Estonskija žurnalisty vyjavili, što estonskaja kampanija Stark Logistics, źviazanaja z mužam premjer-ministarki Estonii Kai Kałas, pastaŭlała ŭ Rasiju kampanienty dla aerazolnych bałončykaŭ, jakija vykarystoŭvalisia dla vyrabu ślezaciečnaha hazu.
Stark Logistics zajmałasia pieravozkaj kampanientaŭ, jakija rasijskaja kampanija Metaprint pastaŭlała zavodu «Ciumienskija aerazoli». Jak adznačaje Eesti Päevaleht, sa spravazdačnaści vynikaje, što tolki z kanca lutaha 2022 da kanca žniŭnia 2023 hoda Metaprint pastaviła tavaraŭ u Rasiju na ahulnuju sumu amal 30 miljonaŭ jeŭra. Pry hetym jana zapłaciła za pieravozku Stark Logistics kala paŭtara miljona jeŭra.
Kampanija «Ciumienskija aerazoli» pradavała bałončyki z hazam MUS Rasii i Biełarusi — a ź ich dapamohaj paśla palicyja razhaniała pratesnyja mitynhi.
Jak piša telehram-kanał «Siriena», adzin z rekłamnych słohanaŭ raźmieščanaha ŭ Biełarusi zavoda «Ciumienskich aerazolaŭ» za 2018 hod hučaŭ tak: «Pravaachoŭniki Rasii i Biełarusi acanili naš ślezaciečny haz!»
Niadaŭna vyśvietliłasia, što muž Kai Kałas vałodaje dolaj kampanii Stark Logistics, jakaja zajmajecca pieravozkami dla kampanii Metaprint — jana pracuje ŭ tym liku ŭ Rasii.
Estonskija ŚMI ličać, što ŭ Metaprint i Stark Logistics adzin i toj ža bujny ŭłaśnik, a premjerka Kaja Kałas zajaŭlaje, što ni pra što nie zdahadvałasia.
Čytajcie taksama:
Premjerka Estonii kateharyčna admoviłasia sychodzić u adstaŭku
Urad Łatvii ŭznačalić Evika Silinia. Takim čynam, uradami ŭsich troch krain Bałtyi kirujuć žančyny
