Aficer palicyi na mahile Jaŭhiena Pryhožyna, 29 žniŭnia 2023 hoda. Fota: AP Photo / Dmitri Lovetsky
Karespandenty vydańnia The New York Times parazmaŭlali z bolš jak tuzinam ciapierašnich i byłych čynoŭnikaŭ u Vašynhtonie, Jeŭropie, Afrycy i Rasii, a taksama z čatyrma rasijanami, jakija pracavali na Pryhožyna. Mnohija z apytanych vykazalisia na ŭmovach ananimnaści.
Pa słovach surazmoŭcaŭ, ciapier u Rasii idzie ciažkaja baraćba za aktyvy Pryhožyna pamiž bujnymi hulcami ŭ rasijskich uładnych strukturach, uklučajučy dva raźviedvalnyja ahienctvy. Baraćba ŭskładniajecca niazhodaj niekatorych vahnieraŭcaŭ pierajści pad kantrol Ministerstva abarony Rasii. Zamiest hetaha jany padtrymlivajuć pieradaču ŭłady synu Pryhožyna.
«Vahnier» — heta nie tolki hrošy, heta svajho rodu relihija», — zajaviŭ vydańniu Maksim Šuhalej, palityčny kansultant Pryhožyna, vyzvaleny ŭ 2020 hodzie z turmy ŭ Livii, dadaŭšy, što jon hanarycca tym, što byŭ častkaj najomnikaŭ.
«Małavierahodna, što hetaja struktura całkam źniknie. Dla mianie heta niemahčyma», — skazaŭ jon.
Žurnalisty adznačajuć, što baraćba za aktyvy Pryhožyna maje dalokasiažnyja nastupstvy. Jaho vajenizavanaja hrupoŭka była samaj efiektyŭnaj bajavoj siłaj Rasii va Ukrainie ŭ minułym hodzie, i jaje raśsiejvańnie padnimaje pytańni ab zdolnaści Rasii ździajśniać novyja nastupy.
Ale samuju vialikuju kaštoŭnaść dla Rasii PVK «Vahnier» pradstaŭlaŭ u afrykanskich krainach, u tym liku ŭ Livii i Centralnaafrykanskaj Respublicy. Vahnieraŭcy dapamahli ŭzmacnić upłyŭ Rasii na kantyniencie, asłabiŭšy ŭpłyŭ u rehijonie takich zachodnich dziaržaŭ, jak Francyja i ZŠA.
Vahnieraŭcy ŭ Mali. Fota: French Army via AP
Spasyłajučysia na słovy zachodnich čynoŭnikaŭ, žurnalisty śćviardžajuć, što baraćbu za kantrol nad klučavymi aśpiektami dziejnaści PVK «Vahnier» viaduć Słužba źniešniaj raźviedki Rasii (SZR) i Hałoŭnaje raźviedvalnaje ŭpraŭleńnie (HRU).
Čakajecca, što SZR voźmie pad kantrol prapahandysckuju impieryju Pryhožyna, jakaja ŭklučaje «fabryku trolaŭ». HRU moža ŭziać kantrol nad rasijskimi intaresami i apieracyjami za miažoj.
Bitva za Afryku
Žurnalisty adznačajuć, što vajna va Ukrainie nie mieła vialikaha značeńnia dla intaresaŭ Pryhožyna ŭ Afrycy, jakija pastajanna raśli. Na ŭkrainski front była pierakinutaja nievialikaja častka sił. Bolšaść zastavałasia na miescy. Ale niaŭdały miaciež u červieni pastaviŭ afrykanskija apieracyi Pryhožyna pad vializny cisk.
Na praciahu lipienia-žniŭnia jamu pryjšłosia pierasoŭvacca chutkimi tempami pa kantyniencie, imknučysia zabiaśpiečyć sabie sajuźnikaŭ i ŭmacavać dziełavyja intaresy. A svaim padraździaleńniam u Biełarusi jon daručyŭ padrychtavacca da «novaha padarožža ŭ Afryku».
Paralelna z Pryhožynym u Afryku stali ździajśniać pajezdki vysokapastaŭlenyja kramloŭskija čynoŭniki. Jany imknulisia danieści pasył ab tym, što Rasija mianiaje padparadkavańnie vahnieraŭcaŭ. Adnym ź ich byŭ namieśnik ministra abarony hienierał Junus-Biek Jaŭkuraŭ, jakoha Pryhožyn publična prynižaŭ padčas svajho miaciažu.
U zadačy Jaŭkurava ŭvachodziła pierakanać jak afrykanskich i siryjskich lidaraŭ, tak i vieteranaŭ «Vahniera» źmianić svaju łajalnaść da Pryhožyna.
