Narada pa adukacyi ŭ Alaksandra Łukašenki. Skrynšot ź videa telehram-kanała «Puł piervoho»
Na naradzie pa pytańniach adukacyi miž Alaksandram Łukašenkam i ministram adukacyi Andrejem Ivancom adbyŭsia dyjałoh, ź jakoha možna zrazumieć, što vypusknikoŭ biełaruskich univiersitetaŭ čakajuć bolšyja terminy raźmierkavańnia.
Videa raźmiaściła pres-słužba Łukašenki ŭ telehram-kanale «Puł piervoho».
Alaksandr Łukašenka pačaŭ z abureńnia sistemaj raźmierkavańnia: «Što za sistema takaja? Skončyŭ VNU, nie adpracavaŭ i pajšoŭ».
«Siońnia i biudžetnik, i płatnik, pa našym mierkavańni, pavinny adpracoŭvać, — adkazaŭ Ivaniec, — adpaviednyja źmieny my hatovyja ŭnieści ŭ Kodeks ab adukacyi».
Ministr adukacyi dadaŭ, što jaho viedamstva pierahledzieła ŭ bok pavyšeńnia i vydatki dziaržavy na padrychtoŭku śpiecyjalista. Jon pryvioŭ u prykład Biełaruski dziaržaŭny ŭniviersitet, dzie ŭ vyniku pieraraźliku vyjšła, što zaraz student-biudžetnik, jaki zachoča atrymać dypłom, nie adpracavaŭšy raźmierkavańnia, budzie vinavaty dziaržavie 40—45 tysiač rubloŭ.
Łukašenka praciahnuŭ raźvivać temu adnosna taho, što dla krainy nieprymalna, kali śpiecyjalisty paśla ŭniviersitetaŭ źjazdžajuć.
«Nastaŭnika abo miedyka my jašče na rabocie vučym, a jany źjazdžajuć. Ja liču, tut pavinna dziejničać zabarona abo paŭzabarona. Nu, dapuścim, piać hadoŭ.
«Metavik» — 5 hadoŭ (jano tak jość i ciapier — Red.), a moža, niedzie aryjentavacca i na 7 hadoŭ», — zahadaŭ Łukašenka.
A ministr Ivaniec ahučyŭ arhumient, jaki čytajecca jak abhruntavańnie ŭviadzieńnia abaviazkovaha raźmierkavańnia i dla płatnikaŭ.
«Siońnia tolki 50—70% płatnik kampiensuje za vučobu. U nas niama całkam płatnaj adukacyi, u nas u realnaści paŭpłatnaja adukacyja», — skazaŭ jon. Na hetym videa łukašenkaŭskaj pres-słužby abryvajecca.
Treba skazać, što całkam płatnaj adukacyi sapraŭdy niama: sistema pracuje tak, što toj, chto atrymlivaje płatnuju pieršuju adukacyju, maje prava na viartańnie padachodnaha padatku pa miescy pracy, kali jon płacić sam za siabie. Kali nie sam, to takoje prava majuć baćki abo apiekuny studenta.
Hetaja miera častkova strymlivaje abituryjentaŭ ad pastupleńnia na płatnaje navučańnie za miažu, bo ŭ hetym vypadku takuju kampiensacyju jany atrymać nie mohuć.
Jak «Našaj Nivie» viadoma ad infarmavanych krynic, ciapier rychtujucca źmieny ŭ miechanizm raźmierkavańnia studentaŭ — płatniki taksama buduć abaviazanyja adpracoŭvać.
Mahčyma, płatnikaŭ abaviažuć adpracoŭvać adzin hod, ale, jak kažuć u viedamstvach, «Łukašenka chacieŭ by, kab heta było bolš čym hod, jon uvohule suprać taho, kab vypuskać ludziej ź Biełarusi, tamu pakul što my havorym pra toje, što mahčyma ŭ momancie, a što nie», — kaža surazmoŭca «Našaj Nivy».
Terminy adpracovak dla nastaŭnikaŭ i miedykaŭ pry metavym nakiravańni mohuć vyraści da siami hadoŭ. Termin zvyčajnaha raźmierkavańnia moža vyraści da piaci hadoŭ.
U kancy narady Łukašenka zajaviŭ:
«Nakont adpracoŭki my vyznačylisia. Terminy (užo ciapier treba nasielnictva akuratna infarmavać pra heta) my pavialičvajem. My rychtujem dla siabie śpiecyjalistaŭ. My padrychtavali, dajom tabie pieršaje pracoŭnaje miesca — idzi i pracuj. Voś tudy treba, my ciabie tudy nakiroŭvajem».
Kali heta zdarycca, Biełaruś zrobić jašče adzin krok u kirunku pryhonnaha prava i da jašče bolšaha kantrolu dziaržavy nad čałaviekam.
Heta taksama pakazvaje, što łukašenkaŭcy sutyknulisia z prablemaj deficytu kadraŭ u vyniku chvali emihracyi, vyklikanaj masavymi represijami i saŭdziełam Biełarusi ŭ vajnie suprać Ukrainy.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
