Patencyjnaj pakupnica šukaje patrebnyja sabie rečy. Skrynšot repartažu «Hrodno Plus»
Krama naležyć pradpryjemstvu «BiełJurZabieśpiačeńnie». Jano było śpiecyjalna stvorana Ministerstvam justycyi, kab aceńvać i pradavać rečy, aryštavanyja orhanami prymusovaha vykanańnia, raskazali na kanale «Hrodno Plus».
Padčas adkryćcia kramy. Skrynšot repartažu «Hrodno Plus»
Raniej kanfiskavanuju majomaść pradavali tolki praź internet-kramu abo na aŭkcyjonie. U afłajn-kramie jaho zmohuć pradavać chutčej i tak paskoryć pakryćcio daŭhoŭ, spadziajecca načalnica Hałoŭnaha ŭpraŭleńnia justycyi Hrodzienskaha abłvykankama Alena Jurhiel.
U novaj kramie pradajucca, naprykład, kubki za dva rubli, akulary za piać rubloŭ, navušniki za try. U prodažy taksama tavary dla doma, suvieniry, budaŭničyja materyjały, dziciačyja cacki, kaśmietyka, kancylaryja, tavary dla žyvioł.
Ceny pačynajucca ad 85 kapiejek, pachvaliŭsia viadučy śpiecyjalist pa prodažach hrodzienskaha filijała «BiełJurZabieśpiačeńnie» Aleh Kisiel. Taksama ŭ kramie praduhledžana sistema pieraacenki tavaraŭ: čas ad času na niekatoryja katehoryi buduć skidki da 80%.
Tavary ŭ kramie z aryštavanaj majomaściu. Skrynšoty repartažu «Hrodna Plus»
Praŭda, na aryštavanuju majomaść nie dajuć harantyj, taksama jaje nielha abmianiać abo viarnuć paśla pakupki.
Pakupniki adznačajuć, što «asartymient, u pryncypie, hodny». Bujnahabarytnych tavaraŭ nakštałt televizaraŭ ci mebli ŭ kramie niama — ich praciahvajuć pradavać praz sajt «BiełJurZabieśpiačeńnia».
Aryštavanuju nieruchomaść, mašyny, dačy i ŭčastki pradajuć na anłajn-aŭkcyjonach dva razy na tydzień. Dla ŭdziełu treba ŭnieści zadatak u 10 pracentaŭ ad koštu majomaści.
Adna z naviedvalnic padzialiłasia z supracoŭnikami dziaržaŭnaha telekanała radaściu, što zmahła tanna kupić u kramie lažanku dla sabaki.
Hrodzienskaja krama ŭžo čaćviortaja ŭ sietcy. Dahetul adkrylisia kramy aryštavanych tavaraŭ u Viciebsku, Homieli i Mahilovie.
Pry nieabchodnaści, i kali prodažy buduć dobryja, kramu buduć pašyrać, padzialilisia dalejšymi płanami ŭ «BiełJurZabieśpiačeńni».
Čytajcie taksama:
Na aŭkcyjon vystavili kalekcyju hadzińnikaŭ Viktara Babaryki
Kvateru Cichanoŭskich pradali z treciaj sproby
Pradali lecišča Niny Bahinskaj. Ci možna budzie viarnuć zabranuju režymam majomaść?