Kankurencyja ŭzmacniałasia, i ŭ kancy lipienia ŭ Mali, Burkina-Faso i Centralnaafrykanskaj Respublicy (CAR) uspychnuli skaardynavanyja mitynhi ŭ padtrymku «Vahniera». U žniŭni Pryhožyn naviedaŭ stalicu CAR i sustreŭsia tam z prezidentam krainy. Na nastupny dzień adbyłasia sustreča z delehacyjaj z Sudana.
Zatym Pryhožyn nakiravaŭsia ŭ Liviju, dzie, pa słovach francuzskich čynoŭnikaŭ, jahony samalot zrabiŭ dva prypynki. A svoj pieršy paśla miaciažu videazvarot, pa słovach analitykaŭ, jon źniaŭ u Mali.
Ale ŭśled za Pryhožynym 22 žniŭnia ŭ Liviju prybyŭ Jaŭkuraŭ. Tam jon sustreŭsia ź viarchoŭnym hałoŭnakamandujučym Chalifam Chaftaram. Pieramovy skončylisia pahadnieńniem ab tym, što bajcy PVK «Vahnier» zastanucca ŭ krainie, ale kantrol nad imi piarojdzie da HRU. Na nastupny dzień try hałoŭnyja kiraŭniki «Vahniera» zahinuli.
U kancy žniŭnia — pačatku vieraśnia Junus-Biek Jaŭkuraŭ praciahnuŭ svaje pajezdki pa Afrycy. Jon sustreŭsia z prezidentam Burkina-Faso, a zatym adpraviŭsia ŭ Mali.
Junus-Biek Jaŭkuraŭ i lidar Burkina-Faso Ibrahim Traare. Skryn videa: VOA Africa / Youtube
Niapeŭnaja budučynia «Vahniera»
Vydańnie spasyłajecca na mierkavańnie Šuhaleja, jaki śćviardžaje, što rasijski ŭrad nie moža całkam uziać pad svoj kantrol «Vahnier» ci dziejničać hetak ža efiektyŭna, jak jaho bajcy. Jon taksama razhladaje ŭ jakaści patencyjnaha spadčyńnika impieryi syna Pryhožyna Paŭła.
«Ja dumaju, što jon pavinien vyrašyć niekatoryja z prablem. Nakolki ja viedaju, jon da hetaha hatovy», — cytuje vydańnie słovy Šuhaleja.
U toj ža čas aficyjnyja asoby ŭ Vašynhtonie śćviardžajuć, što pakul rana kazać pra toje, jak usio składziecca.
Niekatoryja zhodnyja, što Pavieł Pryhožyn, jakomu za dvaccać i jaki ź minułaha hoda znachodzicca pad sankcyjami ZŠA, pasprabuje ŭstalavać kantrol nad kampanijaj baćki. Ciapier Pavieł kiruje tryma firmami nieruchomaj majomaści ŭ Pieciarburhu.
Vydańnie śćviardžaje, što syn moža zachavać častku aktyvaŭ baćki ŭ Rasii, jakija, pavodle źviestak «Ahienctva», u 2022 hodzie składali kala 800 miljonaŭ dołaraŭ. Ale jamu spatrebicca ŭchvaleńnie Kramla, kab praciahvać kantralavać dziejnaść za miažoj, dzie ŭrady kuplajuć jak hieapalityčnuju padtrymku Maskvy, tak i pasłuhi vahnieraŭcaŭ.
Amierykanskija čynoŭniki ciapier kažuć, što jość tuzin pryvatnych kampanij, jakija taksama mohuć być dałučanyja da paravajennych apieracyj.
Mahčymy hałoŭny kandydat — heta PVK «Redut», jakaja maje ciesnyja suviazi z vajskovaj raźviedkaj i jakuju niadaŭna raskrytykavaŭ adzin sa źviazanych z «Vahnieram» akaŭntaŭ u telehramie za toje, što jana nie vykanała «pieršapačatkovych umoŭ kantrakta», jakija abiacała svaim najmitam.
U samych słabych krainach Afryki ŭsio jašče jość vialiki popyt na hałoŭnuju prapanovu «Vahniera» — abaronu režymu. I śmierć Pryhožyna tolki ŭzmacniła žadańnie niekatorych afrykanskich krain, asabliva takich, jak Burkina-Faso, imknucca da bolš ciesnych adnosin z Kramlom.
Čytajcie jašče:
«Usio ŭ paradku». Pryhožyn i paśla śmierci praciahvaje mistyfikavać — źjaviłasia videa ź im
Ci moža Pryhožyn pierabazavacca ŭ Afryku? Voś što ŭjaŭlaje saboj afrykanskaja sietka PVK «Vahnier»
