Fota: instahram avtonomer.by
Možna aficyjna, ale nie ŭsio tak prosta
Upadabanuju vami kambinacyju litar i ličbaŭ na dziaržnumary možna vybrać aficyjna. Pradajuć pryhožyja aŭtamabilnyja numary pa dźviuch cenach.
Za 10 bazavych vam daduć mahčymaść vybirać z tych numarnych znakaŭ, jakija ŭžo vyrablenyja i znachodziacca ŭ rehistracyjnym adździaleńni DAI. Śpisy z dastupnymi kambinacyjami vyviešvajuć u adździaleńni DAI. Ale za 370 rubloŭ pradajuć, chutčej, nie samyja admietnyja numary, naprykład, 2333, 3222, 7888, 0200, abo z parnymi numarami — 5757, 6969.
Skrynšot ź instahram-akaŭnta avtonomer.by
Kali nivodzin numar ź pieraličanych vyšej vam nie spadabaŭsia ci vas cikaviać numary z čatyrma adnolkavymi ličbami, to ich možna zamović indyvidualna. Košt takoj pasłuhi — 60 bazavych (2 220 rubloŭ).
Za hetuju sumu možna zamović lubuju kambinacyju ličbaŭ i litar z tych, što naohuł mohuć być na biełaruskich aŭtamabilnych numarach. Dla lehkavych aŭto z RUZ heta čatyry ličby ad 0 da 9, dźvie litary i kod rehijona. Usiaho isnuje 12 litar, jakija supadajuć u łacinskim i biełaruskim ałfavicie.
Što na šerym rynku
Adnak treba razumieć, što numary takoha ŭzoru vypuskajuć z 2004 hoda. I pakolki kambinacyi litar i ličbaŭ abmiežavanyja, to navat pry apłacie 60 bazavych vybar zastajecca dosyć ścipły. Asabliva kali havorka idzie pra staličny rehijon, jaki nie tolki samy vialiki pa kolkaści nasielnictva, ale i samy bahaty.
Bolš za ŭsio ŭ Minsku kacirujucca numary z čatyrma siamiorkami. Mahčymych numaroŭ z usimi siamiorkami pry roznych kambinacyjach litar u sieryi — 144 štuki. Voś tolki apošni taki numar byŭ pradadzieny ŭ dalokim 2007 hodzie.
Pry hetym siarod 144 staličnych numaroŭ z čatyrma siamiorkami jość 12 najbolš kaštoŭnych. Heta numarnyja znaki z paŭtornymi litarami.
Adzin z 12 takich numaroŭ siońnia znachodzicca ŭ prodažy. Dziaržnumar 7777 JEJE-7, miarkujučy pa dacie publikacyi, pradajuć z 21 červienia.
Skrynšot z sajta baraholka.onliner.by
«Visić užo na karčy, afarmleńnie praz kuplu-prodaž, chutka i biez składanaściej», — havorycca ŭ apisańni. «Visić na karčy» aznačaje, što redki numar na hety momant prysvojeny staromu tannamu aŭtamabilu, jaki ŭładalnik pryhožaha numara vykarystoŭvaje ŭ jakaści «viešałki». Nie vyklučana, što «korč» budzie ŭvachodzić u canu numara.
Pradaviec adznačaje, što numar u prodažy budzie znachodzicca niekalki miesiacaŭ, paśla čaho jon pradaść jaho tamu, chto prapanuje najbolšuju sumu. Pry hetym kali chtości budzie hatovy vykłaści za jaho 15 tysiač dalaraŭ, to numar budzie pradadzieny adrazu ž.
Hadami ŭ prodažy
Siarod inšych cikavych prapanoŭ na barachołcy «Anłajniera» možna adznačyć numar 1000 OO-1, jaki acenieny ŭ 13 tysiač rubloŭ (kala $4 000). Abjava, miarkujučy pa dacie publikacyi, raźmieščanaja jašče letaś, ale aktualnaja, bo aŭtar apošni raz abnaŭlaŭ jaje 17 žniŭnia hetaha hoda.
