Paśla skandału z mnohimi adkrytymi tvarami pratestoŭcaŭ Delfi źniaŭ videa z YouTube-kanała i zabluryŭ tvary bolš. Na dniach film byŭ apublikavany znoŭ
Dakumientalny film Mikałaja Maminava «Chronika sučasnaści», pryśviečany biełaruskim pratestam 2020 hoda i vykładzieny 24 lipienia na YouTube-kanale Delfi, vyklikaŭ šmat dyskusij, sprečak i emocyj, kanstatuje vydańnie. Aŭtar kałonki Kirył Kaścian pryznaje, što hałoŭnym pradmietam dyskusii stała biaśpieka tych, chto trapiŭ u kadry.
Ale aŭtar nastojvaje, što ŭ filmie niama novych kadraŭ, usio heta ŭžo jość u internecie i, pry žadańni, usio heta možna adšukać. Chacia i pryznaje, što «ŭ niejkaj miery film skampilavaŭ hetyja kadry i «ablahčyŭ» pracu śpiecsłužbam režymu Łukašenki».
Kaścian stavić pytańnie inakš: a «chto zabiaśpiečyŭ biaśpieku pratestoŭcaŭ u druhoj pałovie 2020 hoda, kali pratesty znachodzilisia ŭ aktyŭnaj fazie, i potym, pakul režym pracavaŭ nad pryniaćciem novaj Kanstytucyi i adaptacyjaj zakanadaŭstva da novych realij?» Aŭtar piša, što sam jon daŭno pra heta zadumvaŭsia, ale ad surazmoŭcaŭ-biełarusaŭ adkazu nie čuŭ.
«Dyskusija vakoł filma — heta ŭ niejkaj stupieni bravada tych, chto pakinuŭ Biełaruś pierad tymi, chto zastaŭsia. Bolšaść apošnich razumieje, u jakoj situacyi jany znachodziacca, ale padobnyja historyi mohuć padšturchnuć ich da emihracyi. Tamu pretenzii da aŭtaraŭ filma «Chroniki sučasnaści» i Delfi datyčna adkrytych tvaraŭ z boku častki biełaruskaj apazicyjnaj hramadskaści možna acharaktaryzavać frazaj «pozna pić Baržomi».
Aŭtar stavić pytańnie, a ci patrebny byŭ chajp vakoł filma? I adkazvaje na jaho stanoŭča.
«Delfi — heta litoŭski partał, i tym samym prablema biełaruskaha hramadstva vyjšła za ŭnutrybiełaruski «mižsabojčyk».
Maŭlaŭ, paśla 24 lutaha 2022 hoda Biełaruś kali i nie źnikła ź mižnarodnych navin, to tolki z-za dziejańniaŭ i vykazvańniaŭ Alaksandra Łukašenki i biełaruskich čynoŭnikaŭ pieravažna ŭ kantekście vajny va Ukrainie.
«Heta sadziejničaje ŭkaranieńniu niehatyŭnaha vobraza Biełarusi, jaki mižvoli raspaŭsiudžvajecca na biełaruskaje hramadstva», — piša aŭtar.
«Tamu jak zjaŭleńnie filma «Chronika sučasnaści» na YouTube-kanale Delfi, tak i nastupnuju dyskusiju treba razhladać jak mahčymaść dla taho, kab biełaruski paradak navin zamiežnych ŚMI choć by častkova pierafakusavaŭsia na prablemy, jakija adčuvaje biełaruskaje hramadstva jak unutry krainy, tak i ŭ vymušanaj emihracyi», — miarkuje aŭtar.
«Čym bolš budzie zjaŭlacca takich filmaŭ jak «Chronika sučasnaści», tym lepiej. Bo horš — heta tolki nijak», — reziumuje doktar jurydyčnych navuk Kirył Kaścian.
Pra hałoŭnuju pretenziju da filma — niajakasny randomny blur tvaraŭ — Kaścian ničoha nie napisaŭ.
Biełarusy ŭžo adreahavali na novuju kałonku vydańnia.
Čytajcie taksama:
