Geely Emgrand. Fota: geely.by
Minsk
U dylera Geely na Majakoŭskaha, 2 i Arłoŭskaj, 88 mašyn u najaŭnaści niama. Achvotnym nabyć aŭtamabil prapanujuć pakinuć svaje kantakty, kab zanieści ich u list čakańnia.
Pa słovach kansultanta, čakać aŭtamabil daviadziecca kala troch miesiacaŭ.
Prynamsi, takija terminy byli nazvanyja ŭ dačynieńni da dźviuch samych dastupnych madelej — Geely Emgrand ciapier kaštuje ad 42 900 rubloŭ, Belgee X50 (raniej pradavaŭsia pad nazvaj Geely Coolray) kaštuje ad 62 800 rubloŭ.
U dylera Geely na Cimirazieva ŭ najaŭnaści jość tolki Geely Tugella, ceny na jakija pačynajucca ad 111 600 rubloŭ (kala 35 tysiač dalaraŭ).
Žadajučym nabyć Geely Emgrand i Belgee X50 prapanujuć zapisacca ŭ list čakańnia. Aŭtamabili z MKPP mohuć być praz 2 miesiacy, a voś mašyny z AKPP treba budzie pačakać jašče bolš.
Fota: skrynšot z sajta geely.by
Što ŭ rehijonach?
U Breście, jak i ŭ inšych sałonach vobłaści, mašyn u najaŭnaści taksama niama. Siedan Emgrand u zaležnaści ad kamplektacyi daviadziecca čakać minimum 1-2 miesiacy. Z Belgee X50 (były Coolray) jašče składaniej. Aŭto daviadziecca čakać ad 3 da 5 miesiacaŭ.
Tym, chto žadaje nabyć aŭtamabil, jak i ŭ staličnych aŭtacentrach, prapanujuć zapisacca ŭ elektronnuju čarhu. Za 5-10 dzion da pryjezdu aŭtamabila da dylera mieniedžar musić stelefanavacca z pakupnikom. Kali nieabchodnaść u kupli aŭto zastajecca, klijenta zaprašajuć na padpisańnie damovy.
Homiel
U Homieli ŭ najaŭnaści jość Geely Tugella ad 111 600 rubloŭ, a taksama Geely Monjaro za 141 900 rubloŭ (kala $44 000).
A voś try samyja dastupnyja madeli Geely — Emgrand, Coolray (X50) i Atlas PRO možna nabyć, tolki dačakaŭšysia čarhi.
Chutčej za ŭsio homielski dyler abiacaje pryvieźci Emgrand — 2-3 miesiacy. Coolray (X50) daviadziecca čakać 3-4 miesiacy, a Atlas PRO — ažno 5-7 miesiacaŭ.
Jak daŭno nazirajecca deficyt?
Samych papularnych madelej: Emgrand, Coolray (X50), Atlas PRO u najaŭnaści niama va ŭsioj krainie. Ale bolš darahija madeli ŭ niekatorych dyleraŭ byvajuć. Praŭda, kaštujuć takija aŭto ad 100 tysiač rubloŭ.
Deficyt nazirajecca ŭžo nie pieršy miesiac.
Adny dylery kažuć, što nie majuć aŭto ŭ najaŭnaści z kanca červienia, inšyja zajaŭlajuć pra niedachop papularnych madelej jašče ź viasny.
Ceny na aŭtamabili Geely zastajucca niaźmiennymi ź viasny biahučaha hoda. Tym časam biełaruski rubiel prasiadaje, što robić kuplu novaha aŭto bolš vyhadnaj dla tych kupcoŭ, chto maje valutnyja źbieražeńni.
Adnak treba adznačyć, što ceny na aŭtamabili pry zapisie ŭ list čakańnia nie fiksujucca. Tamu zastajecca vierahodnaść, što kali padydzie vašaja čarha, to aŭtamabil padaražeje. U adnym z aŭtasałonaŭ paviedamili, što pierahlad cen zavodam chutčej za ŭsio adbudziecca ŭ listapadzie-śniežni hetaha hoda.
Hladzicie i płačcie. Kolki mahli b kaštavać aŭtamabili, kali b Biełaruś nie ŭstupiła ŭ Mytny sajuz
Za kolki pierapradajuć «błatnyja» aŭtamabilnyja numary? Ceny ŭražvajuć
Minskaja firma prapanuje mašyny ź Jeŭropy na zamovu pa nierealna nizkich cenach. U čym padvoch?