Skrynšot z sajta baraholka.onliner.by
Na barachołcy źjaŭlajucca nie tolki abjavy ad tych, chto hatovy pradać pryhožy numar, ale i ad patencyjnych pakupnikoŭ.
Tak, naprykład, adzin z karystalnikaŭ šukaje staličnyja numary 0001 abo 7777.
Skrynšot z sajta baraholka.onliner.by
Pryhožyja numary pradajucca taksama praz admysłovyja akaŭnty ŭ sacsietkach.
U akaŭncie avtonomer.by jość niekalki aktualnych abjaŭ. Tak, naprykład, za numar 1111 MM-7 pradaviec choča vyručyć 8 500 dalaraŭ.
Taki košt jon ahučvaje ŭ kamientarach, kali adkazvaje na pytańnie pra canu.
Skrynšot ź instahram-akaŭnta avtonomer.by
Najpryhažejšy numar za 0 rubloŭ
Adnym z samych pryhožych numaroŭ u Biełarusi ličycca kambinacyja 1111 II-1. Miarkujučy pa publikacyi ŭ tyktok-akaŭncie karystalnika @yaroslau18, ciapier hety numar staić na BMW M8.
Skrynšot z TikTok
Letaś samy pryhožy numar Biełarusi ŭžo traplaŭ u pole zroku miedyja. U mai minułaha hoda na av.by pisali, što ŭ niejki momant hety numar atrymała žycharka Kobryna absalutna biez dapłat. Adbyłosia heta praz peŭny źbieh abstavinaŭ.
Skrynšot z sajta av.by
Historyja vyhladała tak: pad kaniec pracoŭnaha dnia žančyna, jakoj naležaŭ hety numar, źniała aŭtamabil z uliku, zdała numar, ale vyrašyła nie płacić za zachoŭvańnie rehistracyjnaha znaka (takija pasłuhi na płatnaj asnovie prapanuje DAI), bo źbirałasia zranku rehistravać inšaje aŭto. Tamu numary patrapili ŭ ruki inšaj žančyny, jakaja apłaciła b/u numar i pastaviła na ŭlik stareńkuju KIA.
Jak praz hod samy pryhožy numar Biełarusi akazaŭsia na BMW M8 — nieviadoma.
Miarkujučy pa starych abjavach ab prodažy «błatnych» numaroŭ, niekatoryja biełarusy hatovyja płacić za pryhožy numar ad adnoj da niekalkich tysiač dalaraŭ. Ale heta drobiaź u paraŭnańni z canoj na samy darahi aŭtamabilny numar u śviecie. Viasnoju 2023 hoda ŭ Dubai praz aŭkcyjon byŭ pradadzieny numar za 15 miljonaŭ dalaraŭ. Heta byŭ numarny znak ź ličbaj «7».
Ci možna pierapradavać aŭtamabilnyja numary?
Aficyjna pierapradavać dziaržaŭnyja rehistracyjnyja numary nielha. U lubym vypadku prakručvać schiemu daviadziecca praz afarmleńnie dahavoru kupli-prodažu aŭto ŭ DAI. U svaju čarhu, DAI prapanuje pasłuhi pa zachoŭvańni aŭtamabilnych numaroŭ. Košt — 5 rubloŭ za sutki, ale minimalny termin, jaki daviadziecca apłacić, — 15 dzion. Praz davoli vysokija ceny na zachoŭvańnie numaroŭ ułaśniki pryhožych šyldaŭ, kali chočuć ich zachavać nadoŭha abo pierapradać u budučyni, rehistrujuć na ich tannyja aŭtamabili. Pažadana starejšyja za 1991 hod vypusku, kab nie płacić padatak za aŭto.
Minskaja firma prapanuje mašyny ź Jeŭropy na zamovu pa nierealna nizkich cenach. U čym padvoch?
Mašyna jak vino. Čamu ŭ Biełarusi rastuć ceny na aŭtamabili rodam z nulavych
