Fota: kadr ź filma «Džentlmieny»
U 2019 hodzie na ekrany vyjšaŭ film, jaki zapuściŭ adrazu dva cikavyja trendy. Pieršy — pa ŭsim śviecie mužčyny stali kuplać spartyŭnyja kaściumy ŭ jarkuju kletku. Druhi — hety prynt pačaŭ ustojliva asacyjavacca z adzieńniem anhlijskich vuličnych band.
Karcina «Džentlmieny» — druhaja sumiesnaja praca Haja Ryčy i askaranosnaha mastaka pa kaściumach Majkła Uiłkinsana. Metr taksama raspracoŭvaŭ ubory da našumiełych chitoŭ «300 spartancaŭ», «Zachavalniki» i dźviuch finalnych častak «Źmiarkańnia». Ale mienavita spartovyja harnitury z «Džentlmienaŭ» pajšli ŭ narod. Stvarajučy ich, Uiłkinsan uziaŭ kłasičnuju brytanskuju tkaninu-šatłandku, uvydatniŭ prynt i pieranios jaho na flis — u vyniku atrymałasia adzieńnie, jakoje stała svojeasablivaj uniformaj dla anhlijskich chułzaŭ, što virtuozna vałodajuć kułakami.
Siarod prychilnikaŭ klatčastych bombieraŭ akazaŭsia i «apošni dyktatar Jeŭropy» — Alaksandr Łukašenka. U takim jon pravodziŭ prezidenta Ekvataryjalnaj Hviniei Teadora Abijanha Nhiemu Mbasaha ŭ aeraport. Brejk Łukašenka, napeŭna, nie tancuje, ale, apranajučy takuju kurtku na pratakolnyja mierapryjemstvy, vyhladaje kałarytna.
Fota: sajt president.gov.by
Reč u tym, što aficyjnyja sustrečy padparadkavanyja strohim zakonam dres-kodu i, kali ŭ mierapryjemstva niama paznaki «biez halštukaŭ», prysutnyja pavinny prytrymlivacca kłasičnych vobrazaŭ. Addajučy pieravahu spartovamu łuku, Łukašenka padkreślivaje svajo stanovišča jak haspadara situacyi. Ale dzie pavaha da hościa? Ën ža taksama dyktatar, dy jašče i z takim stažam pracy. «Vielmi viadomy i prasunuty čałaviek», jak pra jaho skazaŭ sam Alaksandr Łukašenku Uładzimiru Pucinu.
Jašče adna luboŭ Łukašenki — heta spałučeńnie spartyŭnaha bombiera ź biełaj vajskovaj kašulaj i kežualnymi štanami. Ale padobnaja eklektyka sustrakałasia ŭ jaho harderobie i raniej. Zdajecca, palityku byvaje składana vyznačycca z rolaj, jakuju jon vykonvaje — mudraha patryjarcha ci adstaŭnoha treniera.
Fota: sajt president.gov.by / Biełta
Zaviaršajuć kamplekt tekstylnyja krasoŭki ad brenda H`D`S`N Baracco koštam kala 390 jeŭra. Abutak upryhožany fakturnymi zamšavymi našyŭkami i minijaciurnymi bliskučymi spražkami. Ale hałoŭnaja fiška pary — lohkaja padešva Vibram, jakaja źnižaje stomlenaść noh.
Alaksandr Łukašenka nosić tekstylnyja krasoŭki ad brenda H`D`S`N Baracco koštam kala 390 jeŭra. Fota: sajt maskoŭskaha CUMa
Vyhlad «fizruka na školnaj liniejcy» nie dadaje palityku ačkoŭ. Sproba zdavacca maładym i badziorym nie pracuje, kali trendavy bombier zamały ŭ rajonie talii.
Čytajcie taksama:
«Heta tabie zamiest kvietak». Psichołah patłumačyŭ, čamu mužčyny robiać dykpiki
Kroksy ad «Marka», martensy ad «Pramienia». Šukajem stylny abutak biełaruskich vytvorcaŭ
«Kunilinhus u kožnuju chatu». Fieministka zapuściła brend adzieńnia pra siłu biełaruskich žančyn
