Fota: Swedish Armed Forces
Ab hetych mierach premjer-ministr Šviecyi abviaściŭ na fonie rezkaha rostu kolkaści napadaŭ z užyvańniem ahniastrelnaj zbroi i vybuchovych pryład. Tolki na minułym tydni na praciahu 12 hadzin u Stakholmie byli zastrelenyja dvoje maładych mužčyn.
Akramia taho, u adnym z nasielenych punktaŭ na poŭnač ad stalicy 24-hadovaja žančyna zahinuła padčas vybuchu ŭ jaje domie. Jaje zvali Sacha Saad i jana niadaŭna atrymała kvalifikacyju nastaŭnicy. Palicyja miarkuje, što čałaviek, jaki mieŭsia stać metaj vybuchu, byŭ jaje susiedam, a sama jana nie mieła nijakaha dačynieńnia da bandyckaj dziejnaści.
U vieraśni z-za dziejańniaŭ uzbrojenych band u krainie zahinuli ŭ ahułam 12 čałaviek. Heta samy vysoki pakazčyk sa śniežnia 2019 hoda.
Pa rašeńni ŭładaŭ, z nastupnaha tydnia armija pačnie sadziejničać palicejskim z analizam danych, łahistykaj, kryminalistyčnaj ekśpiertyzaj i pracaj z vybuchovymi rečyvami.
Krystersan taksama zajaviŭ ab nieabchodnaści zakanadaŭča pašyryć paŭnamoctvy armii.
«Ja nie mahu nie pryznać, nakolki surjoznaja situacyja. Šviecyja nikoli raniej nie bačyła ničoha takoha. Nivodnaja inšaja kraina Jeŭropy ciapier takoha nie pieražyvaje», — skazaŭ premjer-ministr Krystersan, źviartajučysia da žycharoŭ krainy.
Krystersan uznačalvaje pravacentryscki ŭrad, u jakoha niama bolšaści ŭ parłamiencie. Jon pryjšoŭ da ŭłady ŭ minułym hodzie pry padtrymcy antyemihranckaj šviedskaj demakratyčnaj partyi, ale tak i nie zmoh utajmavać złačynnaść — adnu z hałoŭnych prablem krainy, jakaja vyklikaje asablivuju niezadavolenaść vybarščykaŭ.
Svaju zajavu ab uciahvańni armii ŭ baraćbu sa złačynnaściu Krystersan zrabiŭ paśla ekstrannych pieramovaŭ u piatnicu z kiraŭnikom šviedskaj armii Mikaelem Bajdenam, kiraŭnikom palicyi Andersam Tornbierham i ministram justycyi Hunaram Štromieram.
Premjer-ministr rastłumačyŭ, što ŭrad paprosić vojska dapamahčy palicyi «ŭ tych vypadkach, kali mohuć spatrebicca asablivyja navyki Uzbrojenych sił».
Bandy pryciahvajuć dziaciej
Šviedskija ŚMI źviazvajuć rost kolkaści zabojstvaŭ u krainie z unutranym kanfliktam u kryminalnaj bandzie, viadomaj jak sietka «Fakstrot». Viadoma, što jana raskałołasia na dźvie kankurujučyja hrupoŭki, pamiž jakimi rehularna adbyvajucca sutyknieńni.
Šviedskaja palicyja miarkuje, što miascovyja bandy ŭsio čaściej vykarystoŭvajuć dziaciej dla ździajśnieńnia złačynstvaŭ, bo dzieci maładziejšyja za 18 hadoŭ časta atrymlivajuć lohkija prysudy ŭ sudach ci ŭvohule zastajucca biez pakarańnia.
Pa danych pravaachoŭnych orhanaŭ, dzieci ŭsio maładziejšyja (niekatorym usiaho 10 hadoŭ) dałučajucca da handlu narkotykami i siarod ich raście kolkaść tych, chto ŭ kanfliktach vykarystoŭvaje zbroju sa śmiarotnymi nastupstvami.
U Šviecyi adnosna lohka možna kupić nielehalnuju zbroju, jakaja pastupaje ŭ asnoŭnym z bałkanskich krain, ličyć palicyja.
Jak padkreśliŭ u svaim zvarocie Krystersan, achviarami ŭnutranych kanfliktaŭ band usio čaściej stanoviacca dzieci i minaki.
Letaś u vyniku pierastrełak u Šviecyi zahinuła bolš za 60 čałaviek — heta samy vysoki pakazčyk za ŭsiu historyju viadzieńnia statystyki. Čakajecca, što pa vynikach 2023 hoda situacyja budzie nastolki ž drennaj — ci jašče horš.
U aficyjnaj uradavaj spravazdačy, apublikavanaj u 2021 hodzie, havorycca, što kožny hod u vyniku pierastrełak u Šviecyi hinuć čaćviora ź miljona žycharoŭ — u paraŭnańni z 1,6 čałavieka na miljon u siarednim u Jeŭropie.
Palicyja źviazvaje hvałt z drennaj intehracyjaj imihrantaŭ, pavieličeńniem razryvu pamiž bahatymi i biednymi i užyvańniem narkotykaŭ.
Premjer-ministr paabiacaŭ uzmacnić palicejski nahlad, zrabić bolš strohim pakarańnie za parušeńnie zakonaŭ ab zbroi, uzmacnić paŭnamoctvy dziaržavy pa departacyi mihrantaŭ, nastojvajučy što «ŭsie varyjanty razhladajucca».
Niekatoryja krytyki śćviardžajuć, što hetyja miery nie vyrašajuć asnoŭnyja sacyjalnyja prablemy, jakija lažać u korani hetaha kryzisu, u tym liku dziciačuju biednaść i niedastatkovaje finansavańnie hramadskaj infrastruktury.
