Ilustracyja: Hancavicki čas
Na pytańnie žurnalistki, na jakoj padstavie vyklikajuć na «hutarku», adkazu jana nie atrymała. Śviatłana Małyška admaŭlałasia jechać, bo nijakich zakonnych padstaŭ vykonvać patrabavańni milicyjantaŭ nie było.
Ale ŭ vyniku karespandentka «Hancavickaha času» ŭsio ž pajechała ŭ milicyju, dzie ź joj razmaŭlaŭ pieršy namieśnik načalnika Hancavickaha RAUS Dzianis Sančuk. Jak vyśvietliłasia, jaho zacikaviŭ artykuł z nazvaj «Centr Hancavičaŭ da «Dažynak» abłysieŭ»: u tekście idzie havorka pra toje, jak horad rychtujecca da praviadzieńnia abłasnoha śviata «Dažynki».
Pavodle słoŭ Śviatłany Małyški, surazmoŭca vykazaŭ pretenzii da zahałoŭka: maŭlaŭ, jon nibyta nie adpaviadaje rečaisnaści. U toj ža čas, na dumku milicejskaha načalnika, varta było b pisać pra toje, što horad da śviata pieraŭtvarajecca i dobraŭparadkoŭvajecca.
Žurnalistka pryviała svaje dovady pra abjektyŭnaść ułasnaj infarmacyi, a taksama adznačyła, što źviartałasia pa kamientar da śpiecyjalista Hancavickaha rajvykankama Valeryja Rusakieviča, ale adkazu nie atrymała. Čynoŭnik admoviŭsia razmaŭlać i paraiŭ čytać dziaržaŭnuju rajonku «Savieckaje Paleśsie», a taksama praŭładnuju supołku ŭ miesiendžary.
U vyniku razmovy ŭ milicyi Śviatłanu Małyška papiaredzili, što buduć uvažliva čytać jaje artykuły.
Taksama 29 žniŭnia milicyjanty naviedali jašče adnaho supracoŭnika internet-resursu «Hancavicki čas» Siarhieja Bahrova, jakoha taksama zaprasili na razmovu ŭ RAUS. Padstava była dziŭnaja — niejki «siamiejny kanflikt», pra jaki Siarhiej Bahroŭ ničoha nie viedaŭ.
U milicyju supracoŭnik sajta vyrašyŭ jechać razam z žonkaj, kab daviedacca, chto ź ich «skandalist». Ale ŭ pastarunku vyśvietliłasia, što prysutnaść žonki nie spatrebiłasia, bo havorka pajšła zusim na inšuju temu, źviazanuju z pracaj Siarhieja Bahrova ŭ svoj volny čas u jakaści dydžeja adnaho z kafe.
Taksama jaho spytali ab pracy dla internet-resursu ganc-chas.by. Ale atrymaŭšy adkaz, što artykuły Siarhiej nie piša, a zajmajecca niejrasietkami, «prafiłaktyčnaja hutarka» skončyłasia.
Jak miarkujuć u redakcyi «Hancavickaha času», sutnaść hetych razmoŭ u tym, što kiraŭnictvu Hancavickaha rajvykankama nie padabajecca, jak niezaležny internet-resurs aśviatlaje padrychtoŭku da abłasnych «Dažynak».
U minułyja vychadnyja pahutaryć z supracoŭnikami redakcyi pažadali staršynia rajvykankama Uładzimir Białoŭ i jaho namieśnik Siarhiej Sarokaŭ. Jany pa čarzie telefanavali karespandentam sajta «Hancavicki čas» i vykazvali svaju niezadavolenaść. Adnak kali čynoŭniki nie atrymali adkazu nakont aŭtaraŭ publikacyj, da hetaj spravy vyrašyli dałučyć milicyju.
Čytajcie taksama:
U Hancavičach dziatva papalavała na zubra
