Papularny kurort Saranda znachodzicca na poŭdni krainy na ŭźbiarežžy Ianičnaha mora, niepadalok ad hreckaha vostrava Korfu. Fota: David Gould / Getty Images
Ałbanija — adna z samych biednych krain Jeŭropy, jakaja dziesiacihodździami zmahałasia z karupcyjaj, arhanizavanaj złačynnaściu i vielmi vysokaj emihracyjaj. Adnak sioleta maleńkuju bałkanskuju krainu napatkaŭ samy sapraŭdny turystyčny bum, piša Postimees sa spasyłkaj na Financial Times.
Pa danych Jeŭrapiejskaj asacyjacyi aeraportaŭ (ACI Europe), kolkaść avijapasažyraŭ, jakija palacieli ŭ Ałbaniju ŭ červieni hetaha hoda, pavialičyłasia bolš čym udvaja ŭ paraŭnańni ź minułym hodam. «Hetamu skačku spryjała adkryćcio biudžetnych avijalinij u ałbanskich aeraportach», — zajaviła ACI.
Pryčyna, pa jakoj biudžetnyja avijakampanii adkryvajuć u krainu ŭsio bolš i bolš maršrutaŭ, kryjecca pierš za ŭsio va ŭzroŭni jaje cen.
Naprykład, Fiederalnaje statystyčnaje ahienctva Niamieččyny niadaŭna vyśvietliła, što ceny ŭ restaranach i haścinicach u Ałbanii na 56 adsotkaŭ nižejšyja, čym u Niamieččynie, što robić jaje samym tannym miescam dla adpačynku ŭ Jeŭropie.
Ałbanija stała asabliva papularnaj siarod italjancaŭ, jakija mohuć dabiracca da jaje pa mory, pry hetym vielmi biudžetna. Kali padarožža na łodcy tudy i nazad z Bary ŭ ałbanski kurortny horad Dures kaštuje kala sta jeŭra, to za ŭnutranuju pajezdku z Ryma na Sardziniju italjancam davodzicca płacić u dva razy bolš.
Imklivy rost cen i ekstremalnyja ŭmovy nadvorja padčas turystyčnaha siezona prymusili italjancaŭ bolš hladzieć u bok zamiežnych pajezdak.
Arhanizacyja italjanskaha turyzmu Federturismo padličyła, što kolkaść italjanskich turystaŭ u niekatorych rehijonach krainy skaraciłasia na 20—30 pracentaŭ u paraŭnańni ź minułym hodam, u toj čas jak kolkaść zamiežnych turystaŭ u Italii pavialičyłasia na 43 adsotki za pieršyja čatyry miesiacy.
Adpačynak u Ałbanii taksama rekłamavali niekatoryja italjanskija miedyja, jakija achryścili susieda pa mory «karybskaj krainaj Jeŭropy», uschvalajučy tamtejšyja piasčanyja plažy. Ałbanija taksama była rekamiendavanaja niekalkimi italjanskimi turystyčnymi błohierami z-za jaje tannych cen na parom i blizkaje raźmiaščeńnie.
U jakaści dadatkovaha bonusu časta ŭkazvajecca, što mnohija ałbancy havorać pa-italjansku.
Jany nie byli hatovyja da bumu
Adnym z turystaŭ, jakija adpravilisia na paromie ź Italii ŭ Ałbaniju ŭ hetym hodzie, ź jakim pahutaryła Financial Times, byŭ 28-hadovy Nikałas Fierera. Jon apisaŭ pajezdku na paromie ŭ Ałbaniju jak chaos z kučaj brytancaŭ, italjancaŭ i ałbancaŭ. Kali jon prypłyŭ na kurort Saranda, niedaloka ad hreckaj miažy, na plažy było poŭna italjancaŭ. «Heta było padobna da maleńkaj Italii», — skazaŭ jon.
Fierera płaciŭ 360 jeŭra za tydzień za «prostuju, ale pryjemnuju» kvateru z čatyrma spalniami ŭ Sarandzie, što składaje tolki małuju častku taho, što b jon zapłaciŭ za adpačynak u Italii.
U toj ža čas italjaniec adznačyŭ, što jaho arandavanaja kvatera była niedabudavanaja, jak i mnohija inšyja apart-hateli ŭ hetym rajonie. «Mnie padałosia, što jany nie hatovyja da turystyčnaha bumu», — skazaŭ jon.
Niadziŭna, bo turystyčny ažyjataž u Ałbanii raptoŭny.
Pavodle apošnich źviestak Jeŭrastata, zamiežnyja turysty praviali ŭ Ałbanii 261 000 načej u pieršym kvartale, što na 152 adsotki bolš, čym za toj ža pieryjad 2019 hoda. Dla paraŭnańnia, kolkaść turystaŭ u Italii, turystyčnaj krainie, jašče nie adnaviłasia da dapandemičnaha ŭzroŭniu.
Imklivaje pašyreńnie kurortaŭ u prybiarežnych rajonach taksama vyklikała šmat unutranaj napružanaści ŭ krainie, bo ŭrad sprabuje vyzvalić miesca dla hatelaŭ za košt žyłych damoŭ.
Adnak samymi bujnymi akcyjanierami hatelaŭ časta źjaŭlajucca sami palityki.
Čytajcie taksama:
Tannaj Turcyi bolš nie budzie? Što adbyvajecca z cenami na adpačynak?
Ad Turcyi da Maldyvaŭ. Jakija samyja darahija tury kuplajuć biełarusy ŭ hetym siezonie?
