Kapsuły dla snu možna raźmiaścić prosta ŭ ofisie. Fota: g-nap.com
Akramia ŭžo viadomych kapsulnych hatelaŭ, japoncy pajšli dalej u svaich fantazijach. I prapanavali novuju raspracoŭku — kapsułu dla snu Giraffenap, jakuju možna raźmiaścić prosta ŭ ofisie. Nazva kapsuły — heta spałučeńnie dvuch anhlijskich słoŭ «žyrafa» i «dramać».
U kapsule luby achvotny moža padramać u viertykalnaj pozie. Pry hetym jość mahčymaść adrehulavać čatyry miakkija palički dla apory. Kab zadramać, nieabchodna pryniać davoli nietradycyjnuju pozu, sahnuŭšy kaleni i źlohku nachiliŭšy vierchniuju častku cieła napierad. Hałava i ruki abapirajucca na miakkuju płatformu.
U takoj pozie śpiać u kapsule. Skryn videa kampanii-vytvorcy
Vonkavaja abałonka dobra abaraniaje ad šumu. Akramia hetaha huki, jakija spryjajuć snu, i sistema vientylacyi pavinny zrabić son idealnym.
Kampanija zajaviła, što «pracuje nad stvareńniem supolnaści, u jakoj kožny moža lohka zadramać», i ŭ kančatkovym vyniku choča «palepšyć pakazčyki ekanomiki i achovy zdaroŭja». Viadoma, što Japonija słavicca svaim pracavitym narodam. Tam navat jość śpiecyjalnaje słova «karasi», jakoje abaznačaje raptoŭnuju śmierć u vyniku pieratamleńnia i stresu.
Raspracoŭščki ŭpeŭnienyja, što ich kapsuła dla snu spadabajecca pracadaŭcam, jakija imknucca pavysić kancentracyju padnačalenych. Na sajcie kampanii-vytvorcy adznačajecca, što, paddaŭšysia drymocie i padramaŭšy 20 chvilin, supracoŭnik zmoža palepšyć svaju pradukcyjnaść za košt «adnaŭleńnia paśla stomlenaści, źnižeńnia stresu, adnaŭleńnia pamiaci i kancentracyi, a taksama palapšeńnia tvorčych zdolnaściaŭ».
Vytvorca spasyłajecca na daśledavańnie NASA, jakoje pakazała, što piłoty, jakija dramali 26 chvilin, prademanstravali palapšeńnie pradukcyjnaści i pilnaści na 34%, a čas reakcyi ŭ ich palepšyŭsia na 16%.
Kapsuły vypuskajucca ŭ dźviuch roznych viersijach: Spacia ŭ futurystyčnym biełym kolery i pakrytaja drevam Forest. Adnosna snu ŭ viertykalnaj pozie na sajcie tłumačycca, što sumiesnaje daśledavańnie z Univiersitetam Chakajda i Tajvańskim Nacyjanalnym univiersitetam pakazała, što
hetaja poza praduchilaje nadta hłyboki son i adnačasova dazvalaje čałavieku ŭvajści ŭ stan, jaki dazvalaje «lohka dychać», tamu, kali jon pračynajecca, to moža «chutka viarnucca da pracy, nie adčuvajučy hałavakružeńnia».
Praŭda, u kapsułu nie kožny supracoŭnik moža źmiaścicca. Pry vyšyni 2,5 mietra i šyryni 1,2 mietra jana padychodzić dla ludziej rostam da 180 sm i vahoju da 100 kh. Nie treba zabyvać i pra ludziej, jakija pakutujuć na kłaŭstrafobiju.
Pakul što kampanija-vytvorca testuje svaje kapsuły ŭ kafe Tokia.
Čytajcie jašče:
Japonija płanuje pabudavać całkam aŭtanomny płavajučy horad na 40 tysiač čałaviek
