŭ jaho tvar. Jaho pavodziny vyhladali vielmi praŭdapadobna», — raskazaŭ «Našaj Nivie» Cimate.
Pastupova ŭ kaardynataraŭ fondu pačali źjaŭlacca pytańni da hetaha čałavieka. Pa-pieršaje, jon moh nie pa ŭsich pieraličanych jamu hrošach dać spravazdačy. Pa-druhoje, mužčyna časta raspaviadaŭ pra toje, jak fondu niešta padaryli: naprykład, hienieratar ci niekalki dziasiatkaŭ koŭdraŭ, kazaŭ, što patrebnyja tolki hrošy na bienzin, kab zabrać padarunki. Ničoha z padoranaha ŭ fondzie nie ŭbačyli. Pa-treciaje, mužčyna davaŭ danyja bankaŭskich kart roznych ludziej dla pieravodu hrošaj — kazaŭ, što jak vajskoviec nie moža karystacca svajoj.
Paźniej uspłyło niamała dziŭnych historyj: naprykład, čałaviek kazaŭ, što patrebny hrošy na ramont mašyny vałanciora — a vałancior nasamreč ramantavaŭ jaje za svoj košt.
Hety čałaviek taksama paprasiŭ Cimate zapisać videazvarot da italjanskich futbalistaŭ i ich žonak na italjanskaj movie (u minułym Cimate prafiesijna pracavaŭ pierakładčykam i dobra havoryć na hetaj movie) i padziakavać im za dapamohu, apublikavać videa ŭ storys u svaim instahramie i tehnuć hetych ludziej.
Vałanciory havorać, što samastojna zmahli vyśvietlić asobu hetaha čałavieka (akazałasia, jon vykarystaŭ vydumanyja imia i proźvišča). Jany śćviardžajuć, što jon hramadzianin Ukrainy, ale nijakaha dačynieńnia da ŭkrainskaha vojska nie maje, byŭ asudžany za machlarstva ŭ 2011 hodzie i vyzvaliŭsia pierad samym pačatkam vajny.
«Kryminalnaja sprava z hetaj nahody rasśledujecca ŭ adeskaj palicyi, — udakładniŭ u paście Cimate. — Prysudu niama, tamu imiony, jaŭki, paroli nie pišu. Škoda kala 50 tysiač hryŭniaŭ, hetyja hrošy zapłaciła sa svajoj kišeni dziaŭčyna, jakaja źviartałasia da hetaha čałavieka, dumajučy, što jon vałancior, i pieraličvała jamu hrošy, pakul usio heta nie vyjaviłasia. Budźcie pilnyja, nie daviarajcie svaje hrošy kamu patrapiła! Vielmi šmat raźviałosia ašukancaŭ pad vyhladam «pamočnikaŭ» Ukrainy».
Čytajcie taksama:
Ratuju sabak — biełaruski muzyka pajechaŭ u Chiersonskuju vobłaść ź niezvyčajnaj misijaj
A ŭ palicyju źviarnulisia?