Biełaruskamoŭny hurt Nürnberg maje šmatmiljonnuju aŭdytoryju pa-za miežami krainy. Fota: nurnbergband / Instagram
U novym vypusku jutub-kanała «Ministerstva siepultury» muzyčny ahladalnik Alaksandr Čarnucha raskazvaje, što na pieršym miescy va ŭsich mahčymych rejtynhach pa kolkaści fanataŭ znachodzicca biełaruski post-pank. Hetuju ściežku prakładali chłopcy z hurta Super Besse, udzielniki jakoha pačali hrać razam u 2014 hodzie. A minski post-pank hurt «Mołčat domá» staŭ samym papularnym ruskamoŭnym hurtam va ŭsim śviecie.
Kali ž havaryć pra biełaruskamoŭnyja hurty, to samym papularnym ciapier za miažoju źjaŭlajecca hurt Nürnberg.
Historyja hurta pačynajecca ŭ 2014 hodzie, kali dva školniki — Juryj Łuhaŭcoŭ i Aleh Saucin — vyrašyli, što buduć razam hrać muzyku. Jany pačynali z kavieraŭ na pieśni viadomych hurtoŭ. U 2018 hodzie vyjšaŭ ich mini-albom «U nikudy». U tym ža hodzie chłopcy vystupali na «Basoviščy», zaśviacilisia na Biełsacie. A «Tuzin hitoŭ» nazvaŭ ich adkryćciom hoda.
Hurtam taksama zacikavilisia za miažoj, i ich mini-albom vyjšaŭ u Hiermanii. A debiutny albom Skryvaj trapiŭ jašče i ŭ ZŠA, dzie byŭ vydadzieny na kasietach na Death Shadow Records. Pačalisia zamiežnyja hastroli i fiestyvali, dzie Nürnberg pakazaŭ muzyku pa-biełarusku.
«Nas cikavić depresiŭny stan i ŭnutranaja baraćba. Nas natchniaje šeraje navakolle i ŭsieahulnaja stoma. Niahledziačy na toje, što naša žyćcio — šlach u nikudy, šmat jakija dumki, pačućci, padziei i rečy dapamahajuć raznastaić isnavańnie i nie zachrasnuć u štodzionnym brudzie z hałavoj», —
apisvali chłopcy svaju tvorčaść «Tuzinu hitoŭ».
Šlach na viaršyniu
Nastupny albom hrupy — Paharda — vyjšaŭ u 2020 hodzie. Nad zapisam i masterynham jaho pracavaŭ Raman Kamahorcaŭ z hurta «Mołčat domá». Albom atrymaŭsia lepšym za pieršy, bolš atmaśfiernym. U jaho nasyčanaje hučańnie, hłybiejšyja teksty.
Paśla jaho vychadu ŭ Nürnberg'a zdaryŭsia sapraŭdny praryŭ. Pajšli kancerty i fiestyvali, pašyryłasia aŭdytoryja. U 2020 hodzie na Spotify hurt mieŭ 2,4 miljona prasłuchoŭvańniaŭ u 92 krainach.
U 2021 hodzie Nürnberg pajechaŭ na fiestyval Atlas Weekend u Kijevie. Paźniej byli hastroli ŭ Rasii i Jeŭropie. I za adzin hod statystyka prasłuchoŭvańniaŭ na Sportify uzrasła da 5 miljonaŭ u 137 krainach. A ŭ 2022 hodzie chłopcy dabralisia da Mieksiki i adkatali tam paŭnavartasnaje turne.
Na toj čas hitaryst Aleh Saucin skončyŭ mieduniviersitet i staŭ pracavać miedykam. Juryj Łuhaŭcoŭ peŭny čas byŭ dziaržaŭnym słužačym i paralelna hraŭ muzyku.
Jury Łuhaŭcoŭ (źleva) i Aleh Saucin. Fota: nurnbergband / Instagram
U hetym hodzie ŭ Nürnberg vyjšaŭ novy mini-albom AHIDA, jaki składajecca z čatyroch novych piesień, što stylistyčna vielmi mocna adroźnivajucca ad papiaredniaha alboma. Heta bolš tancavalnaja intensiŭnaja muzyka.
Adkul nazva
Jak tłumačać sami chłopcy, nazva była vybrana tamu, što Niurnbierh maje suviaź z historyjaj Biełarusi, a mienavita ź Vialikim Kniastvam Litoŭskim. Prapanovu karanavać Vitaŭta vykazaŭ farmalny kiraŭnik Śviatoj Rymskaj impieryi Žyhimont Luksiemburhski. Z hetaj prapanovaj pahadziŭsia karol Polščy Jahajła. A voś polskaja znać vystupiła suprać.
Kali stary kniaź u 1340 hodzie pavinien byŭ stać karalom, karona dla budučaj karanacyi była vyrablena majstrami ŭ Niurnbierhu. Na žal, karona źnikła padčas pieravozki. Jość viersija, što jaje skrali niedzie ŭ Polščy.
Ciapier hurt znachodzicca ŭ hastrolnym tury pa Jeŭropie. Jon pačaŭsia kancertami ŭ Sarajevie. A skončycca ŭ Poznani. Usiaho hurt vystupić u 10 krainach i daść za miesiac 17 kancertaŭ.
U čym pośpiech
Jak razvažajuć sami ŭdzielniki hurta, «na anhlijskaj movie pieśni pryjelisia, heta niešta takoje štodzionnaje». «Kala 80% muzyki ŭ śviecie vychodzić na anhlijskaj movie, a na niejkich nacyjanalnych movach pa-raniejšamu ličycca niečym novym, ekzatyčnym».
Ale, jak ličyć muzyčny ahladalnik Alaksandr Čarnucha, reč nie tolki ŭ hetym.
«Biełaruskija hurty stvarajuć unikalny nastroj i atmaśfieru, pieradajuć adčuvańnie peŭnaj histaryčnaj epochi i vyklikajuć niešta nakštałt fantomnaj nastalhii — sum pa časie, u jakim ty nikoli nie žyŭ».
Čytajcie jašče:
Jak amierykancy reahujuć na biełaruski rok
Piać biełaruskich artystaŭ, jakich vy možacie nie viedać, ale ich słuchajuć sotni tysiač
