«Palaču ŭ Biełaruś»
«Termin dziejańnia pašparta zakančvajecca mienš jak praz čatyry miesiacy. Kali bližej da kanca hoda nie budzie novych paviedamleńniaŭ abo źmianieńniaŭ — palaču na tydzień-paŭtara ŭ Biełaruś pa novy, bo biez pašparta sumnavata. Tak, heta vielmi niepryjemna, ale pakul što varyjantaŭ nie baču.
Pierajezdu ŭ Jeŭropu nie razhladaju. Kab padacca na šenhien u Hruzii, patrebny DNŽ. Ale dla jaho atrymańnia ŭ mianie jašče nie ŭsie ŭmovy vykananyja pa IP. Nie fakt, što paśpieju, plus zvyčajna dla šenhiena prosiać, zdajecca, nie mienš za 3 ci 6 miesiacaŭ dziejańnia pašparta — taksama nie varyjant».
«PBH abo mižnarodnaja abarona»
«U mianie pašpart da śniežnia 2024 hoda. Płanuju albo rabić PBH (paŭtorna, pieršym, zroblenym u Biełarusi, nie skarystaŭsia), albo padacca na mižnarodnuju abaronu ŭ Polščy.
Na hety momant viedaju, što jość zrazumiełyja miechanizmy atrymańnia «zamiežnych pašpartoŭ» u Polščy i Litvie. Pakul nie vyjechaŭ z Hruzii, šukaju infu, u jakich krainach, kali paśpieju zrabić DNŽ, možna budzie taksama atrymać taki dakumient, i jak mienavita.
«Možna padacca na ŭciekača»
«Pašpart zakančvajecca ŭ 2025-m. U Biełaruś, samo saboj zrazumieła, jaho mianiać nie pajedu. Tamu zastajecca varyjant albo čakać pašpart Novaj Biełarusi, albo padavacca na ŭciekača.
Dzie mienavita? U hety momant jašče ničoha kankretnaha nie płanavaŭ, da 2025-ha, moža, budzie bolš infarmacyi ad Kabinieta Śviatłany Cichanoŭskaj, tady i budu vyrašać. Jašče minimum hod jość padumać i praanalizavać situacyju».
«Dumaju naradzić dzicia ŭ Brazilii»
«U mianie pašpart zakančvajecca ŭ studzieni 2027-ha, ale dumać nad varyjantami pačynaju ŭžo ciapier. Adna nadzieja na prajazny dakumient u Polščy. U Hruzii zastavacca ŭ takoj situacyi nie vypadaje, bo možna potym i nie vyjechać.
Jašče apošni čas dumaju pra varyjant naradzić dzicia ŭ Brazilii. Maja byłaja adnahrupnica tak zrabiła — i ŭžo na darozie da hramadzianstva. Pašpart narmalnaj krainy — najlepšy padarunak na dzień naradžeńnia dziciaci».
«Maru pra pašpart Novaj Biełarusi»
«Nie tak pałochaje, što pašpart skončycca pa terminie, jak toje, što tam skončacca staronki. Bo haniać mašynu na biełaruskich numarach u Turcyju treba raz na kvartał — heta 4 štampy (paŭstaronki ŭ idealnym vypadku).
A što budzie potym, niezrazumieła. Što rabić, kali ŭ pašparcie jość vizy, a pustych staronak niama? Zrazumieła, što možna pastavić mašynu na hruzinskija numary, i tady nieabchodnaść u rehularnych pajezdkach adpadzie. Ale heta paŭpłyvaje na svabodu pieramiaščeńnia. I tut treba stavić na šali: zachavańnie staronak abo žadańnie padarožničać i mieć šlachi adychodu na aŭto.
U Biełaruś lišni raz ja b nie jeździŭ. Nie viedaju, ci moža dziaržava niešta mnie vystavić. Tak što aktyŭna dumaju nad ahučanym vyšej vybaram i maru pra pašpart Novaj Biełarusi».
Pravaabaronca: «U Hruzii možna padacca na mižnarodnuju abaronu»
Raman Kiślak, pravaabaronca, namieśnik kiraŭnika biełaruskaj dyjaspary Adžaryi, raskazaŭ, što čuvać z nadańniem mižnarodnaj abarony biełarusam u Hruzii.
«U Hruzii padacca na mižnarodnuju abaronu možna. Prosta mała chto padajecca — nijakich bonusaŭ ad hetaha niama, — tłumačyć surazmoŭca. — Štomiesiačnaja dapamoha (dla asob z humanitarnym statusam) — heta 45 łary (prykładna 17 dołaraŭ). Miedycynskaja strachoŭka pakryvaje tolki ekstrannyja vypadki (i jašče naradžeńnie dziaciej; viedaju vypadki, kali biełaruski naradžali za košt hruzinskaj dziaržavy). Pašpart (prajazny dakumient) adbirajuć.
Ź plusoŭ — lehalizacyja statusu. Tak što padajucca tyja, u kaho niama vyjścia.
Ciapier situacyja mianiajecca, i takich ludziej, biezumoŭna, stanie bolš. Pavialičycca kolkaść zvarotaŭ — pavialičycca mahčymaść atrymańnia statusu. Prosta pakul vielmi mała ludziej prajšli praz hetuju praceduru, nakolki mnie viadoma.
Ja asabista viedaju pra troch ludziej, jakija padalisia ŭ 2020-m, i ŭsie troje atrymali admovu ŭ 2022-m. Ale nasamreč takich kiejsaŭ bolš. Sa mnoj kansultavalisia ludzi, jakija tolki-tolki padalisia tut na mižnarodnuju abaronu — razam ich da dziasiatka.
Prablema nie ŭ samoj padačy abo niejkaj składanaści. Tak, jość niekatory deficyt infarmacyi, niedakładnaści. Naprykład, Ofis upaŭnavažanaha pa pravach čałavieka (ambudsmiena) Hruzii raspaŭsiudžvaje infarmacyju, što možna padyści ŭ lubuju ŭstanovu i napisać zajavu. Heta nie tak, my praviarali. Padać zajavu na abaronu možna tolki ŭ Departamiencie mihracyi Ministerstva ŭnutranych spraŭ u Tbilisi. Tam ža prachodziać i intervju.
Što dalej? Budziem «nahružać» hruzinski ŭrad zajavami. My ŭžo sprabujem roznymi sposabami kamunikavać i vyrašać pytańni, kab padychod źmianiŭsia. Moža, kali kolkaść zajaŭnikaŭ pavialičycca, to stanie zrazumieła i staŭleńnie hruzinskaha ŭrada da nas — ci moža jon vydavać biełarusam prytułak».
Čytajcie taksama:
Zakančvajecca biełaruski pašpart. I što ciapier rabić? Parady advakata
Biełarusam, jakija žyvuć u Hruzii, varta pakłapacicca pra jeŭrapiejskuju vizu
a potom čitajem kriminalnyje svodki
i biełarusov v Biełarusi vsie mieńšie :/